Loron Mundial Jovens ! Grupu Produtivu Apresenta Produtu Iha Rabilau

Imajem : SEKoop Arsenio Pereira hala’o vizita ba exposição iha Rabilau, 12/08/2025.

SAPNewsTL, Ainaro : Iha ámbitu selebrasaun loron juventude mundiál, Sekretáriu Estadu Kooperativa (SEKoop) Arsenio Pereira parabeniza no konsidera joven nu’udár ai-rin no futuru ba nasaun Timor-Leste, joven sira-nia kreatividade sei hasa’e setor ekonómia, sosial no kulturál.

Marciana Da Conceição JurnalisMídia Sapnews

“Ohin loron juventude mundiál, ha’u-nia parabéns ba foinsa’e sira tanba imi maka sei sai ai-rin ba nasaun, imi mak sei kontinua ba rai ne’e nia diak iha futuru mai. Ha’u kontente simu konvite hodi mai partilla servisu sira ne’ebe durante ha’u hala’o ba foinsa’e sira ne’ebe organiza husi parseiru sira, oinsa bele halo buat ruma liu husi ita nia kreatividade”.

“Fahe saida maka bele kontribui no saida maka ita bele halo hamutuk hodi dezenvolve rai ida-ne’e ba futuru, foinsa’e sira maka sai ai-rin ba setor ekonómia, sosial, kultura no saida de’it ita-boot sira maka sei kontinua”. Dehan Sekretáriu Estadu Kooperativa Arsenio Pereira hafoin nia diskursu iha Rabilau, Maubisse, Tersa(12/08).

Iha fatin hanesan, Reprezentante Prezidente Alumni Parlamentu Foinsa’e Timor-Leste – APFTL Domingos Belo Mendonça de Jesus sublinha objetivu husi espozisaun ne’e hodi lori grupu produtor sira iha area rural, halo interaksaun direita ho membru guvernu sira, oinsa bele kontribui ba diversifikasaun ekonómia ne’ebe sai hanesan alternativu ba Timor-Leste.

“Ami hakarak lori grupu produtor sira hodi liga direita ba nai ulun no reprezentante governu, ohin, ita selebra loron juventude, ami fo tempu mai atu rona juventude sira-nia lian, nune’e hamutuk ita bele kontribui ba diversifikasaun ekonómia iha rai-laran”. Dehan Domingos Belo Mendonça de Jesus.

Joven produtivu ne’ebe luta ba joven sira seluk liu-liu iha area rural mai hamutuk hodi aproxima ba ministériu relevante no investe ba setor produtivu ne’ebe konsidera nu’udar alternativu ekonómia Timor nian.

“Ami nu’udár joven produtór ne’ebé maka luta ba joven sira seluk mós, ami nafatin hakarak aproxima ho Ministériu relevante sira hodi investe iha setór produtivu sira ne’ebe maka ami konsidera nu’udár alternativu ba ekonómia rai ida ne’e”.

“Ita iha joven barak ne’ebe kriativu maibé balu iha areá rurál, entaun ami mai halo atividade espozisaun iha Rabilau para Governu bele hatene joven sira iha produtu barak no iha atividade produtivu barak no oinsa maka bele investe ba setor produtivu ne’e rasik”. Nia dehan

Joven produtor husi Artezanatu Samkada Maubisse Adriano Martins haktuir , “Ami-nia grupu ne’e hahú husi tinan 2015 to’o agora, maibe tuir feira sira hanesan ne’e foin maka dala tolu, primeiru iha fatin ne’e (Festival Rabilau) , iha Dili no agora iha Espozisaun ida ne’e”.

“Ami iha uma adat nomos kaneka ne’ebe halo husi au, uma adat ne’e ha’u-nia alin ikun mak halo, maske ho kondisaun defisiente maibé defisiente ida ne’ebe uniku, nia la eskola maibe bele hakerek, lee no toka”.

Adriani konta, “Ha’u-nia alin ne’e bele halo uma adat nomos halo kadeira roda, no foin lalais festival iha ne’e Prezidente rasik moos sosa ona kadeira roda rua iha fatin ida ne’e”

“Ha’u mos ajuda alin hodi halo uma adat sira ne’e maibe kreatividade ne’e mai husi nia rasik mak ami ajuda deit”.

“Uma adat ne’e ami halo durasaun tempu kleur mak semana ida maibe karik lais liu ne’e loron haat deit ne’e diak ona. Uluk iha ne’e sosa haat, dili sosa rua no ohin sosa rua tan, uma adat folin 50 no kaneka folin 5”. Nia konta

Entretantu, atividade ne’ebe realiza husi OXFAM ne’ebe parseria hamutuk ho Alumni Parlamentu Foinsa’e Timor-Leste (APFTL), Mata Dalan Institute (MDI), Asosiasaun Jornalista Timor-Leste (AJTL), Timor-Leste Organic Fertilizer (TILOFE), Ermera Ai-kulat Mutin Organiku (EAMO) no Forum Juventude Defisiensia Timor-Leste (FJDTL) no hetan apoiu husi Partnership for Inclusive Prosperity (PROSIVU) ho finansiamentu husi Department of Foreign Affairs and Trade (DFAT) liu husi projetu Haforsa Lian no Kreatividade Foin Sa’e Inkluzivu (HAKFOUN) ne’e nu’udar programa ne’ebé foku ba hasa’e partisipasaun foin sa’e sira hodi promove setor produtivu iha rai laran.

TAGS
Share This