MACLN : Horáriu Pagamentu, Benefisiáriu Hamutuk 15.000 Sei Simu Iha Faze Da-huluk

SAP News TL, Díli : Relasiona ho data pagamentu faze da-huluk, Ministériu bá Asuntus Kombatentes Libertasaun Nasionál (MAKLN) fo sai ba públiku orariu pagamentu ba benefisiáriu hamutuk 15.000 iha faze da-huluk.

Ministériu bá Asuntus Kombatentes Libertasaun Nasionál (MAKLN) informa bá públiku tomak liu-liu Inan ho Aman Veteranu no Kombatente sira, inklui família Mártir sira hotu iha territóriu nasionál, atu bele haree oráriu atendimentu nian iha ámbitu pagamentu faze da-huluk, loron 15 fulan-Dezemberu 2025.

Totál Benefisiáriu sira ne’ebé atu hetan pagamentu iha faze da-huluk fulan-Dezembru tinan ne’e nian iha rihun sanulu-resin lima, atus-neen, sia-nulu resin-hitu (15.697). Hosi númeru ne’e, kada loron MAKLN liuhosi Diresaun Nasionál bá Pensaun no Subvensaun (DNPS) sei atende de’it ema na’in-700.

Nune’e, husu públiku tomak atu haree didi’ak oráriu iha kraik ne’e;

1. Aileu ema hamutuk 612, atende iha loron 15/12/2025.

2. Ainaro ema hamutuk 1.000, atende iha loron 16/12/2025.

3. Baucau ema hamutuk 851, atende iha loron 18/12/2025.

4. Bobonaro ema hamutuk 1.145, atende iha loron 19/12/2025.

5. Covalima ema hamutuk 1.121, atende iha loron 23/12/2025.

6. Dili ema hamutuk 3.906, atende iha loron 29/12/2025.

7. Ermera ema hamutuk 935, atende iha loron 9/1/2026.

8. Lautem ema hamutuk 2.940, atende iha loron 12/1/2026.

9. Liquiça ema hamutuk 1.281, atende iha loron 19/1/2026.

10. Manatuto ema hamutuk 682, atende iha loron 21/1/2026.

11. Manufahi ema hamutuk 486, atende iha loron 22/1/2026.

12. Oecusse ema hamutuk 50, atende iha loron 23/01/2026.

13. Viqueque ema hamutuk 634, atende iha loron 26/01/2026.

14. Fora hosi Timor ema hamutuk 54

MAKLN kontinua apela bá públiku atu kontinua hatudu dixíplina, mantein pás no hakmatek, hodi la’o tuir prosedimentu sira ne’ebé iha ona, tanba pagamentu ida-ne’e sei kontinua to’o tinan oin 2026.

MACLN Husu Benefisiáriu Sira Simu Osan Iha Banku Ne’ebe Rejistu Bá, Loron 1 Atende Ema 700

SAP News TL, Dili : Governu liuhosi Ministériu bá Asuntus Kombatentes Libertasaun Nasionál (MAKLN) hahú halo pagamentu faze da-huluk nian bá Kombatentes no família Mártir sira ne’ebé mak rejistadu iha segundu rejístu 2009.

Ministru bá Asuntus Kombatentes Libertasaun Nasionál, Gil da Costa Monteiro “Oan Soru”, husu bá Kombatentes no família Mártir sira atu bele simu osan iha ida-idak nia konta tuir banku ne’ebe rejistu ba.

“Foti no dada osan” iha instituisaun finanseira ka banku ne’ebé mak sira pertense bá”. Hateten MACLN Gil da Costa Oan Soru iha Comoro, 15/12/2025. Sita média MACLN

MAKLN sei transfere osan direta bá benefisiáriu sira-nia númeru konta-bankária ne’ebé molok ne’e sira sumbete ona iha Diresaun Nasionál bá Pensaun no Subvensaun.

Prosedimentu sira kona-bá atu halo levantanmentu osan ne’e mak, benefisiáriu sira mai konfirma dadus iha DPNS, haruka tékniku sira impríme (print) fixa pagamentu nian no lori fixa ne’e bá iha banku ne’ebé sira loke konta bá, nune’e banku bele prosesa bá pagamentu.

Uainhira dokumentu komprovativu sira loos hotu ona, maka prosesu pagamentu tuir mai, benefisiáriu ida-idak bele bá ona halo levantamentu iha banku ne’ebé mak sira pertense bá, no la presiza ona mai iha ministériu.

Pagamentu ida-ne’e sei akomoda mós ho kontribuisaun fundu investimentu Veteranus nian.

IX Governu Konstitusionál liuhosi Ministériu bá Asuntus Kombatentes Libertasaun Nasionál (MAKLN) sei realiza prosesu pagamentu ida-ne’e to’o iha tinan 2026, no kada loron atende másimu ema na’in atus-hitu (700).

Governante ne’e husu bá Veteranus no Kombatente sira Libertasaun Nasionál nian inklui família Mártir sira atu kontinua hatudu dixiplina, mantein pás no hakmatek, hodi la’o tuir prosedimentu sira ne’ebé iha ona, tanba pagementu ida-ne’e sei kontinua to’o tinan oin 2026.

Enkuantu, oras ne’e benefisiáriu rihun ba rihun iha ona Resintu Banku do Nosso Futuro hodi simu fixa no simu sira-nia direitu.

Antes ne’e, Ministru Asuntu Kombatente Libertasaun Nasional (MAKLN) Gil da Costa “Oan Soru” deklara sobrevivente hamutuk rihun haatnulu resin tolu (43.000 liu) sei simu pensaun veteranu hosi governu iha loron 15 fulan Dezembru 2025.

Kombatente sira ne’ebé atu hahú simu pensaun iha fulan-ida ne’e maka sira ne’ebé mak rejistadu iha segundu rejístu tinan 2009 inklui sira ne’ebé ninia dadus pendente kedas iha primeiru-rejístu 2003 no 2005.

“Oan Soru” esplika, sira ne’ebé atu hetan dadauk pagamentu hosi governu iha fulan ida-ne’e, inklui grau partisipasaun (3-7), (8-14), (15-19), (20-24) ho Mártir sira ne’ebé mak mate ho idade klosan durante funu bá libertasaun nasionál hahú hosi tinan 1975 to’o 1999.

“Ema mate klosan ne’e barak liu. Maibé, agora dadauk, iha ema atus-ida (100) resin mak tama iha pensaun ne’ebé foin dadauk ita aplika bá. Maibé, ami hein tán iha loron hirak ne’e, tanba lísta ne’e lori bá taka sai hela, no ami halo hela kálkulu. Sé ida ne’e mai hotu, hamutuk atus-neen (600) resin. Atus-neen resin ne’e mak sei paga iha fulan-dezembru tinan ida-ne’e,” Ministru “Oan Soru” informa liuhosi konferénsia imprénsa iha kna’ar fatin, Comoro-Dili, Kinta (04/12/2025).

Tuir dadus hatudu katak ema ne’ebé durante ne’e simu hela pensaun, inklui dadus sira iha segundu-rejístu 2009 nian hamutuk rihun 43. Dadus ida-ne’e inklui pensaun oioin mak hanesan, balu sei hetan pensaun Vetaranu ho tinan 24, balu 15-19, no barak liu mak simu pensaun 8-14 ho pensaun sobrevivénsia.

“Iha ne’e mós iha Prestasaun Pekuniária únika ne’ebé mak hanesan ohin mensiona iha ne’e, hamutuk 5 mill resin. Ne’e maka sei hetan mós direitu bá prestasaun pekuniária únika ne’e,” relata Ministru “Oan Soru”.

Enkuantu montante osan ne’ebé mak MACLN sei uza hodi halo pagamentu Kombatente sira iha fulan ida-ne’e nia klaran hamutuk Millaun $49. Maibé, hosi millaun $49 ne’e kategória hanesan brutu, no líkidu ne’e hamutuk milaun $44 resin ($44.294,144,12).