Manan SLB Ho Skore 3-1, S’Amuser Sai Kampiaun Taxa Rosa Muki Bonaparte 2022

SAPNewsTL, DILI : S’Amuser FC sai kampiaun iha Taxa Rosa Muki Bonaparte 2022 hafoin halakon AD SLB Laulara iha jogu final ho skore 3-1.

Jogu entre S’Amuser FC kontra AD SLB Laulara hala’o iha kampu demokrasia, Bairro Formosa, Dili Sabadu (10/12).

Iha jogu parte dahuluk, ekipa rua ne’ebe mai ho jogador  intimu ne’ebe ho ambisaun atu sai kampiaun iha Tasa Rosa Muki Bonaparte 2022 ne’ebe bainhira kick off ekipa rua halo kedas jogu tuir idak-idak nia estratejia hodi halo presaun ba malu ne’ebe foin tama ba minutu tolu jogador AD SLB Laulara Natalia da Costa marka golu liu husi suta penalidade hafoin jogador adversariu halo falta iha area penalidade nia laran hodi muda kedas skore ba 1-0.

Hafoin sofre golu ida ekipa S’Amuser hasae tan nia ritmu jogu ne’ebe ekipa ne’e  konsege marka golu ida husi jogador Leticia do Rego iha minutu 30 ne’ebe muda skore 1-1, ne’ebe ho skore impata ekipa rua halo nafatin presaun no kontra atake ba malu hodi tenta nafatin aumenta golu maibe to’o minutu 45 remata skore nafatin ho 1-1.

Kontinua iha parte daruak Ekipa rua muda estratejia jogu ida-idak nian hodi vitoria iha jogu final ne’e maibe sorti monu ba ekipa S’Amuser ne’ebe marka tan golu  ida  husi jogador Dolores V. da S. Costa iha minutu 55 muda skore ba 2-1.

skore refere ekipa AD SLB Laulara halo presaun nafatin ba ekipa adversariu atu aumenta tan golu maibe la konsege no sira sofre tan golu ida husi ekipa adversariu iha minutu 63 husi jogador Dolores V. da S. Costa husi suta penalidade tanba jogador AD SLB halo falta iha sira nia area penalidade hodi muda tan skore ba 3-1 ne’ebe to’o minutu 90 remata la iha tan ekipa ida aumenta golu ida ne’ebe ho rezultadu ikus skore nafatin 3-1 ne’ebe ho rezultadu ne’e lori S’Amuser FC sai kampiaun ba Tasa Rosa Muki Bonaparte 2022.

Entretantu kampiaun ka manan nain dahuluk iha Tasa Rosa Muki Bonaparte 2022 mak S’Amuser FC ne’ebe  simu premiu medalla, tasa no orsamentu ho montante 5,000 USD, manan nain daruak maka AD SLB hetan premiu medalla no orsamentu ho montante 3,000 USD, manan datoluk mak Maranatha FC simu premiu medalla no orsamentu ho montante 2,000 USD, manan dahaat mak UNITAL FC hetan premiu medalla no orsamentu ho montante 1,000 USD, mellor markador iha kompetisaun ida ne’e mak Nilda Romana husi Buibere FC ho golu 28 ne’ebe hetan premiu medalla no orsamentu montante 500 USD, mellor jogador maka Brigida Soares husi Maranatha FC ne’ebe hetan medalla no orsamentu montante 500 USD no mellor Guarda redi ka baliza maka Madalena Soares husi S’Amuser FC simu premiu medalla no orsamentu montante 500 USD.

Reportajen: Augusto dos Santos