Marotona Internasional Dili ! Solidariza Palestina, Selebra Adezaun TL Ba ASEAN & Hasa’e Imajem TL

Imajem : Maratona Internasional Dili 2025, Dili, 11/10/2025. Foto : Média PR

SAPNewsTL, Dili : Prezidente Repúblika no Laureadu Nobel ba Pás, Jose Ramos-Horta servisu hamutuk ho Nonu Governu Konstituaional realiza Maratona Internacional Dili 2025 konsege halibur korredór rihun ba rihun hodi “Halai Ba Palestina” no selebra adezaun Timor-Leste ba ASEAN.

Maratona Internasionál Dili 2025 ho tema “Halai ba Palestina”, halibur ho susesu korredór nasionál no internasionál rihun ba rihun hodi hatudu solidariedade ho povu Palestina nian. Enkuantu eventu ne’e mós selebra Timor-Leste nia adezaun ba ASEAN ne’ebe sei formaliza iha loron 26 fulan Outubro 2025.

Maratona Internasionál Dili sai nafatin prioridade xave ida husi Prezidente Ramos-Horta nia mandatu 2022-2027, ho objetivu atu hametin pás, promove turizmu, no hasa’e perfil internasionál nasaun nian.

Prezidente Ramos Horta hato’o ba partisipante sira molok foti bandeira inísiu. “Sorte di’ak ba imi hotu ne’ebé partisipa iha maratona ida-ne’e. Ida-ne’e mak maratona ida desportu nian, solidariedade, maun-alin, no pás nian. Ha’u konvida imi hotu atu apoia partisipante sira ho laran-di’ak, edukasaun, no entuziazmu. Ida-ne’e maka importante liu.” Hateten Presidente Repúblika José Ramos Horta iha Palasiu Presidente Nicolau Lobato, Dili, 11/10/2025. Sita Média PR

Maratona tinan ida-ne’e nian iha kategoria korrida maratona kompletu (42.195 km), meia-maratona (21.098 km), para-atletizmu (10 km), no halai divertidu 3 km ba família no komunidade sira.

Partisipasaun forte iha kategoria hotu-hotu, ho atleta 26 iha maratona kompletu, 221 iha meia-maratona, 42 iha para-atletizmu, no rihun ba rihun iha halai divertimentu 3 km. Korrida hotu hahú no remata iha Palásiu Prezidensiál Nicolau Lobato, simboliza unidade nasionál no valór demokrátiku.

Ramos Horta prezide serimónia entrega premiu, hodi fó parabéns ba manán na’in sira iha divisaun nasionál no internasionál. Rezumu kona-ba manán-nain sira mak hanesan tuirmai ne’e:

1. Maratona Kompletu (42.195 km): Manan-na’in nasionál mane na’in sanulu, feto nasionál na’in haat, mane internasionál na’in tolu, no feto internasionál na’in rua.

2. Meia-Maratona (21.098 km): Manan-na’in nasionál mane sanulu, feto nasionál sanulu, mane internasionál na’in tolu, no feto internasionál na’in tolu.

3. Para-Atletismu (10 km): Manan-na’in mane na’in lima no feto na’in lima.

4. Prémiu sira mós fó ba partisipante sira hosi halai divertimentu ho distánsia 3 km.

Iha enserramentu, Prezidente Ramos-Horta reflete kona-ba signifikadu duplu husi eventu ne’e katak “Maratona Internasionál Dili 2025 mak ida husi maratona boot liu ne’ebé maka ita organiza ona, ho feira ida ne’ebé maka hatudu ai-han sira husi nasaun oioin iha ASEAN, inklui Timor-Leste.

“Ida-ne’e selebra Timor-Leste nia adezaun ba ASEAN, ida husi inisiativa nasionál balun ne’ebé sei hala’o to’o loron 26 fulan-Outubru no liu tan, ne’ebé maka hari’i iha Primeiru-Ministru nia alkanse ne’ebé maka luan. Ida-ne’e mós permite ita atu hamriik hamriik iha solidariedade ho povu Palestina.”

Prezidente Ramos-Horta hatutan, “Ha’u-nia agradesimentu kle’an ba embaixada sira ne’ebé sempre prezente ho ami iha inisiativa hotu-hotu ne’ebé ami halo, Prezidénsia, ami-nia parseiru komersiál sira, no organizadór sira—liuliu agradese ba Ministru Juventude, Desportu, Arte no Kultura, Vise-Primeiru-Ministru Francisco Kalbuadi Lay no Federasaun Atletizmu Timor-Leste nian, ne’ebé alkansa buat barak; ho rekursu ne’ebé limitadu”.

“Obrigadu ba partisipante rihun ba rihun, no parabéns ba manan-na’in sira hotu Ita-boot sira nia espíritu maka halo iventu ne’e sai susesu tebes.”

Maratona Internasionál Dili promove saúde, bem-estar, no turizmu hodi halibur partisipante lokál no internasionál sira iha selebrasaun desportu no reziliénsia.

Maratona Dili Internasional 2025, Presidente Repúblika José Manuel Ramos Horta halo abertura iha loron 09 fulan Outubro no ensera iha loron 11 fulan Outubro 2025.