Masakre Mosu Tanba Joven Sira Komunga Prinsípiu ‘Mate Ka Moris Ukun Rasik An’
Imajem : Sobrevivente 12 de Novembru aktual Prezidenti em Exersisiu Komite 12 de Novembru Filipe Rodrigues Pereira iha semiteriu Santa Cruz, Tersa (12/11/2024).
SAPNewsTL, Díli — Iha Ambitu selebrasaun loron Masakre Santa Cruz ba dala XXXII no loron Nasional Juventude ba dala XXIX, Sobrevivente 12 de Novembru Filipe Rodrigues Pereira informa, konsekuensia husi masakre Santa Cruz rezulta Joventude barak mate, dadur, kanek, desperadus, no traumatismu.
Sobrevivente 12 de Novembru aktual Prezidenti em Exersisiu Komite 12 de Novembru Filipe Rodrigues Pereira hateten, loron 12 fulan novembru tinan 1991, juventude sira kria forsa hodi tulun Frenti Klandistina Frenti Armada ne’ebe luta kontra inimigu sira liu husi dalan manisfestasaun.
“Loron ida ohin, ita relembra fila fali maluk barak mate iha fatin ida ne’e, maluk barak kapturadu iha fatin ida ne’e, entaun konsekuensia husi Masakre Santa Cruz rezulta Juventude barak obrigatóriu tenki ba dadur, kanek, desperadus, traumatismu no familia balun lakon sira nia oan”.Dehan Vice-Prezidenti Komite 12 de Novembru Filipe Guteres Pereira liu husi nia diskursu iha semiteriu Santa Cruz, Tersa (12/11/2024)
Nia haktuir iha tinan 1991 hafoin vizita Papa João Paulo II mai Timor-Leste sai fonte dezafiadu ba juventude sira iha sidada Dili kria manifestasaun, nune’e iha fulan outubru loron 28 militar indonesia sira kaptura juventude loriku asu wa’in, Sebatião Gomes ho nia kolega sira ne’ebe iha Motael rezulta juventude sira lakon vida.
“Hafoin liu deit loron 14 Juventude no estudante sira organiza malu halo manisfestasaun mai iha semiteriu santa kruz, aktu demostrasaun refere juventude sira kria sai forsa hodi tulun Frenti Klandistina no Frenti Armada ne’ebe luta kontra inimigu sira iha ailaran, hanesan joven rezisténsia iha altura ne’ebá, ami inklina iha manisfestasaun sira kontra militar indonesia”.
Prezidente em Exersisiu Komite 12 Novembru ne’e akresenta luta ne’ebe heroi no heroina sira hala’o durante tempu naruk nia laran hetan apoiu husi natureza sai baze fundamentu hodi hatudu ba juventude sira, kaer metin prinsipiu partidu historiku sira nian hodi hakilar ba mundu katak mate ka moris Timor ukun rasik aan.
“Ha’u hakarak hatete talves ita nia natureza Timor nian dudu ita akomoda prinsipiu partidu historiku sira hotu hodi lori bensaun mai ita, tanba nia juventude sira komunga hela prinsípiu heroi no heroina sira nian katak mate ka moris ukun rasin an, Ha’u hakarak fó hanoin katak diversidade kontra ita nia propria forsa maibé ho estratejia komandu da luta nian, ita konsege determina ukun rasik an liu husi dalan referendum”. Nia sublinha
Entretantu, iha serimónia komemorasaun loron Masakre Santa Cruz ba dala XXXIII no loron Nasional Juventude ba dala XXIX ne’ebe hala’o iha semiteriu santa cruz partisipa husi Prezidente Republika José Ramos Horta, Vise-Primeiru Ministru Mariano Assanami Sabino, eis Prezidenti Republika Fransisco Guterres Luo-olo, Tenente Jeneral Falur Rate Laek, Sekretáriu Jerál Partidu FRETILIN, Mari Bin Amude Alkatiri, Sobrevivente no povu Timor-Leste.
Jornalista : Guilhermino Ramos da Cruz