Maske Defisiensia Fizika, Maibe Fiar Nunka Defisiente
Imajem : Fredy Soares iha Igreza Ai-Mutin, 24/12/2024
SAPNewsTL, Dili : Defisiente Fredy Soares hela iha Fatuhada partisipa iha misa natal kalan ne’ebe hala’o iha igreza Parokia Saun Jose Ai-Mutin.
Durante partisipa misa kalan natal, Fredy Soares hateten nia parte kontente tanba bele selebra loron moris kosok oan Jesus Kristu.
“Ha’u kontente tanba ha’u bele mai partisipa misa natal kalan, ha’u mai hodi agradese ba Maromak nia domin no bensaun ne’ebe ha’u simu hosi nai Maromak durante tinan 2024”.Tenik Defisiente Fredy Soares ba SAPNews iha Igreza Parokia Ai-Mutin, 25/12/2024
Fredy Soares salienta, natal bele lori grasa, domin no damen ba ema hotu tanba Jesus moris mai lori bensaun paz nian ba ema hotu.
“Ha’u hakarak natal ne’e bele lori paz no domin ba ita hotu”.
Fredy konta nia nunka falta hodi partisipa misa kada domingu iha igreza Ai-Mutin maske kondisaun fiziku ladun diak hanesan ho ema sira seluk.
“Ha’u nunka falta misa kada domingu maske ha’u nia kondisaun defisiente iha ain, selebra ita nia fiar ba Maromak ne’e importante”.
Imajem : EhD Fredy Soares rei meninu Jesus Kristu nia ain
Membru Parlamentu Foinsa’e Nian (PFN) ne’ebe representa hosi Ema ho Defisiensia (EhD) ne’e dehan limitasaun fisiku la sai sasukat ba ninia vontade hodi la’o ba fatin ne’ebe nia bele ba.
“Ha’u uza kursi roda maibe ha’u la lakon vontade ba misa (Igreza Ai-Mutin) no eskola (Klase 10° Anu, Eskola Sekundariu 10 Dezembru), wainhira iha dalan ba kursi roda, ha’u sei ba nafatin”. Fredy hateten
Pe. Helio Castro Alves CMF hateten tempu natal no tinan foun laos deit muda hatais maibe muda mos hahalok ida-idak nian tanba Maromak presiza ema nia hahalok laos hatais.
“Festa natal laos atu muda deit ita nia tampilan (hatais) maibe muda mos ita nia karakter ka hahalok”.
Padre Selebrante ne’e husu atu sarani sira loke odamatan laran nian atu bele simu naroman no esperansa hosi Maromak.
“Natal mos fanun ita atu loke odamatan laran nian atu bele simu naroman no esperansa hosi Maromak nian”. Nia sublinha
Enkuantu, misa natal kalan ne’ebe hala’o iha igreza Parokia Ai-Mutin ne’e hetan partsipasaun maksimu hosi sarani sira. Maske nune’e maibe durante misa sidadaun balun mos kontinua tiru fugetes iha dalan ninin besik igreza.
Jornalista : Ekipa Kobertura
