Maske Feriadu Nasionál ! Povu La Partisipa Máximu Iha Komemorasaun Loron FALINTIL
Imajem : Komemorasaun loron FALINTIL ba dala 50° iha Tasi-Tolu, 20/08/2025
SAPNewsTL, Díli : Komemorasaun loron memorável 50 anos ezisténsia Força Armada Libertasaun Nasional Timor-Leste (FALINTIL), ne’ebe Governu deside realiza iha resintu monumentu vizita Papa Fransisco Tasi-Tolu, menus partisipasaun husi komunidade timoroan.
Guilhermino Ramos & Marcela Mery — SAPNews TL
Tuir observasaun SAPNews nota iha resintu Tasi-Tolu katak, eventu komemorativu ne’e menus tebe-tebes
partisipasaun husi komunidade sira, maske governu aprova loron toleransia de pontu ba funsionáriu, ajente no funsionáriu públiku sira durante loron ida.
Eventu importante ida ne’e mós la hatudu partisipasaun boot husi komunidade lokal ne’ebé hela iha área Tasi-Tolu, inklui la marka prezensa husi eis Prezidenti Republika Francisco Guterres Lú-Olo no Eis Primeiru-Ministru Marí Alkatiri. Tasi-Tolu, Quarta (20/08/2025).
Kondisaun ida ne’e halo estraña tanba Governu liu husi Konsellu Ministru aprova toleránsia loron ida spesial atu fó oportunidade ba povu hotu-hotu partisipa iha komemorasaun ida-ne’e.
Enkuantu, iha loron 13 fulan Agostu tinan 2025, Governu Timor-Leste liu husi Konsellu Ministru (KM) aprova termus alínea c) hosi n. 1 artigu 5.º hosi Lei n. 10/2005, loron 10 fulan-agostu, ne’ebé altera hosi Lei n. 3/2016, loron 25 fulan-maiu, no Lei n. 10/2023, loron 5 fulan-abril, “loron 20 fulan-agostu, nu’udar Loron Forsa Armada Libertasaun Nasionál Timor-Leste (FALINTIL) nian” hanesan data komemorativa ofisiál
Iha loron 20 fulan-agostu 2025, povu timoroan sei komemora Aniversáriu Forsa Armada Libertasaun Nasionál Timor-Leste (FALINTIL) nian ba dala 50, ne’e nu’udar oportunidade ida atu fó omenajen no hato’o agradesimentu ba kombatente sira hotu, liuliu ba martir sira ne’ebé sakrifika sira-nia vida hodi hetan liberdade no independénsia nasionál.
Haree ba importánsia atu fó onra ba loron 20 fulan-agostu nu’udar Loron FALINTIL nian, ne’ebé importante tebes atu rekoñese veteranu sira-nia valór ne’ebé boot tebes, sira-nia sakrifísiu no luta ba Timor-Leste nia independénsia, hodi fó onra ba eroi sira no promove ideá sira ne’ebé motiva sira-nia rezisténsia.
Selebra loron 20 fulan-agostu nu’udar Loron FALINTIL, hanesan okaziaun exepsionál ida ba timoroan sira, liuliu foin-sa’e sira, atu selebra identidade nasionál no patriotizmu, nu’udar dalan ida atu prezerva no komemora memória luta nian no haburas konstrusaun nasaun ida ne’ebé pasífika, tolerante no kriativa.
Konsidera katak, selebra Loron FALINTIL nian mós nu’udar oportunidade exelente ida atu halibur lider nasionál sira, autoridade sira seluk, komandante militár sira no sidadaun sira hotu, liuliu joven timoroan sira hodi hamutuk fó onra ba eroi sira.
Governu define ona programa ida ba selebrasaun Loron FALINTIL nian, liuhosi programa ida-ne’e, aleinde serimónia tradisionál no desfile militár sira, sei hala’o mós eventu síviku, desportivu no kulturál, hanesan palestra, reflesaun, espozisaun, konsertu no aprezentasaun teatrál iha territóriu nasionál.