Matan-Ween Sulin ! Wainhira Kadáver Pe. Maubere Hakat Husi Comoro To’o Bekora
Imajem : Translada Saudozu Padre Domingos Maubere husi Comoro ba Bekora.
SAPNewsTL, Dili : Hafoin hala’o vizita ikus ba nia rai moris fatin no sarani Nossa Senhora do Carmo Letefoho, Saudozu Padre Domingos da Silva Soares “Maubere” nia isin mate to’o hikas aeroportu Nicolau Lobato Comoro no kontinua translada ba Igreja SACROJES Becora, Díli.
Iha dalan sarani sira hamrik, halo sinal da cruz, fo kontinénsia no omenajem ba Kadáver Padre Domingos da Silva Soares Maubere nakonu ho matan-ween no emosionalmente.
Wainhira Karreta Funerária ne’ebe translada Saudozu Padre Domingos Maubere Hakat husi dalan, sarani sira ne’ebe hamrik iha luron hamonu matan-ween no kari ai-funan nu’udar símbolu domin, agradesimentu no despedida ba maktoban.
Saudozu Padre Domingos Maubere nia mate-isin to’o Aeroporto Internacional Nicolau Lobato Comoro no simu direta hosi Sua Eminiénsia Dom Virgílio Cardeal do Carmo da Silva hamutuk ho padres, madres, sarani no Ministra Saúde Elia de Jesus.
Hafoin simu, ema hotu ne’ebe presente iha Aeroporto Comoro, kontinua translada ba Parokia Sagrado Coração de Jesus Becora hodi halo orasaun no misa husi sarani Parokia SACREJES Becora.
Durante estadia Kadáver Padre Domingos Maubere, sarani sira halo orasaun, venerasaun no misa ba Saudozu durante loron ida no kalan ida iha Letefoho, 16-17 Maiu 2025.
Wainhira misa remata, sarani Letefoho-Ermera ho laran triste no matan-ween hodi akompaña Saudozu nia mate-isin ba fatin ne’ebe elikópteru para ba hodi translada ba Dili.
Wainhira elikópteru to’o Letefoho, sarani sira ho laran susar no matan-ween nakonu hodi foti liman.
Tuir programa, hafoin Mate-isin Saudozu Padre Domingos Maubere translada ba rai moris fatin, Postu Administrativu Letefoho Munisípiu Ermera, kalan ida iha Letefoho, sei lori hikas mai Parokia Sagrado Coração de Jesus Beroka iha tuku 11:00, loron 17 Maiu.
Tuir mai, igreja sei halo misa fúnebre iha Igreja Sé Catedral, Villa Verde Díli, iha tuku 10:00, loron 19 Maiu 2025, hafoin sei halot Padre Domingos Maubere iha Semitériu Ailok-Laran Díli.
Jornalista : Marciana Da Conceição