Mate Iha Corea Sul ! SEFOPE Konsidera José Herói Ba Desenvolvimentu Ekonomia
Imajem : Família simu mate-isin José da Silva iha Aeroporto Internacional Nicolau Lobato Comoro, 20/11/2025.
SAP News TL, Corea Sul : Trabalhador timoroan José da Silva ne’ebe hakotu nia peregrinasaun iha Corea Sul, SEFOPE entrega ona nia isin-mate no família simu ho matan-been.
Daniel da Silva – SAPNewsTL
Xefe Gabinete Sekretaria Estadu Formasaun Profissional no Empregu (SEFOPE) Jacinto Ribeiro Dias sente triste tanba lakon herói desenvolvimentu ekonomia nian ne’ebe ba ho kondisaun diak maibe fila hikas ho isin mate.
“Iha tinan 5 liu ba, ita mai iha ne’e hodi despede nia katak la’o kuida an, la’o ho maromak no servisu ho didiak maibe ohin ita mai hodi simu nia mate-isin, ita hotu lakon herói ekonomia Timor-Leste nian”. Hateten Xefe Gabinete Sekretaria Estadu Formasaun Profissional no Empregu (SEFOPE) Jacinto Ribeiro Dias iha Aeroporto Internacional Nicolau Lobato Comoro, 20/11/2025
Jacinto konsidera matebian José da Silva “hola parte herói sira ne’ebe mate ba rai ne’e, ita hotu sente triste lakon nia, ha’u hameno ba família hodi mai trata nia dokumentu, nune’e bele simu ninia direitu tinan lima nian”.
Xefe Suku Lisadila, Postu Administrativu Loes, Fernando Lobo fo agradese ba governu tanba bele fasilita timoroan ba servisu, kria kondisaun liliu bele fasilita mate-isin José da Silva mai Timor-Leste.
“Uluk nia ba ho kondisaun diak, ohin nia mai ho isin-mate, ami agradesimentu boot ba na’i ulun sira tanba bele fasilita ninia mate-isin hodi fila mai Timor-Leste”.
Wainhira mate-isin to’o iha portaun, família no matebian nia inan hamonu matan-been tanba lakon ona nia oan mane datoluk ne’ebe la’o rai no buka moris hodi servisu ba família nia diak.
Antes ne’e, Embaixada Timor-Leste iha Séul, liu husi Adidu Traballu Feliciano Simoes Mendonça, Asistente Adidu Jose Sebastiao C. Soares akompaña husi Chan, servisu hamutuk ho parte Hospital Je il Joeun, iha Provinsia Chung Cheongbok-Do, Eumseong, Repúblik Korea hodi fasilita mate-isin mai Timor-Leste.
“Embaixada atu partilha informasaun ne’e ba Familia no públiku katak ita-nia Alin ou Belun Sr. Jose Da Silva hakotu is iha Óras:8h33 (05/11/2025), agora dadauk Ekipa Embaixada Timor-Leste iha Séul liu husi Gabineti adidu traballu nian informa ona ba SEFOPE no Familia Mate-bian no Mate-bian Jose Da Silva husi Municipo LiQuiça”. Informa Asistente Adidu Jose Sebastiao.C.Soares ba SAPNews iha Corea Sul, 17/11/2025.
Nia informa trabalhador Jose Da Silva, baixa iha hospital Je il Joeun iha área Eumseong iha loron 31 fulan Outubru 2025, no hakotu iis iha loron 05 Novembru 2025.
Loron 18 fulan Novembru 2025, mate-isin Jose Da Silva aranka husi Repúblika Korea ba Sigapore, iha Dia 20 fulan Novembru 2025, aranka husi Singapore mai Timor-Leste, hafoin to’o Dili, SEFOPE entrega ba Familia Matebian.
Matebian Jose da silva ba servisu iha Korea Sul iha loron 16 Desembru 2019 no no hakotu iis iha loron 05 Novembru 2025 tanba hetan moras komplikadu nune’e la konsege salva nia vida.
Hafoin parte SEFOPE entrega mate-isin, família translada kedas ba nia rai moris fatin munisipiu Likisa, postu administrativu Loes, suku Lisadila.