Média Tour Iha Sagadate ! AJTL Promove Joven Produtivu & Problema Mudansa Klimátika
Imajem : Presidente AJTL Maria Zeovonia Vieira ko’alia ho jornalista sira iha Salaun Oxfam Hudi-Laran, 08/08/2024. Foto : Ermelinda Soares
SAPNewsTL, Díli- Assosiasaun Jornalista Timor Lorosa’e (AJTL ) hamutuk ho Oxfam iha Timor Leste hala’o Média Tour ba dala III kona ba asuntu mudansa klimátika iha suku Sagadate Postu Administrativu Laga Munisípiu Baucau.
Prezidente AJTL Maria Zeovonia Vieira hateten AJTL hamutuk ho Oxfam de Timor-Leste servisu hamutuk hodi implementa programa média tour kona-ba asuntu mudansa klimátika no mós hodi promove joven produtivu sira iha area rural.
“Durante ne’e Oxfam servisu hamutuk ho AJTL realiza projetu media tour ba asuntu mudansa klimátika no mós promove joven produtivu sira entaun media tour ba dala rua nian”. Tenik Prezidente AJTL Maria Zeovonia Vieira ba jornalista sira iha Salaun Oxfam Hudi-Laran, 08/08/2024
Lider AJTL ne’e dehan, AJTL deside hili Munisipiu Baukau Postu Administrativu Laga, Suku Sagadate tanba komunidade barak sofre ba mudansa klimátika liliu feto, labarik, ferik no katuas sira.
“Ita deside hili suku Sagadate atu jornalista sira halo estudu kazu kona impaktu mudansa klimátika ba komunidade sira liu-liu ba grupu vuneravel sira hanesan feto, labarik, ferik no katuas sira, ema ho difesensia no mós ho grupu Marjinal sira seluk ne’ebé mak hetan impaktu husi mudansa klimátika“. Prezidente AJTL Maria Zeovonia Vieira sublinha
“Jornalista sira halo estudu kazu ne’e hodi haree liu ba impaktu husi mudansa klimátika ne’ebé mak komunidade hasoru liliu la asesu ba bee-moos no setor produtivu ne’ebé mak la’o ladún di’ak tanba hetan impaktu husi mudansa klimátika”.
Imajem : Koordenador Klibur Estudante Juventude Suku Sagadate (KEJUSS) Celestino Gusmão Perreira
Iha fatin hanesan, Peskizador ONG La’o hamutuk, atuál Koordenador Klibur Estudante Juventude Suku Sagadate (KEJUSS) Celestino Gusmão Perreira informa problema mudansa klimátika ne’e rezulta laiha bee, impaktu ba aihoris la moris, animak barak mate no natar barak abandonadu.
“Impaktu husi mudansa klimátika rezulta feto sira tenki la’o dok hodi kuru be’e, balada sira mate tanba hahán no bee laiha, rai manas halo aihoris sira mate no populasaun sira kuda ai-han la moris”.
Atividade Media Tour refere organiza husi Oxfam Timor-Leste no Assosiasaun Jornalista de Timor-Leste, atividade ne’e hala’o iha Suku Sagadati Munisípiu Baucau ne’e kompostu husi jornalista na’in 16 RTTL, E.P, SAPNewsTL, LABEH, Média Mudansa, TVE, Rádiu Liberdade, One Timor, Dili Post, Lafaek News, Neon Metin, GuardaMor, Diligente, no Timor Post.
Jornalista : Ermelinda Soares