MJDAC-CDTL Sei Fo Prioridade Ba Federesaun 5 Kompete Sea Games 2025

Imajem : MJDAK Nelyo Isaac Sarmento

SAPNewsTL, Dili : Ministeriu Juventude Arte Kultura (sigla portuges MJDAC) ho Konfederasaun Desportu Timor-Leste (sigla portuges CDTL) sei fo prioridade ba federesaun desportivu lima kompete Sea Games 2025 iha fulan Dezembru iha Tailandia.

“Ita iha federasaun lima prioridade atu kompete Sea Games 2025 iha Tailandia mak Federasaun Boxe Amadora Timor-Leste (FBATL), Federasaun Atletizmu (FTA), Federasaun Karate-Do Timor-(Leste FEKATIL) Federasaun Taekwondo Timor-Leste (FTTL) no Federasaun Futebol Timor-Leste (FFTL), ba federasaun prioridade lima ne’e ita iha tarjetu ba sira tenki rekolla medalla osan mean”. dehan Ministru Juventude Arte no Kultura Nelyo Isaac Sarmento ba jornalista sira iha salão Tres de Março Maubai Comoro, Dili sabadu (26/04/2025).

Ministru hatutan, federasaun lima ne’e prioridade maibe sei koalia ho federasaun sira ne’e tanba futebol iha ninia regra rasik ba selesaun nasional, boxe tenki koordena didiak ho federasaun tanba daudaun AIBA iha problema oituan.

Federasaun tenki submete prosesu sai membru World Boxing International para federasaun kumpri regra sira internasional nian, nune’e atleta sira iha oportunidade kompete Sea Games 2025 tanba governu lakoi akontesimentu iha Asian Games China mosu tan.

Nia informa tan, bainhira Federasaun sira la adere ba federasaun internasional komite olimpiku labele foti sira sai membru no sira la bele partisipa jogu internasional, tan ida ne’e governu presiza halo koordenasaun diak ho federasaun boxe nian para labele prejudika atleta sira ba jogu Sea Games 2025, ba Federasaun taekwondo mos sei problema internal maibe governu sei halo koordenasaun diak mos para labele prejudika atleta sir aba jogu Sea Games 2025.

Nelyo salienta tan, federasaun sira seluk mos iha oportunidade partisipa jogu Sea Games 2025 maibe governu presiza hare’e nia andamentu federasaun tanba federasaun barak daudaun ne’e la iha atividade desportivu no fo mos oportunidade ba federasaun sira atleta durante ne’e hala’o treinamnetu iha iha rai liur karik atleta ne’e kualifikadu maibe tenki aprezenta sira atividade ba governu hodi hare’e para bele deside nia iha oportunidade ba kompete.

Iha sorin seluk, prezidente CDTL Macario F. Sanches hatete, proposta CDTL hato’o ba governu federasaun sanulu resin, CDTL iha opsaun rua, federasaun prioridade lima no federasaun sira seluk.

“Iha proposta ita hato’o ba governu federasaun sanulu resin, ita fo opsaun rua, federasaun prioridade lima no federasaun sira seluk, modalidade prioridade lima mak Federasaun Boxe Amadora Timor-Leste (FBATL), Federasaun Atletizmu (FTA), Federasaun Karate-Do Timor-(Leste FEKATIL) Federasaun Taekwondo Timor-Leste (FTTL) no Federasaun Futebol Timor-Leste (FFTL) fundamenta ho dadus, nune’e governu konkorda ba ho federasaun lima ne’e kompete Sea Games 2025” tenik Macario.

Prezidente dehan tan, faze preparasaun atleta sira kompete Sea Games 2025, kada federasaun sira ne’e sei aprezenta lista naruk atleta potensial sira liu husi kampionatu nasional tama iha preparasaun faze dahuluk hahu husi fulan maiu to’o jullu, depois kada federasaun sira halo selesaun fali ba atleta sira, nune’e tama preparasaun faze daruak nian hahu iha fulan Setembru to’o fulan dezembru antes deslokasaun ba Tailandia.

Nia afirma tan, Konfederasaun ho governu hakarak halo selesaun ba atleta sira husi federasaun kompete Sea Games 2025 fazeadamente tanba hakarak atleta sira prepara tekniku, fiziku no metal diak tanba Timor-leste tenki ba Prestasaun Timor-Leste presiza hetan medalla, nune’e ezizi ba federasaun sira halo selesaun ba atleta sira rigorozu oituan.

Macario afirma tan, iha tinan ne’e governu hakarak atleta sira kompete fo orgullu ba Timor-Leste hodi hetan medalla osan mean iha Sea Games 2025 iha Tailandia, konfederasaun ho governu mos la taka dalan ba federasaun sira ne’ebe hetan finanseiru husi sira nia federasaun internasional atu partisipa Sea Games 2025 iha Tailandia maibe labele halula hato’o informasaun ba konfederasaun ho governu

Reportajen: Augusto dos Santos