MJDAC Sei Aloka $200.000 Ba Publisidade Jogu CPLP 2025
Imajem : Enkontru preparasaun ba jogu CPLP kona-ba publikasaun no media iha CCD, 20/03/2025
SAPNewsTL, Dili : IX governu liu husi Ministeriu Juventude Desportu Arte Kultura (sigla portuges MJDAC) sei aloka orsamentu 200 mil ba publisidade jogu Comunidade das Paises de Lingua Portuguesa (CPLP) 2025 iha Timor-Leste.
“Ohin ami enkontru ho prezidente RTTL, EP ko’alia pubkalisaun media nian ba jogu CPLP, ita presiza media ida sei sai host hodi servisu hamutuk media hotu para fornese informasaun jogu CPLP ba publiku iha rai laran no liur, orsamentu ba publisidade jogu CPLP inklui ba media sira, governu liu MJDAC sei aloka 200.000.00 USD”, dehan Koordenador Jeral Jogu CPLP 2025 Jorge Soares Cristovão ba jornalista sira iha Centro Conveçoes Dili (CDD) Merkadu Lama, Dili kinta (20/03/2025).
Koordenador hatutan, ba RTTL, EP governu sei apoiu orsamentu ho montante 50.000.00 USD ba host (Broadcasting) nian husi jogu abertura to’o final ba modalidade sia inklui jogu paralimpiku iha jogu CPLP 2025.
Iha fatin hanesan, Prezidente RTTL, EP Elizeu Isaac Veloso hatete, sira halo reuniaun komisaun organizador jogu CPLP 2025 ko’alia media oinsa sai broadcasting ba jogu ne’e.
“Ohin ami mai halo reuniaun ho parte sekretariadu jogu CPLP nian koalia kona ba parte media nian oinsa sai broadcasting ba jogu CPLP hodi fo sai ba povu Timor-Leste ho nasaun sira iha CPLP no Azia nian”, Prezidente RTTL, EP dehan
Prezidente informa tan, sira koalia oinsa fo sai output ba media privadu sira halo notisia ba jogu CPLP maibe sira sei hein desizaun husi komisaun organizador jogu CPLP sai host ba jogu CPLP nian.
Entretantu, jogu CPLP 2025 sei realiza iha Timor-Leste iha fulan Jullu sei partisipa husi nasaun sia, Timor-Leste, Portugal, Brazil, Guine Bissau, Moçambique, Angola, Cabo Verde São Tome e Principe no Guine Equatorial.
Jornalista : Augusto dos Santos
