Mojtaba Eleitu Sai Líder Iran, Trump : “Nia Sei La Dura Kleur”.”

Imajem : Espesial

SAPNewsTL, Internasionál : Hafoin falesimentu Lider Supremu Ali Khamenei, Iran eleje Mojtaba Khamenei sai lider supremu foun hodi subtitui nia aman, sinal katak grupu linha dura iha nasaun ne’e kontinua kaer nafatin poder, enkuantu bainhira funu entre EUA no Israel hasoru Iran ne’ebé laot hahú semana ida, halo folin mina sae liu $100 kada barril.

Mojtaba, hanesan lider relijiozu ida ne’ebé iha influénsia boot iha forsa seguransa Iran no rede negósiu barak ne’ebé liga ba nia aman, konsidera ona hanesan kandidatu prinsipal antes votasaun iha loron Domingu husi Assembleia dos Peritos, korpu ida ho lider relijiozu hamutuk 88 maka responsavel hili substituisaun ba Ali Khamenei.

Iha deklarasaun ida ne’ebé sai hafoin meia-noite iha Teerã, Assembleia anunsia katak “Ho votu determinante, Assembleia dos Peritos nomeia Ayatollah Seyyed Mojtaba Hosseini Khamenei hanesan Lider Datoluk ba sistema sagradu República Islámika Iran.” Sita Reuters, 09/03/2026.

Pozisaun ne’e fó poder ba Mojtaba atu foti desizaun final iha asuntu estadu hotu-hotu iha República Islámika. Nomeasaun Mojtaba bele halo Prezidente EUA Donald Trump la kontente.

Iha Domingu, Trump dehan Washington tenke iha voz iha prosesu hili lider foun.
“Karik nia la hetan aprovasaun husi ami, nia sei la dura kleur,” Trump dehan ba ABC News.

Antes anúnsiu lider foun, Israel mos ameasa atu ataka ema ida ne’ebé hili ba lider. Hafoin nomeasaun sai, Trump la fó komentáriu barak, dehan deit: “Ita sei haree saida mak sei akontese.”

Nia mos dehan katak remata funu tenke sai desizaun hamutuk ho primeiru-ministu Israel Benjamin Netanyahu.

Enkuantu, Lider supremu Ali Khamenei mate iha atake ida husi EUA no Israel ne’ebé akontese iha semana kotuk.

Funsionáriu EUA sai husi rejiaun

Governu Washington iha Domingu ordena funsionáriu embaixada EUA ne’ebe iha Arábia Saudita sai, tanba situasaun seguransa.

Militár EUA mos relata katak soldadu amerikanu ida mate tan, nune’e aumenta ba na’in 7, hafoin kontra-ataka Iran iha semana liubá.

Tuir embaixadór Iran iha ONU informa katak Atake EUA no Israel hasoru Iran halakon ema sivil hamutuk 1.332 nia vida no halo ema rihun barak sofre kanek.

Folin Mina Sa’e Iha Merkadu Internasional

Funu ne’ebé sei expanda, halo merkadu mina iha mundu mos hetan impaktu tanba folin mina hahú sa’e.

Mina EUA sa’e ba 20% iha merkadu, loron Segunda, nivel aas liu desde Jullu 2022. Mina Brent mos sa’e 17% to’o $108.73 kada barril, hafoin semana liubá mós sa’e to’o 28%.

Trump dehan iha rede sosial katak folin mina sei tuun lalais bainhira ameasa nukleár Iran remata. Nia dehan mos katak folin ne’ebé sa’e agora mak “presu ki’ik ida atu garante seguransa no dame ba EUA no mundu.”

Forsa Armada Iran Jura Fidelidade

Media estadu Iran relata katak lideransa forsa armada Iran jura fidelidade ba Mojtaba Khamenei, no Islamic Revolutionary Guard Corps (IRGC) mós dehan sira prontu atu obedese lider foun ninia orientasaun.

Xefe seguransa Iran Ali Larijani dehan Assembleia dos Peritos hala’o votasaun iha Domingu maski iha ameasa atake.
Nia mos dehan Mojtaba bele lidera nasaun iha situasaun sensivel agora no bolu povu atu unidu ho lider foun.

Atake & Kontra-ataka Iha Rejiaun

Iran halo atake ba alvu sira iha rejiaun hanesan resposta ba atake EUA no Israel. Departamentu Estadu EUA ordena funsionáriu governu ne’ebé iha Arábia Saudita atu sai, hafoin drone ida danifika embaixada EUA iha Riyadh.

Ministériu Defeza Arábia Saudita dehan sira tiru-down drone ida ne’ebé tenta ataka zona diplomátika iha parte sidade oeste.

EUA mos reduz staf embaixada iha Qatar, Kuwait, Jordania no Bahrain desde funu hahú.

Israel kontinua ataka lider militár Iran. Entre sira ne’ebé mate iha atake Sabadu mak Abolqasem Babaian, xefe foun eskritóriu militár ba lider supremu.

“Faze foun perigózu”

Iha Domingu, loron sia ba kampaña militár EUA-Israel, rezidente iha Teerã dehan sira haree fumaça metan boot iha lalehan depois atake ba depósitu mina.

Porta-voz ministériu relasaun estranjeiru Iran, Esmaeil Baghaei, dehan atake boot ne’e marka “faze foun ne’ebé perigózu” iha konflitu no konsidera hanesan krime funu.

Porta-voz militár Israel, Tenente Coronel Nadav Shoshani, dehan depósitu mina sira ne’e uza atu sustenta esforsu funu Iran, inklui produsaun materiál ba misil balístiku, nune’e konsidera hanesan alvu militár legal.

Primeiru-ministu Israel Benjamin Netanyahu dehan governu Israel sei kontinua ofensiva ne’e no ataka lider Iran, “laiha misericórdia.”

“Ita iha planu organizadu ho surpriza barak atu destabiliza rezime no permite mudansa,” nia dehan iha video deklarasaun.

Fontes : BBC News, Reuters & AFP
#iran #israel #eua #peace