Molok Realiza Expo & Selebra Loron Juventude, Lia Na’in Sira Loke Ho Serimómia Kultural

Imajem : Serimómia kultural iha Rabilau, Maubisse, 11/08/2025

SAPNewsTL, Ainaro : Molok hala’o expozisaun no selebra loron mundial juventude iha Rabilau, lian na’in sira halo tuir kultura no loke eventu ho hanoin promove fatin turístiku no produtu sira iha area rural ho susesu.

Marciana da Conceição – SAPNewsTL

Xefe Suku Wilson Nivio Maria Pereira Mendonça agradese ba OXFAM no Alumni Parlamentu Foinsa’e Timor-Leste – APFTL ne’ebe servisu hamutuk no hili Rabilau sai fatin ba expo hodi konvida ema ba vizita.

“Agradese ba parte hotu ne’ebe hili ona Rabilau sai fatin ba hala’o atividade interkámbiu, imi nia prezensa sai parte ida ne’ebe bele apoia ami hodi hadia diak liutan sitiu turistiku Rabilau ba iha futuru”.

“Imi-nia prezensa sai hanesan parte ida ne’ebe bele kontribui hanoin ruma ne’ebe bele husik hela iha fatin ida ne’e, nune’e ami komunidade iha Maubisse no Rabilau hato’o ba Governu hodi servisu hamutuk atu hadia diak liutan sitiu turístiku Rabilau”. Hateten Xefe Suku Wilson Nivio Maria Pereira Mendonça iha Rabilau, 11/08/2025

Xefe Suku Wilson Nivio Maria Pereira Mendonça sente kontente ho atividade ne’e tanba liu hosi programa ne’e bele dezenvolve munisípiu Ainaro postu Maubisse liuliu iha area turistiku sira.

“Ami simu imi ho kontente, espera katak atividade sira hanesan ne’e kontinua realiza iha fatin ida ne’e, nune’e ita hotu bele kontribui hodi hadia ita nia rai liu husi buat kiik (asaun) sira ne’ebe ita hahu halo, ida ne’e bele motiva ita-nia juventude sira liu-liu juventude kreativu sira ne’ebe mai ho inisiativa diak no bele hamosu inovasaun oioin”. Nia sublinha

Membru APFTL Deviana Sarmento deklara hili Rabilau tanba Rabilau fatin potensial ne’ebe presiza promove, husi fatin ne’e mós hodi komemora loron mundial juventude liu hosi programa expozisaun ba grupu juventude produtivu sira.

“Hili fatin ne’e tanba ita hateke fatin ne’e hanesan fatin potensial hodi kontinua promove laos deit iha munisípiu maibe ita hakarak promove ba mundu katak ita moos iha fatin ne’ebe furak”.

“Ita mos selebra loron juventude mundiál iha ne’ebe mundu hotu-hotu selebra iha loron aban (12/08), ita mos sei iha atividade barak ne’ebe sei realiza iha loron aban, Agradese ba lisan husu fatin ne’e, Lia nain, komunidade ne’ebe simu ona ami iha fatin ida ne’e hodi ita bele realiza ita-nia atividade”.

“Atividade ne’e ita nian maske ita mai husi munisípiu ne’ebe diferente, maibe agora iha ne’e ita Maubisse oan. Espera liu husi seremonia ida ne’e ita bele hetan matak malirin, nune’e ita-nia atividade bele la’o ho diak”. Deviana sublinha

Jestor ba Peskija no Influensia OXFAM Adilson da Costa Junior afirma presiza promove no diversifika fatin no produtu potensial ne’ebe iha hodi hadia rendimentu komunidade iha area rural.

“Ami hanoin katak ita tenke kontinua diversifika potensia ne’ebe ita iha, hanesan parte ida ne’ebe bele promove ita nia potensia turistiku no poténsia agrikultor iha Maubisse liu-liu iha Rabilau”.

“Parese ema barak hatene maibe iha ema barak moos seidauk hatene saida maka Rabilau iha, ita rona deit maibe bainhira mai direita ita bele sente no haree Rabilau iha nia úniku, iha potensia turistiku komunitáriu ne’ebe maka ba oin sei bele dezenvolve diak liu tan”.

Eventu ne’e moos sai oportunidade ida atu bele ajuda komunidade, agrikultor no joven sira atu kontinua promove katak Timor mos iha potensia oioin laos deit iha Tutuala, Atauro no iha munisípiu sira seluk.

Loron 12 nu’udar loron juventude mundiál mundu tomak selebra, nune’e “ita uza oportunidade ida ne’e atu kria espasu hodi organiza dialogu entre joven kreativu, foinsa’e agrikultor katak ita laos kria problema deit maibe ita iha potensia no koñesimentu ne’ebe bele fahe ho politiku na’in no governante sira”. Nia dehan

Entretantu, atividade ne’e partisipa husi reprezentante membru guvernu ne’ebe sei aprezenta sira-nia programa no halo dialogu ho komunidade, grupu produtivu no foinsa’e sira. Atividade ne’e realiza husi APFTL ne’ebe servisu hamutuk ho OXFAM, AJTL, Tilofe, MDI no maluk foinsa’e agrikultor sira ne’ebe mai husi husi munisípiu 12.