MOP & SEATOU Hala’o Alargamentu Estrada ! Komunidade Fatuhada Koopera & Hein Indemnizasaun
Imajem : Komunidade afetadu Baptista Jerónimo ko’alia jornalista SAPNews iha aldeia 04 Fatuhada,23/04/2025.
SAPNewsTL, Dili : Governu liu husi Sekretariu Estadu Assuntu Toponomia no Organuizasaun Urbanu {SEATOU} Jermanu Santa Dias Brites hamutuk ho Ministéiru Obras Públikas {MOP} Samuel Marçal ho ekipa konjunta hala’o alargamentu estrada husi Fatuhada ba Hudi-Laran hodi sobu uma kain hamutuk 15.
Komunidade afetadu suku Fatuhada aldeia 04, Baptista Jerónimo haktuir nia parte kopera ho estadu hodi halo alargamentu estrada tanba estadu hakarak halo dezenvolvimentu .
“Ami koopera hamutuk IX governu kona-ba alargamentu estrada, laiha ida mak interven no asaun atu hasoru estadu, ami apoiu 100% ba dezenvolvimentu ne’ebe atu hala’o iha nia teritoriu tomak.”Dehan Komunidade afetadu Baptista Jerónimo ba jornalista SAPNews iha aldeia 04 Fatuhada,23/04/2025.
Baptista hatutan, “Ami halo dialogu iha loron 18 fulan Marsu, maibe ami seidauk asina akordu ruma, dialogu ne’e ko’alia kona ba aseitasaun asina tiha hotu depois maka sobu maibe estadu nia akuzasaun barak mai ho urjenti sobu tiha depois semana oin maka asina no ami foti ami nia direitu.”Teni nia
Imajem : SEATOU & MOP hala’o alargamentu estrada iha Fatuhada,Dili.
Nia konta, komunidade afetadu sira hela iha fatin refere desde tinan 1999 to’o ohin loron maibe dezenvolvimentu la la’o tanba ne’e husu governu hodi halo dezenvolvimentu ho diak no lais.
“Desde inisiu funu ne’e mosu, ami hela ona iha ne’e to’o ohin loron laos dehan ukun an 1999 ami foin mai hela iha ne’e lae, ami ne’e moris nanis iha ne’e. Ita ukun an tinan naruk buat ne’ebe sei dauk iha mak dezenvolvimentu, tan ne’e husu ba governu agora tenki servisu ho diak atu bele hadia ita nia nasaun ne’e sai furak”.
Ligadu ho indemnizasaun antes ne’e komunidade ho SEATOU no MOP halo ona dialogu maibe sira seidauk asina deklarasaun, nune’e sira sei hein hodi simu osan indemnizaun.
“Komunidade la ezije governu atu fo indemnizasaun, governu iha fuan no konsidera komunidade sira fo ami simu maibe atu ba husu tuir ami sei la ba husu ba governu ou SEATOU”
“Dezenvolvimentu atu ita nia nasaun ne’e sai diak no furak prezisa ita nia serbisu hamutuk, ami komunidade iha ne’e hamutuk uma kain 15 prontu koopera”.
Enkuantu, alargamentu estrada ne’e kona rai privadu komunidade nian hamutuk metru 7 husi estrada, nune’e komunidade uma kain 15 hamamuk ona uma hela fatin iha suku Fatuhada aldeia 04 Postu Administrativu Dom Aleixo,Munisipiu Dili.
Jornalista : Ermelinda Soares
