Mosu Dezintendimentu, Aitana Impata Kontra Assalam Ho Skore 2-2
Imajen: Jogador Aitana FC Hadau malu bola ho jogador Asslaam FC iha Estadium Munisipal Dili sesta 10/03/2023
SAPNewsTL, Dili: Aitana FC impata kontra Assalam FC ho skore 2-2 iha jornada datoluk Liga Timorense epoka 2023 ne’ebe ho rezultadu ne’e ekipa rua fahe pontu ida-ida ba malu.
Joga Aitana FC kontra Assalam FC hala’o iha Estadium Munisipal Dili sesta 10/03/2023
Iha jogu parte dahuluk bainhira kick off ekipa Aitana FC halo inisiativa hodi halo presaun ba Assalam FC hodi halo ameansa ba baliza no Assalam FC halo jogu liu husi kontra atake ba adversariu mos ne’ebe hetan oportunidade ameansa baliza Aitana FC nian ne’ebe tama minutu 11 jogador Herminio Moniz marka golu halo redi Assalam nakdoko hodi hatuur skore 1-0.
Rezultadu ne’e halo ekipa rua nia jogu ritmu komesa ass ne’ebe tama minutu 20 Asslaam FC responde kedas golu Aitana FC nian husi jogador Joviano Braz husi suta penalidade hodi hatuur fila fali skore ba 1-1, rezultadu ida ne’e halo ekipa nia jogu manas liu tan tanba sira halo presaun makaas ba malu para aumenta tan golu maibe to’o minutu 45 remata la iha jogador ida husi ekipa rua aumenta golu ne’ebe skore mantein 1-1.
Depois jogu minutu 45 remata mosu dezintendimentu iha Estadium Munisipal Dili, tan prezidente Aitana FC halo protestu no jogador sira tenta atu halo agresaun fiziku hasoru arbitrajen prinsipal ne’ebe dirije jogu ne’e, tanba la satisfaz desizaun arbitrajen iha kampu laran, tan Aitana FC konsidera bola kona jogador Assalam FC nia liman iha area penalidade nian maibe arbitrajen la fo suta penalidade ba ekipa Aitana FC ne’ebe ho dezintendimentu, nune’e parte LFTL no diresaun arbitrajen bolu prezidente, treinador no kapitaun husi ekipa rezolve ba dezenvolvimentu ne’ebe mosu ne’e, sira rezolve kuaze oras ida nia laran ikus mai jogu hala’o fila fali.
Kontinua jogu parte daruak nian ekipa rua nafatin halo presaun ba malu liu jogador sira pasa bola ain ba ain hodi aumenta tan golu para hetan vitoria ne’e tama minutu 51 Assalam FC aumenta tan golu ida husi jogador Elias Mesquita hodi muda fali skore ba 2-1, maibe skore refere la kleur Aitana FC responde kedas hodi aumenta tan golu ida iha minutu 58 husi jogador Miguel Araújo hodi muda fila fali skore ba 2-2.
Skore refere ekipa rua halo nafatin presaun ba malu tanba ambisaun hakarak manan jogu maibe ho Estadium Munisipal Dili nia fasilidade menus, la iha lampu rai nakukun entaun minutu 90 seidauk remata sei iha hela minutu 8 ekipa rua tenki halo koordansia hodi remata jogu ho skore 2-2 hodi fahe pontu ida-ida tanba kauza husi dezenvolvimentu klube Aitana FC hasoru arbitrajen ne’ebe demora tempu halo jogu to’o kalan mos seidauk remata ekipa rua foti desizaun hamutuk simu rezultadu impata 2-2.
Depois jogu remata treinador Assalam FC Gaspar Soares Amaral dehan, rezultadu mak hanesan maski mosu dezenvolvimentu entre Aitana FC hasoru arbitrajen maibe ne’e no nia agradese ba nia jogador sira ne’e sira simu ho liman rua
“Rezultadu jogu mak hanesan hau agradese ba hau jogador sira, iha joga parte dahuluk, ohin jogu furak tebes maski hau senti susar tebes tanba adversariu halo presaun makaas maibe hau konsege rezolve iha jogu parte daruak ne’ebe rezultadu ami simu ho liman rua maski iha dezenvolvimentu entre Aitana FC hasoru arbitrajen maibe iha futebol ne’e normal”, tenik Gaspar
Gaspar hatutan, Sira jogador sira hetan oportunidade barak maibe la konsege marka golu, ida ne’e nia dehan ba jogador sira iha treinu laran labele halimar bainhira halimar nia rezultadu mak hanesan ne’e maibe jogu tuir sei hadia diak liu tan hasoru ekipa sira seluk.
Iha sorin seluk, treinador Aitana FC Jose Fonseca dehan, rezultadu ne’e nia apresia tebes ba nia jogador sira tanba sira halo duni tuir saida mak sira treinu ne’e
“Rezultadu jogu ohin ne’e ha’u apresia ba jogador sira tanba saida mak ami halo iha treinu ohin konsege sai duni, ne’ebe sai hanesan lisaun importante ba jogu tuir mai”, Jose hateten
Jose akresenta, ba parte tekniku iha kampu laran senti triste oituan tanba depois jogu parte dahuluk minutu 45 remata mosu dezintendimentu hasoru arbitrajen ne’ebe jogador konsege deskansa 45 minutu hein desizaun komisaun hotu rezolve dezintendimentu ne’e maibe tama fali ba parte daruak nian rezultadu ikus impata
Entretantu iha jogu ne’e Assalam FC halo substituisaun ba jogador nain tolu, Aitana FC halo substituisaun ba jogador nain lima, jogador Assalam FC Elias Mesquita hetan kartaun kinur iha minutu 24 no Jogador Helder Valente hetan kartaun kinur iha minutu 13, Rigeberd Lay iha minutu 24, Franselino Belo iha minutu 45+2 no Osvaldo Brites iha minutu 42+2.
Reportajen: Augusto dos Santos