Naimori Oferese Kalen & Kadeira Ba Waimori La Ho Intensaun Polítika
Imajem : Konselleiru Partido KHUNTO José dos Santos Naimori Bucar apoia kadeira no kalen ba Suku Waimori iha Ossu, 23/08/2025
SAPNewsTL, Viqueque : Konselleiru Masimu Partidu Kmanek Haburas Unidade Nasional timoroan (KHUNTO), José dos Santos Naimori Bukar hamutuk ho Presidente Partidu KHUNTO Armanda Berta, entrega kadeira atus rua (200) no kalen atus rua (200) ba komunidade Suku Waimori Tula.
Vincencius Morais & Daniel da Silva – SAP News TL
Hafoin entrega sasan ne’e, Konselleiru masimu KHUNTO Naimori Bukar hateten, apoiu hirak ne’ebe nia parte oferese la’ós atu husu votu, maibé nu’udar solidariedade ba povu ne’ebe presiza no falta ajuda.
“Ha’u husu ba autoridade lokal sira simu kadeira no kalen atu kuidadu hodi uza ba nesesidade suku, tanba KHUNTO fó kadeira no kalen la’ós husu imi-nia votu, maibé nu’udar timoroan, bainhira suku presiza, ami tenki apoiu tuir nesesidade ne’ebé ami iha”.Dehan Konselleiru KHUNTO Naimori Bukar, Iha Suku Uaimori Tula, Sabadu (23/08/2025)
Lider masimu Partidu KHUNTO subliña tan katak, apoiu ne’ebe nia parte oferese ba suku la’os atu kasa povu nia votu maibé, nu’udar lider partidu no timoroan ida responde ba kestaun ne’ebe suku entrenta tuir kbi’it.
Iha fatin hanesan, Xefe Suku Waimori Tula agradese ba lideransa KHUNTO ne’ebé bele oferese kadeira no kalen ba suku Waimori Tula, nune’e bele fasilita komunidade utiliza iha tempu enkontru nivel suku.
“Ha’u fó obrigadu no agradese tanba Partidu KHUNTO bele oferese kadeira no kalen mai ami-nia suku, nune’e ami bele uza ba nesesidade suku nian liliu ba lia moris no mate”.
Xefe Suku hatutan, nu’udar autoridade lokal, nia nakloke no fo oportunidade ba partidu politiku hotu-hotu atu mai hala’o atividade no ko’alia kona-ba programa ida-idak nian.
“Ha’u sempre fo oportunidade ba kualkér partidu atu mai iha ami nia suku Wemori hodi ko’alia nia programa, tamba nasaun iha demokrasia”.
Serimomia entrega ne’e iha ámbitu reajustamentu estrutura no tomada de pose ba estrutura Partidu KHUNTO iha Suku Wemori, postu administrativu Ossu, munisípiu Viqueque.