Juventude Alas Fuan Dodok, Governu Hapara Konstrusaun Estrada We Daudere-Alas
![](https://sapnewstl.com/wp-content/uploads/2024/07/IMG-20240724-WA00212.jpg)
Imajem : Juventude & Estudante Postu Alas Hala’o Komunikadu Imprensa kontra desizaun governu hapara konstrusaun estrada Wedeberek, iha Jardim 5 Maiu Kolmera, 24/07/2024
SAPNewsTL, Dili – Relasiona ho Ministériu Obras Públika (MOP) Samuel Marcal ne’ebe kansela projetu konstrusaun estrada We daudere-Alas iha Munisipiu Manufahi, komunidade lamenta no husu hodi hadia infraestrutura iha area rural no remotas.
Komunidade We Daudere-Alas Robenciano Fernandes hateten, atu hadia ekonomia familia governu sentral tenke responsabiliza hodi hadia infraestrutura iha area rural no remotas hodi bele fasilita komunidade nia movimentasaun.
“Atu responde ba hadia ekonomia familia governu sentral nia responsabilidade tenke hadia infraestrutura sira iha area rural no remotas sira hodi bele fasilita movimentasaun komunidade ba merkadu hodi fasilita hadia sira nia vida ekonomia no nesesidade loron-loron”. Dehan portavos Robenciano Fernandes ba jornalista sira Liu husi komunikadu imprensa iha Jadin 05 Maio Kolmera, Kuarta (24/07/2024).
Robenciano Fernandes salienta, Timor ukun aan durante tinan-22, iha ne’ebe forma ona governasaun ba dala-9 maibe komunidade Alas sei halerik ba dezenvolvimentu infraestrutura ne’ebe prinsipal tebes hodi fasilita movimentasaun.
“Hahú husi ita ukun aan ne’ebe kompleta ona tinan ruanulu resin-rua 22, ohin loron to’o ona governasaun ba dala sia (9), maibe povu sira liuliu komunidade Alas sei halerik nafatin ba Dezenvolvimentu infraestrutra estrada”. Hateten Robenciano.
Portavos ne’e mos hateten, iha loron 14 Fulan junhu tinan ne’e governu liu husi Ministru Obras Publiku (MOP), hamutuk ho autoridade Munisipiu Manufahi, Postu administrativu Alas, veteranu, igreza, lia nain kultural no komunidade husi Posto Administrativo Alas halo ona serimonia lansamento Primeira Pedra ba Projeto Estrada We Dauberek-Alas.
“Iha loron 14 fulan Junho 2024, Governu liu husi Ministro Obras Publiku hamutuk ho Autoridade Munisipiu Manufahi, Autoridade Posto Administrativo Alas, Veteranos, Igreja, lia nain kultura no komunidade husi Postu Administrativo Alas halo ona serimonia lansamentu primeira pedra ba projetu Estrada We Daudere-Alas, haksolok ne’ebe povu Alas hein to’o mai ona, moris kmanek ne’ebe povo alas hakarak mosu mai ona, matawe’en, halerik no harohan tinan naruk nian iha ona resposta, maibe governu halo fali intervensaun hodi hapara”. Nia deklara.
Juventude husi We Daudere-Alas, Munisipiu Manufahi Postu Administrativu Alas, infelizmente ho informasaun ne’ebe fó sai iha media sosial pajina Xanana ba Ema hotu no mídia Hatutan ne’ebe informa katak governu liu husi Ministeriu Obras Publikas kansela projetu Alas.
“Maibe infelizmente iha semana ida ne’e nia laran povu Alas senti fuan no laran dodok tebes ho informasaun ne’ebe fo sai liu husi media sosial pagina Xanana Ba Ema hotu no mídia HATUTAN katak projetu konstrusaun estrada Alas kansela, iha ne’ebe informasaun ne’e rasik fo sai husi Ministru Obras Públiku katak, iha grupu Alas oan balun ne’ebe uza naran Veteranu hodi ba hasoru Exelensia Primeiru Ministru atu bele kansela estrada”.
Juventude no estudante husi postu administrativu Alas hato’o sira nia ejizénsia ba IX guvernu ne’ebe lidera husi Kayrala Xanana Gusmão atu dada fila orientasaun ne’ebe fó ba Ministru Obras Públiku hodi hapara projetu estrada Wedauberes Alas.
“Ami Juventude no Estudante sira husi Postu Alas husu ba IX governu konstitusional ne’ebe lideradu husi maun boot Kayrala Xanana Gusmão, atu dada fila orientasaun ne’ebe fo ona ba Ministru Obras Publiku hodi hapara projetu estrada We Daudere-Alas”.
Juventude sira ne’e mos husu atu Ministériu Obras Públikas, buka solusaun urjentemente hodi rezolve problema refere, tamba kansela projetu estrada la’os solusaun ne’ebe komunidade Alas hein no hakarak.
“Ami husu ba Ministeriu Obras Públikas, atu buka solusaun urgentemente hodi resolve problema refere, tanba kansela projetu estrada We Daudere- Alas laos solusaun ne’ebe komunidade Alas hein no hakarak”. Nia husu
Porta voz ne’e mos husu prezidente autoridade munisipiu no administrador postu Alas hodi halo audiésia ho Primeiru Ministru no MOP hodi labele hapara projetu estrada diresaun WedauderekAlas..
“Ami husu ba presidente autoridade Munisipiu no Administrador postu Alas atu hala’o audiensia urzentimente ho Sua Exelénsia PM no MOP hodi labele hapara projetu estrada we daudere Alas, tanba ami estudante no juventude Alas tomak la satisfas ho desizaun kanselamentu ne’e”.Nia hakotu
Entretantu, antes ne’e MOP Samuel Marçal haktuir nia parte laiha ona tempu atu rezolve problema.
“Governu laiha tempu atu rezolve problema”. MOP Sameul Marçal deklara antes
Estrada Alas Wedeberek ho 23 kilómetru hala’o ona lansamentu iha loron 14 Fulan Junhu 2024 ho orsamentu total $13.8 Millões husi MOP, Autoriedade Munisipiu Manufahi, komuniadade no Veteranu sira.
Tuir informasaun ne’ebe SAPNews asesu antes ne’e nota katak projetu refere hapara tanba hetan intervensaun husi individu balun ne’ebe lori naran veteranu nian.
Enkuantu, Populasaun Alas ne’ebe atu asesu ba estrada refere hamutuk rihun sanulu resin ida (11.000).
Jornalista : Ermelinda Soares & Marciana Fernandes