Natál & Tinan 2025 ! La’os De’it Hatais Foun, Maibé Hafoun Laran Ho Hahalok Di’ak
Imajem : Bispu Dom Leandro Maria Alves iha Manatutu, 14/12/2024. Foto : Daniel Soares
SAPNewsTL, Manatutu : Iha ambitu selebra natál no tinan foun 2025, Bispu Dioseze Baucau Dom Leandro Maria Alves husu ba sarani sira hadia an, la’os de’it hatais foun maibé laran moos hodi simu kosok oan Jesus ne’ebé lori klosok, domin, no paz.
“Natal ne’e festa sarani nian, festa ne’ebé Na’i Maromak nia domin bo’ot tebes mai horik iha ita le’et, ne’e duni ba sarani sira hotu prepara ita nia an diak atu bele selebra festa natal ida ne’e”.
“Atu tama ba tinan foun ita Nai Jesus kristu mai moris iha ita ida-idak nia fuan, lori klosok, domin no paz hodi selebra tinan foun ho hahalok agradesimentu katak hahalok hahi nian, hahi Maromak ba prezente ne’ebé maka ita simu, ne’e maka Na’i Maromak rasik”. Dehan Bispu Dioseze Baukau Dom Leandro Maria Alves nebe partisipa misa Nova iha Parokia Santo António Manatutu, Sesta, 14/12/2024.
Bispu Dom Leandro salienta, natál lori moris foun no moris di’ak ba sarani sira, atu nune’e iha tinan foun 2025 sai kmanek no furak hodi bele haree Nai Maromak nia reinu.
“Natál ida ne’e atu lori ita ba moris foun no moris diak hanesan sarani iha tinan foun, nune’e tama ba tinan foun 2025 sai kmanek no furak liu tan, halo ita bele haree Nai Maromak nia reinu hahu kedas iha momentu sira hanesan ne’e”.
Dom Leandro dehan festa la’os deit buka hatais foun maibe haree mós ida-idak laran laran hodi hatudu presenza Maromak nian iha mundu.
“La’os deit festa ho ita nia hatais foun maibe haree parte laran ka fuan, prepara ita nia fuan hodi simu ita nia nai Jesus kristu ne’ebé hatudu Nai Maromak nia prezensa no hadomi tebes ita hodi mai moris iha ita idak-idak nia laran”. Nia hatutan.
Dom Leandro husu atu sarani sira lori Maromak ba nia maluk sira, hatudu karakter di’ak tuir Nai nia hahalok domin no buka hodi hases an hosi hahalok violentu.
“Atu ita Nai Maromak moris ita fuan buka atu lori Maromak ba ita nia maluk sira, hatudu ita nia karakter di’ak tuir Na’i nia hahalok, hahalok domin, no damen iha sosiedade nia leet hodi koalia liafuan ne’ebe di’ak no haree malu diak, buka atu hases an hosi hahalok violentu sira”.
Dom Leandro konsidera prezépiu sai hanesan sinal festa ida ne’ebe hatudu nain Jezus mai iha ita leet, nu’udar mos sinal domin no fiar hosi sarani sira nian ba Nai Jezus.
“Prejepiu sai hanesan sinal ida ne’ebé hatudu katak festa ba ita nai jesus nia prezesa mai iha ita leet, hanesan sarani ne’ebe halo prezépiu ne’e sinal hodi espresa sira nia fiar no domin, nune’e ita tenke respeitu ba iha prezepiu sira ne’e. Prezepiu ne’e sinal hatudu ita nia kontente tanba Na’i Maromak mai ita nia le’et”.
“Joven sira tenke hatene ita nia an nu’udar ema sarani, wainhira ita hatene ita nia an katak ita ne’e se, ema ne’ebé maka ita nai Jesus Kristu rasik kria hosi nia illas, maske hasoru laloran no dezafiu oin-oin ne’ebe agora buras iha ita nia rain maibe ita kaer metin nafatin ba Nai nu’udar ita nia salvador”.
“Ita buka atu moris metin nafatin iha ita nia fiar, bainhira ita moris metin nafatin ita sei hetan salvasaun, salvasaun ne’e laos hetan iha rai deit maibe sei hetan mós iha lalehan. Ita fiar iha Na’i Jesus Kristu, buka atu hadomi Santa Kreda ne’ebe maka ita Na’i Jesus rasik kuda”. Nia teni
Imajem : Pe. Helio Castro Alves CMF
Iha soin seluk, Pe. Helio Castro Alves CMF hateten tempu natal no tinan foun laos deit muda hatais maibe muda mos hahalok ida-idak nian tanba Maromak presiza ema nia hahalok laos hatais.
“Festa natal laos atu muda deit ita nia tampilan (hatais) maibe muda mos ita nia karakter ka hahalok”. Dehan Pe. Helio Castro Alves CMF iha Parokia Ai-Mutin Dili,24/12/2024
Padre Selebrante ne’e husu atu sarani sira loke odamatan laran nian atu bele simu naroman no esperansa hosi Maromak.
“Natal mos fanun ita atu loke odamatan laran nian atu bele simu naroman no esperansa hosi Maromak nian”. Nia sublinha
Jornalista : Marciana da Conceição
