OJE 2025 Hamutuk Billiaun 2.6, PN Mak Sei Aprova

SAPNewsTL, Díli — Xefe Governu Kay Rala Xanana Gusmão aprezenta ba Prezidente Republika José Ramos Horta kona-ba Orsamentu Jeral Estadu (OJE) 2025 ne’ebe haruka ona ba Parlamentu Nasional (PN) ho montante billiaun $2.6.

Tuir Primeiru-Ministru (PM) Kay Rala Xanana Gusmão hateten, nia parte hato’o ona ba Prezidente Republika katak Orsamentu Jeral Estadu (OJE) 2025 nian haruka ona ba PN ho montante billiaun $2.6 ne’ebé lolos ne’e billaun $2.17 restu husi fundu seguransa sosial ho ninia reseita no més saldo ne’ebé iha RAEOA.

“Ohin, ha’u hato’o ona ba Prezidente Republika kona-ba Orsamentu Jeral Estadu (OJE) 2025 ne’ebe haruka ona ba Parlamentu Nasional (PN) ho montante billaun $2.6” Informa, PM Xanana Gusmão ba Jornalista sira, hafoin remata enkontru semanal ho Prezidenti Republika José Ramos Horta iha Palasiu Prezidensial Aitarak-laran, Kinta (03/10/2024).

Xefe Governu aprofunda, Orsamentu Jeral Estadu 2025 sa’e ba billaun $2.6 sei afeita ba fundu petrolíferu ka la’e nia parte seidauk bele responde, maibé sei hein diskusaun plenária iha uma fukun Parlamentu Nasional hodi halo kontrolu ba OJE 2025 nian.

“Agora, ha’u labele ko’alia depois diskusaun iha parlamentu mak haree to’ok, ita osan hira to’o hira, oin nusa, tamba kona-ba jestaun fundu petroliferu ninian hahu iha 2010 ami hadi’a, neneik, iha 2016 konsege hetan primeiru lugar iha Azia tomak, iha mundu kuartu lugar ne’e jestaun. Mais Governu foin daudauk ne’e mak iha ne’ebé ita buka la hetan,” Dehan Xanana.

Jestaun fundu petroliferu, Xanana rekonhese nia parte laos péritu kona-ba jestaun fundu petrolíferu, maibé nia mos komesa halo, agora nia labele dehan kedas ona, tuir diskusaun iha parlamentu bele informa ba públiku katak osan fundu petroliferu hira, tanba iha lei uluk hahu kedas 2010-2012 só bele hasai persentajen ida ne’e tenke iha aprovasaun husi parlamentu mais tenke hetan aprovasaun husi Parlamentu Nasionál.

Enkuantu, Xefe Governu mós informa ba Prezidente Repúblika kona-ba prezensa Timor-Leste nian ne’ebé sei partisipa iha ASEAN Summit iha nasaun Laos ne’ebé sei realiza iha loron ualu (08) fulan-Outubru.

Hafoin Prezidente Repúblika José Ramos Horta sei kontinua vizita ofisial ba Portugal iha loron 11 fulan-Outubru no ikus liu fila fali to’o iha Jakarta loron 19 fulan-Outubru, enkuantu iha loron 20 Fulan Outobru, Primeiru Ministru Kayrala Xanana Gusmão sei partisipa serimónia toma de pose ba novu membru Governu Indonesia nian.

Fo hanoin fali katak Governu entrega ona OJE 2025 ba Parlamentu Nasionál (PN) hodi prepara ba debate no halo aprovasaun iha tinan ne’e.

Jornalista : Guilhermino Ramos da Cruz