ONU Esklarese Ba Média Metas Dezenvolvimentu Sustentavel
SAPNewstl, Dili : Timor Leste ho Organizasaun Nasoes Unidas (ONU) no Ajensia ONU sira liu husi Media Interface halo sorumutu hamutuk ho media sira iha rai laran kona-ba Esklaresimentu Kooperasaun Nasoens Unidas ba Dezenvolvimentu Sustentavel iha Timor Leste.
Tuir Ofisial Komunikasaun Unicef António Gomes katak objektivu husi enkontru ne’e atu fahe informasaun ba jornalista sira kona-ba dezenvolvimentu sustentavél iha Timor Leste.
“Ohin sorumutu hamutuk ho media sira, ONU, Timor Leste ho ajensia ONU sira, ida ne’e kordena husi Grupu Komunikasaun iha ONU nian, enkontru ida ne’e ho objektivu atu ita oinsa bele fahe informasaun atu halo esklaresimentu kona-ba jornalista sira no metas Dezenvolvimentu Sustentavel iha Timor Leste hahú husi tinan 2015 to’o 2030”. Dehan Ofisial Komunikasaun Unicef Antonio Gomes ba jornalista iha salaun konferensia Kofi Anan, Caicoli, Sexta-Feira,19/08/2022).
Nia akresenta oinsa bele tulun ajensia sira hodi fahe informasaun sira kona-ba metas dezenvolvimentu sustentavel iha Timor-Leste.
“Ita foin hahú halo tanba ita haree katak papel media nian importante tebes, oinsa atu bele ajuda ita nia ONU no ajensia ONU sira iha Timor Leste atu kompartilla informasaun sira ne’ebé maka importante kona-ba Metas dezenvolvimentu sustentavel ninian iha Timor Leste”. Tenik nia.
Iha fatin hanesan kordenador kobertura Agensia Tatoli, Zejitu da Silva hateten hasoru malu ohin ho ajensia sira ne’e atu rona informasaun kona-ba material metas dezenvolvimentu sustentavél iha Timor Leste.
“Ohin mai partisipa aktividade hasoru malu ho ajensia ONU ho media sira iha Timor Leste hodi rona informasaun ka materia lubuk ida kona-ba objektivu dezenvolvimentu sustentavél iha Timor Leste, materia metas dezenvolvimentu sustentavel iha Timor Leste ne’e importante tebes ba ami Jornalista sira atu nune’e bele halo di’ak no servisu liu tan no oinsa maka objektivu dezenvolvimentu sustentavel no pontu saida maka iha laran no governu nia responsavél ba saida maka hatan ba problema sira no hanesan jornalista tenke komprende atu halo kobertura tenke tuir dalan”. Nia realsa
Zejitu hatutan nasaun ida atu atinji dezenvolvimentu sustentavel governu tenke iha komitmentu no servisu ho di’ak.
“Materia metas dezenvolvimentu sustentavel iha Timor Leste ne’e importante teb-tebes ba nasaun ida, nasaun ida atu atinji dezenvolvimentu sustentavel presiza asaun governativa por ezemplu programa prioridade sira iha parte rua mak importante primeiru estadu ida nian dever no moral maka nia tenke implementa planu estratejiku desenvolvimentu ne’ebe maka implementa iha 2015 too 2030, agora planu dezenvolvimentu hahú husi governu, kuandu governu laiha komitmentu ho di’ak no servisu ho di’ak ita sei la atinji objetivu metas dezenvolvimentu asustentavel iha ita nia rai ida ne’e. Nia informa
Kordenador ne’e hein katak governu iha komitmentu hamutuk ho parseiru sira hodi lori povu husi ki’ak ba moris di’ak.
“Espera katak governu ida ne’e tenke iha komitmentu hamutuk ho nia parseiru dezenvolvimentu nasional sira, sosiedade sivil no setor privadu sira atu dudu metas dezenvolvimentu sustentavel ne’e ba oin husi povu nia moris ki’ak ba moris di’ak atu nune’e iha dalan naruk to’o tinan 2030 kona-ba dezenvolvimentu sustentavel Timor Leste”. Nia hakotu
Jornalista : Esmeralda da silva & Marcela Mesquita Lemos
Editor: Luis dos Santos