Ordena Aquino Ba Na’i Lulik ! Dom Leandro : Maromak Nunka Husik Nia Emar Sira

Imajem : Dom Leandro Maria Alves & Ordenadu Aquino Dias iha Igreza Lospalos, 15/08/2024

SAPNewsTL, Lautem – Bispu Dioseze Baucau Dom Leandro Maria Alves fo ordenasaun ba Diakonu Aquino Dias Mazarello ne’ebe hatan Na’i nia bolu hodi sai Nai Lulik no instrumentu Maromak nian hodi haklaken no fo sasin kona ba Maromak.

Tuir Bispo Dioseze Baucau Dom Leandro Maria Alves liu husi nia homilia hateten Diakonu ne’ebe simu sakramentu ordem ne’e nu’udar domin ida ne’ebe Maromak hatudu atu bele hatene oinsa prezensa Maromak nian iha ema nia leet.

“Iha solenidade ne’e, ita hala’o sakramentu ordem, ita hamutuk iha fatin ida ne’e atu haree oinsa mak Maromak hatudu ninia domin mai ita ema liu husi bolu ita ema atu hola parte iha Maromak ninia obra salvasaun, ohin ita asiste ona aprezentasaun Diakonu ne’ebe mak atu ba simu sakramentu ordem, Maromak mak fo ita halo ida ne’e atu hatudu prezensa Nai Maromak nian”. Dehan Dom Leandro Maria Alves liu husi Nia homilia iha missa ordenasaun iha Parokia São Paulo Lospalos, Kinta-Feira, 15/08/2024

Bispu haktuir Diakonu nia kolaborasaun nu’udar instrumentu hodi fo sasin kona ba Maromak hodi haklaken iha ne’ebe nia deskobre Maromak nia bolu liu husi Amo sira.

“Ita haree husi Diakonu, nia hatudu ninia kolaborasaun ho Nai Maromak, nia oferese an, dalaruma ita la komprende no la hatene, dalaruma tuir ita ema nia haree, Nai Maromak utiliza sai instrumentu ninian atu haklaken no fo sasin kona-ba Maromak,  Nia moris hamutuk iha ne’e desde kiik kedas Akólitos iha Parokia ne’e no sai boot iha ne’e, hafoin nia deskobre Maromak ninia bolu liu husi Amu sira”. Tenik Bispo Baucau

Dom Leandro informa dalaruma tauk maibe keta lakon fiar ba Maromak tanba Maromak sei la husik ema ne’ebe Nia bolu.

“Dalaruma tauk maibe ita buka atu fiar, ita nia tauk ne’e labele halakon ita nia fiar maibe ita nia tauk ne’e atu habo’ot liu tan ita nia fiar ba Nai Maromak katak ida ne’ebe bolu ne’e, Nia sei proteje ema ida ne’ebe mak Nia bolu, Nia sei la abandona, Nia sei la husik tan ne’e mak ita tenke habo’ot ita nia fiar iha Nai Maromak”. Katak Dom Leandro

Dom Leandro husu ba familia sira atu labele kontente deit maibe kontinua reza ba Diakonu ba knaar ne’ebe nia hetan hosi Maromak.

“Familia sira ohin hotu-hotu sente ba fuan tuku-tuku los ona, hotu-hotu kontente maibe la bele kontente deit maibe buka atu reza maka’as liu tan, reza nafatin ba ita nia oan ne’ebe mak ohin nia hatan ba Nai Maromak ninia bolu ne’e”. Tuir Bispo

Bispu Dom Leandro Maria Alves

Aman ba sarani Baucau ne’e fundamenta vokasaun Diakonu nian ne’e hahalok kmanek tanba tuir ema nia haree dehan susar maibe ba Maromak laiha buat ida ne’ebe susar ho hahalok kmanek sira.

“Ordenasaun ne’e nu’udar hahalok kmanek ida ne’ebe hatudu prezensa Maromak nian ne’ebe transforma ita ema sai ninia instrumentu, mezmu ke dalaruma ita haree ba ita nia an katak ita folin laek maibe Maromak dehan mai deit keta tauk, ita ba oin maibe laos ho ita nia forsa, ita ba tanba ita fiar Maromak la’o hamutuk ho ita, la husik ita, Maromak akompaña ita, Maromak sei guia ita iha ita nia vida loron loron nian”. Nia hakotu

Entretantu, Padre Aquino Dias Mazarello ne’e husi Aldeia Iratchau Suku Pairara, Postu Administrativu Lautem Munisipiu Lautem, partisipa iha misa ordenasaun saserdotal ne’e mak autoriedade munisipiu Lautem, sarani parokia Lospalos no familia sira.

Jornalista : Marcela Mery da Costa