Padre Natalino Konsidera THS-THM La Hanesan Ho GAM & GAR
SAPNewsTL,Liquiça: Amo Paroku, Pe. Natalino Verdial da Sousa Gama hateten organizasaun THS-THM nunka hanesan ho Grupu Arte Marsiais no Rituais tanba THS-THM mai ho espiritu kreda katolika nian no nia sentral mak Kristu
Pe. Natalino Verdial da Sousa Gama saran lia hirak ne’e, hafoin remata missa agradesimentu ba aktividade retiru organizasaun Katolika Pencak Silat Pendidikan Tunggal Hati Seminari- Tunggal Hati Maria (THS-THM) iha Parokia São João de Brito Liquiça,09/12/2023
Iha intrevista Amo Paroku, Parokia São João de Brito Liquiça Pe. Natalino Verdial da Sousa Gama haktuir organizasaun THS-THM tenke sai ema di’ak iha ne’ebe tuir espiritu asembleia nian ema hotu iha direitu ba salvasaun atu hetan salvasaun husi maromak no ema hotu mos iha dever lori salavasaun ba ema.
“Sira tenke sai di’ak, ne’e mak importante sira ida-idak tenke haka’as an sai ema di’ak, ne’e de’it ne’e to’o ona; ba Parokia ida ne’e ba igreja ho espiritu asembleia ne’ebe hatur katak ema hotu-hotu iha direitu ba salvasaun husi maromak no ema hotu-hotu iha responsabilidade atu lori salvasaun ida ne’e ba ema hotu para salvasaun bele akontese ba ema hotu-hotu, ne’e espiritu husi asembleia ninian”. Dehan Amo Paroku, Parokia São João de Brito Liquiça Pe. Natalino Verdial da sousa Gama iha Parokia Liquiça, 9/12/2023
Amo Paroku Liquiça ne’e fundamenta THS-THM lahanesan ho Grupu Arte Marsiais (GAM) no rituais (GAR) sira tanba grupu ne’e nia sentru mak Kristu ne’ebe ho espiritu kreda katolika nian.
“Grupu THS-THM ne’e grupu ne’ebe mak nunka bele hanesan ho arte marsiais no arte rituais tanba nia mai ho espiritu kreda katolika ninian no ninia sentral mak Kristu ne’e rasik tanba ne’e mak ema hotu-hotu presiza atu unidus uluk nanain ho Kristu.”
“Kuandu unidus ho Kristu depois iha espiritualmente sai di’ak, forte depois bele tulun ema seluk tanba ne’e mak hanesan grupu THS-THM grupu ne’ebe eziste iha uma kreda nia tenke konsiente didi’ak katak nia lahanesan, nunka hanesan grupu arte marsiais no arte rituais”. Nia afirma
Amo Natalino mos hameno ba membru sira hotu atu apoiu malu no haka’as an sai ema di’ak hodi lori salvasaun ba ema hotu.
“Ba grupu ka pesoal, sira tenke ida-idak fo apoiu ba malu atu sai de’it ema di’ak kuandu sira sai ema di’ak iha vida parokial ka sosiedade ida nian ne’e to’o ona atu lori salvasaun ne’e ba ema hotu-hotu, ema hotu-hotu tenke haka’as an sai hanesan ema di’ak”. Nia teni
Iha sorin seluk, Tuir koordenador Seitoral Liquiça Domingos Fátima informa organizasaun Pencak Silat Pendidikan Tunggal Hati Seminari – Tunggal Hati Maria (THS-THM) nu’udar oraganizasaun ida ne’ebe hamahan an iha kreda nia okos hodi servi igreja no nasaun atu sai masin no roman ba mundu hodi kontribui ba paz no estabilidade nasaun nian.
“Organizasaun ida mai husi kreda katolika entaun nia aktividade tomak ita tenke hala’o mos tuir relijiaun katolika ninian doutrina, ita labele sai husi relijiaun katolika nia doutrina tanba organizasaun THS-THM ne’e organizasaun ida ne’ebe mak hamahan an iha kreda nia okos ne’ebe lases husi motto Pro Patria Et Ecclesia” katak servi ba kreda no nasaun, iha ne’ebe ba parte kreda maka hamrik servi igreja no oinsa sai masin no roman ba mundu no la’os mos hamrik hanesan lutu nasaun maibe oinsa bele kontribui ba paz no estabilidade ba nasaun”. Nia sublina
Domingos mos husu ba membru THS-THM hotu iha Timor Leste atu konsiente katak organizasaun halo sira sai ida de’it iha Kristu nune’e nafatin unidade hamutuk haburas nafatin organizasaun ne’e ba futuru ida ne’ebe diak liu.
“Halo refleksaun ba ita nia an, fo liman ba malu, ida de’it iha Krsitu, ita hotu nafatin hametin ita nia unidade atu nune’e bele halo THS-THM ne’e sai ida de’it hodi dezenvolve sai di’ak liu tan iha futuru”. Nia tatoli
Jornalista : Luis Pailofo