KEJUFAT Preokupa Estrada Fatumea Kontinua Aat
SAPNewsTL, Covalima : Relasiona ho estrada diresaun Postu Administrativu Fatumea ba Suia ne’ehe aat, Presidente Klibur Estudante Juventude Fatumea (KEJUFAT) Rui de Fàtima Amaral husu nonu guvernu konstituisional hodi tau atensaun tanba difikulta tebes sirkulasaun transporte sira.
“Ami Estudante no juventude husu ba Governu da-9 atu tau atensaun maximo ba infraestrutura Baziku iha Postu Administrativu Fatumea, tanba haree ba kestaun dezenvolvimentu, Povu Fatumea sei sofre tebes ba estrada ne’ebe aat”. Tenik Presidente KEJUFAT Rui de Fàtima Amaral ba SAPNews liu husi via telefone iha Fatumea, 08/12/2023.
Lider Juventude Fatumea ne’e hatutan, komunidade nafatin hato’o sira nian ejizensia ba autoridade munisipiu no nasional atu haree no solusiona problema desenvolvimentu sira iha tinan 2024-2025.
“Iha Postu Fatumea populasaun husi Suku tolu no aldeia sanulu resin-rua balun seidauk hetan bee moos no balun hetan ona maibe presiza halo reabilitasaun tanba tinan barak ona populasaun sira uza, maibe laiha rehabilitasaun, tan ne’e maka oras ne’e dadaun populasaun barak mak bainhira tempu bailoron no udan sempre uza masa lori buka bee matan antigu hirak ne’ebe beiala sira halo,”Nia Sublinha
Kada loron populasaun sira presiza bee atu konsumu maibe presiza la’o KM 3/4 maka foin hetan bee moos, iha Postu administrativu Fatumea laos de’it bee moos maibe estrada mós sai preokusaun boot ba komunidade.
“Iha tempu udan susar tebes atu halo movimentu husi suku ba Postu no husi Postu ba Covalima, husi parte saude mós wainhira iha situasaun emerjensia susar tebes atu bele transporta pasiente ne’ebe ho kondisaun Grave no wainhira inan sira ne’ebe gravida tempu to’o wainhira atu transporta mai Ospital referal Suai susar tebes tanba, kondisaun estrada”. Nia preokupa
Hafoin notisia ne’e publika, SAP News seidauk halo komfirmasaun husi Ministériu Obras Públikas (MOP) tanba sei okupadu ho servisu seluk.
Jornalista : Marcela Mesquita Lemos