Papa Francisco : Labarik Mak Esperansa, Proteze Sira Nia Hamnasa
Imajem : Papa Francisco fo bensa ba labarik iha Vatikanu,08/01/2025. Foto : Vatican News
SAPNewsTL, Vatikanu : Santu Padre Papa Francisco hato’o nia saudasaun ba sarani Luzófonu sira liu hosi audiénsia jeral iha loron 8 fulan Janeiru. Papa Francisco hateten labarik sira mak esperansa no sira nu’udar prezente hosi Maromak.
“Labarik sira nia hamnasa maka manifestasaun ida furak liu hosi Maromak nia ternura”. Ida ne’e mak Amu Papa hato’o iha ninia saudasaun ba sarani luzófonu sira iha Audiénsia Jerál 8 Janeiru foin lailais ne’e.
Papa Francisco dedika ninia katekeze ba labarik sira hodi hateten katak labarik sira mak esperansa.
“Proteje ita-boot nia hamnasa ne’ebé maka sai hanesan manifestasaun ida ne’ebé furak liu hosi Maromak ternura”.
Papa Francisco sublinha sumáriu ida kona-ba ninia katekeze katak “Ha’u dedika katekeze ida-ne’e no ida tuir mai ba labarik sira hodi reflete liuliu kona-ba traballu infantil nian. Iha Sagrada Eskritura, liafuan “oan-mane” maka liafuan segundu ne’ebé uza barak liu”.
“Labarik sira maka prezente ida husi Maromak, maibé infelizmente sira la’ós sempre konsidera hanesan ne’e. Progresu barak maka halo daudaun, maibé drama hosi infánsia ne’ebé hetan umillasaun, esplorasaun, abuzu no kanek todan sira ne’ebé seidauk rezolve”.
Santu Padre hatutan Jezús husi nia parte, aprezenta labarik sira nu’udar modelu ba adultu sira hodi halo an hanesan labarik, nune’e bele tama ba reinu lalehan.
“Se imi la sai fali hanesan labarik ki’ik sira, imi sei la bele tama iha Reinu Lalehan nian” (Mt 18,3)”. Nu’udar dixípulu Kristu nian, mai ita hatene oinsá atu kondena tipu violénsia hotu-hotu hasoru menór sira, salvaguarda sira-nia direitu, hadomi no proteje sira.”Nia sublinha
Iha audiensia jeral ne’e, Timoroan sira ne’ebé partisipa lori mós Bandeira Timor-Leste hodi hatudu ba Papa Francisco hodi haree.
Jornalista : Dircia Baptista Belo
