Papa Leão XIV Defende Diálogu no Diplomasia Iha Médio Oriente no Iraun
Imajem : Papa Leão XIV. Foto : Espesial
Sapnews Pro : Relasiona ho atake husi Estados Unidos América no Israel ba Irão ne’ebé rezultadu Líder Supremu Ali Khamenei lakon vida, Papa Leão XIV aleta katak “dame sei la hari’i liu husi ameasa ka ho arma, maibé liu husi diálogu.”
Hafoin reza Oração Angelus, Papa Leão XIV ko’alia ho lian hirak tuir mai: “Ha’u akompaña ho preokupasaun kle’an saida mak akontese iha Médio Oriente no iha Irão iha momentu dramátiku sira ne’e”.
“Estabilidade no dame sei la hari’i ho ameasa malu, ka ho arma sira ne’ebé halo destruisaun, moras no mate, maibé liu husi deit diálogu ne’ebé razoavel, autêntiku no responsavel.” Dehan Papa Leão XIV iha Vatikanu, 01/03/2026, tuir relatóriu husi Vatican News.
Bainhira liu tiha loron balu hafoin aniversáriu ba dala haat husi invazaun ba Ucrânia, atensaun agora fila ba Irão, ne’ebé atake koordenadu entre Estados Unidos no Israel hahú iha loron Sábadu dadeer, estraga sidade sira iha Irão no halo Líder Supremu Ali Khamenei lakon vida. Irão responde ho atake alvu sivil no baze militar EUA iha nasaun sira Golfo no mós iha Israel.
Haree ba dezenvolvimentu konflitu ne’ebé la previsível, Santo Padre mós husu atu hala’o papel diplomasia np reafirma katak povu sira hakarak dame ne’ebé fundamentadu iha justisa:
“Hasoru posibilidade tragedia boot tebes, ha’u halo apelu makaas ba parte sira ne’ebé envolve atu simu responsabilidade moral hodi para espiral violénsia molok sai abismu ne’ebé la bele hadi’a”.
Leão XIV hatutan, “Tenki fila fali ba hala’o diplomasia, atu promove ba povu nia diak, sira ne’ebé hakarak moris hamutuk ho dame, fundamentu iha justisa, ita kontinua reza ba dame.” Nia sublinha
Apelu atu kontinua reza ba dame la refere de’it ba Médio Oriente. Pontífice mós tau atensaun ba “guerra aberta” entre Paquistão, nasaun ne’ebé iha arma nuklear, no Afeganistão, ne’ebé Talibã hatene loos estratéjia gerilla:
“Além de ne’e, iha loron sira ikus mai notísia preokupante kona-ba konfrontu entre Paquistão no Afeganistão. Ha:u eleva ha’u nia súplika atu fila lalais ba diálogu.”
Dala ida tan nia apelu: “Ita reza hamutuk atu harmonia prevalese iha konflitu hotu-hotu iha mundu. Dame de’it, hanesan dom husi Maromak, mak bele kura ferida sira entre povu sira.”
