Pasa Férias Nakfila Ba Vizita Ikus ! Familia Simu Realidade Ho Matan-Ween
Imajem : Fen no Oan ne’ebe tanis tan lakon ninia laen & aman Matebian Sebastião Belo Iha HNGV Dili, 01/09/2025.
SAPNewsTL, Dili : Relasiona ho kazu omesidu ne’ebe akontese iha Postu Administrativu Villa Nova Baukau, iha ne’ebe rezulta Sebastião Belo “Chegue Raqa” lakon vida oras ne’e mediku Hospital Nasional Guido Valadares HNGV entrega ona mate isin ba familia hafoin halo autópsia.
Marcela Mery da Costa – SAP News TL
Kazu oho malu ne’ebe akontese iha loron 30 fulan Agostu tinan 2025, akontesimentu ne’e rezulta Sebastião Belo nu’udar trabalhador timoroan ne’ebe servisu iha United of Kingdom wainhira pasa ferias mai Timor-Leste.
Tuir informasaun ne’ebe SAPNews asesu liu husi fontes kredivel balun informa katak, insidente ne’e akontese iha suku Tirilolo Postu Administrativu Baucau Vila.
Hafoin akontesimentu sasin balun tenta komunika parte PNTL no Mediku sira hodi transporta kedas Suspetu ho Vitima ba
iha sala emerjensia HoREX, haleu iha
tuku 09:00 dader resin hodi halo tratamentu maibé mediku sira la konsege salva tanba Vitima hetan sona iha parte oin laran, liman inklui hirus matan parte karuk ne’ebe provoka raan sai barak rezulta mate fatin.
Sebastião Belo hetan oho hosi ninia subrinu rasik tanba mosu desentendimentu entre parte rua kona-ba kazu hadau malu rai no uma.
Tuir publikasaun video ne’ebe viral iha média sosial, matebian ninia fen haktuir katak wainhira ninia laen hetan sona no monu ona ba rai, ema barak haree no halo video maibe laiha ema ida mak ajuda maske husu favor.
“Wainhira nia monu, ema la interesse, ema barak haree deit no halo video, ha’u hakneak husu favor, ha’u lamas nia bolsu no rasta pasta, foti xave hodi tula ho karreta ba maibe ema kompriende sala dehan ha’u hadau ninia pasta maibe ha’u hadau ninia moris”.
“Ha’u-nia hanoin laiha tiha ona, ema hotu ita husu favor ema ida la preokupa, favor ida ajuda ha’u lai, maibe ema ida la ajuda”. Hateten matebian nia feen.
Hafoin Sebastião Belo hetan sona hosi subrinu, familia transporte kedas ba ospital hodi salva ninia vida maibe infelizmente la konsege sala ninia vida tanba sosa borus ba ninia laran.
Nune’e, oras ne’e matebian Sebastião Belo hetan ona autópsia iha Hospital Nasional Guido Valadares (HNGV) no entrega ona ba familia hodi ba halot iha nia deskansa fatin ikus.
Matebian Sebastião Belo hanesan traballador iha United of Kingdom ne’ebe passa férias mai Timor-Leste, wainhira sei moris fasilita timoroan barak ba servisu no ajuda timoroan sira.
Elbrangi Nunes liu hosi nia konta Facebook haktuir Sebastiao BeloChegue Raqa, Joven simples ne’ebe deside buka moris iha UK. Hosi nia esperiénsia tinan lubuk iha UK, nia uja ida ne’e hodi tulun fali Timóroan lubuk ida ba buka moris iha UK.
“Nia (Sebastião Belo) tulun Timóroan sira ne’ebe uja Pasaporte Timor-Leste difisil tama UK. Ho nia tulun ne’ebe iha, Timoroan lubuk ida hetan visa hodi ba servisu no hela ho família iha UK, nia tulun Timoroan la haree ba rasa, kor ka grupi artes marciais embora nia membru ida hosi IKS”.
“Nia hanesan heroi ida ne’ebe ajuda Governu Timor-Leste buka rezolve dalan ba Timoroan hetan kampu servisu iha UK. Ita la espera nia mate ho situasaun horrível hanesan ne. Deskansa Iha Hakmatek rohan laek,
sentido condolénsia, Força e coragem ba familia enlutada liu-liu ba oan kiak nain tolu no ita nia parseira”. Nia hakerek Iha orseik, 31/08/2025
Sebastião Belo mate husik hela fen, oan mane na’in rua no feto na’in ida, oras ne’e familia lori ona ba nia rai moris fatin, Postu Administrativu Quelecai, munisipiu Baucau hodi halot tuir kultura familia nian.