PD Kontinua Aposta Ba “Dignifika Povu & Aselera Dezenvolvimentu”.
Imajem : Presidente PD Mariano Assanami Sabino iha Sede PD Colmera, 23/12/2025
SAPNewsTL, Dili : Presidente Partidu Demokrátiku (PD) Mariano Assanami Sabino fo boas festas do santo natal no ksolok tinan foun ba povu Timor-Leste, nia dezeja atu timoroan hotu bele hametin unidade, fraternidade no prosperiedade ne’ebe la nahas liliu hametin instituisaun estadu, lori partidu ba estadu la’os lori estadu ba partidu, nune’e bele dignifika povu no nasaun.
“Hakarak hato’o ami nia ksolok natal no tinan foun ba hotu-hotu, espera katak tinan foun sei fo espiritu no naroman foun ba ita hotu atu hametin liu tan ita-nia instituisaun estadu nian para metin liu hola parte iha ASEAN atu sai forte liu tan”.
“Iha tinan 2026, ita tenke hametin ita nia unidade, fraternidade no demokrasia, mai ita hamutuk reforsa idak-idak nia partidu simu tinan foun atu hametin ita-nia ajente estadu no nasaun, 2025 tinan ida ne’ebé ita halo esforsu barak hodi tama ba ASEAN no ita konsege duni, ne’e luta povu Timor-Leste nian desde halo Proklamasaun Independénsia no ohin loron ita tama ona familia boot ASEAN”. Dehan Presidente PD Mariano Assanami Sabino iha Sede PD Colmera, 23/12/2025
Presidente PD ne’e hatutan, iha 2025 halo dezenvolvimentu infraestrutura iha territóriu nasionál, “iha 2026 ita sei kontinua nafatin ida ne’e. 2025 ita hahu ona kabu submarinu ho atividade lubuk ida ne’ebé importante atu fo apoiu no aselera dezenvolvimentu ekonomia”.
“Ita mós mantein nafatin esforsu hodi hadia edukasaun, saúde ho ministériu sira seluk. Ministériu Ensinu Superiór tinan ne’e iha ona dadus, data base ne’ebe dijitaliza, hein katak ita sei halo jestaun diak ba rekursu umanu iha futuru, tanba ita-nia rekursu umanu mak potensia atu dezenvole ita-nia nasaun ne’e ba oin”.
Lider PD ne’e husu ba lider partidu polítiku hotu-hotu hodi reforsa liu tan ida-idak nia partidu, halo sivilizasaun no edukasaun politika ba ita-nia povu no nasaun, “Mai ita hamutuk, ita reforsa partidu ida-idak, liliu iha prosesu konstrusaun paz, estadu, nasaun no konstrusaun karakter.
“Ba ha’u nia aman veteranus sira hotu, joven veteranus liu-liu juventude loriku aswain, ohin loron ita iha partidu oioin, mai ita hamutuk lori misaun estadu ba partidu laos lori partidu ba estadu. Ida ne’e importante tebes para partidu hotu-hotu tenke komunga prinsipiu no valores estadu ne’ebe sosa ho sakrifisiu no mate”.
Assanami dehan tinan 2026, tempu hodi halo inovasaun, kriasaun, transformasaun no lori dezenvolvimentu ba povu hodi dignifika povu no hadia kualidade moris sidadaun sira-nian.
“Ita sei halo inovasaun no kreatividade, ita sei hamutuk hodi renova konfiansa, fiar no laran metin ba ita nia nasaun. Mai ita hamutuk dignifika ita nia nasaun no povu, nasaun bele ki’ik maibe ita la ki’ik iha nasaun boot sira nia oin”.
Governante ne’e hatutan, Timor-Leste “nasaun ida ne’ebé ho luta ho rezisténsia no ema liu rihun atus tolu mate mak ita hetan independénsia. Husu ba joven hotu-hotu, mai ita hamutuk hamoris nasionalislzmu, forti liu tan sai luta-door, hanoin pozitivu no koopera malu hodi aselera ita-nia dezenvolvimentu konstrusaun estadu”.
Partidu Demokrátiku tatoli nia boas festas santu natal no ksolok tinan foun 2026 ne’e dedika ba povu Timor-Leste iha rai-laran no diaspora, inklui orgaun soberania haat hanesan Presidénsia Repúblika, Parlamentu Nasionál, Governu no Tribunal Rekursu hodi dezeja futuru ne’ebe diak liu no metin ho paz, estabilidade no dezenvolvimentu nasionál.
#natal #newyear #partidodemocrático #timorleste #sapnewstl