PDHJ Kongratula SAPNews ! Midia Ne’ebe Lidera Husi Feto

SAPNewsTL, Dili : Provedoris dos Direitus Humanus e Justisa (PDHJ sigla Portuges) Virgilio Guterres Lamukan sente kontente tanba Midia SAPNewsTL lidera husi feto, feto mak sai xefe redasaun no vise redasaun inklui diretora ezekutiva no feto mak maioria iha SAPNews, ne’e hatudu sinal diak katak feto hahu hetan ona oportunidade hodi lidera orgaun komunikasaun sosial

“Ba SAPNews, ha’u nia parabens no haksolok liu tan tanba SAPNews ninia Xefe Redasaun ho Vise Xefe Redasaun mesak feto ida ne’e ba porvedoria direitus humanus ne’e sinal diak tanba iha idade joven feto sira hahú hetan oportunidade atu lidera orgaun komunikasaun sosial, bainhira feto hahu lidera ida ne’e bele mos ho espasu barak liu ba feto sira atu koalia i mos ba sira seluk atu fo opiniaun atu nune’e mídia labele domina ho karakter patriarkal ne’ebe durante ne’e domina iha mídia sira”. Tenik PDHJ Virgilio Guterres Lamukan iha entrevista, Kaikoli DIli, 21/02/2024

PDHJ konsidera Mídia hanesan instrumentu ba promosaun boa governasaun katak wainhira ita halo monitorizasaun, supeviziona hahalok ukun nain sira no instrumentu advokasia ba protesaun direitus humanus katak wainhira mídia halo investigasaun ba korupsaun ka publika kazu abuzu seksual ne’ebe ke envolve politiku ka figura publika ruma, abuzu seksual hasoru estudante, agresaun fizika hanesan polísia hasoru sidadaun.

“Ami provedor konsidera mídia hanesan mos instrumentu advokasia ba protesaun direitus humanus katak wainhira mídia halo investigasaun ba korupsaun ka publika kazu abuzu seksual ne’ebe ke envolve politiku ka figura publika ruma, abuzu seksual hasoru estudante, agresaun fizika hanesan polísia hasoru sidadaun. Papel mídia importante iha ne’e.”

Virgílio Lamukan hatutan iha era agora ne’ebe plataforma dijital sai ona plataforma importante ba komunikasaun públika, PDHJ nia hanoin iha kontekstu Timor nian haree katak mídia iha plataforma dijital sira ne’ebe ke hasú mosu ne’e sinal ida diak tanba hamosu opsaun oi-oin ba sosiedade atu asesu ba informasaun, laiha dehan kanal úniku, hanesan uluk, iha tempu Indonesia nian ne’e TVRI de’it, RRI deit, ka jornal karik hanesan KOMPAS sira ne’e de’it seluk laiha mas agora iha RTTL, GMNTV, STLNews, Guardamor, NEON METIN, agora iha tan SAPNews, entaun kuandu media barak mosu fo opsaun barak ba sosiedade, no sidadaun sira iha liberdade atu hili.

“Ba provedor nia espetativa katak kualker mídia ne’ebe ke mosu wainhira nia transforma nia an hanesan instrumentu ka hala’o nia papel hanesan instrumentu ba kontrolu sosial, PDHJ konsidera ida ne’e hanesan instrumentu ba promosaun boa guvernasaun katak wainhira ita halo monitorizasaun, supeviziona hahalok ukun nain sira nian atu sira kontinua responsavel ezekuta saida mak sira promete hela ba povu durante kampaña ida ne’e aktividade ne’ebe halo promosaun boa governasaun”. Virgilio Guterres akresenta

Virgílio Lamukan parabeniza Família SAPNews, Parabens liu-liu ba fundadores sira ne’ebe ke hamosu inisiativa atu estabelese mídia ida ne’e, tinan rua ona maibe esperiénsia hatudu katak tinan rua ne’e seidauk natoon atu teste ita nia komprimisiu ne’ebe ke hakarak atu halo.

“Entaun hakarak kongratula SAPNews ba ninia ezistensia nomos ba nia fundadores sira ne’ebe ke maioria joven no estudante, hein katak SAPNews bele sai opsaun ida ne’ebe ke mai ho nia identidade rasik, ninia foku rasik katak nia labele halo hanesan sira seluk, mai ho nia karakter natureza rasik, karakter ne’ebe enfrenta espiritu joven i joven akademiku, jornalizmu katak mezmu joven ne’ebe ho aten brani atu konfronta maibe konfrontasaun ne’ebe bazeia ba faktus i liu-liu bazeia ba evidénsia ne’ebe profesionalmente nomos sientifikamente ita bele responsabiliza.”

Virgilio mos husu ba Ezekutivu Midia SAPNews atu labele husik midia naran lakon iha dalan klaran hanesan midia sira uluk ne’ebe agora laiha ona, maibe ezekutivu sira tenki buka estratejia hodi asegura no garante midia ne’e ninia sustentabilidade ba oin.

“Ha’u hakarak SAPNews labele hanesan ho ha’u nia mídia sira uluk ne’ebe ha’u pertense ba ne’ebe ke agora laiha ona maibe ha’u hein katak tinan lima tinan sanulu mai se laos ha’u pelumenus provedor ka provedoria seluk sei kontinua fo kongratulasaun tanba SAPNews sei kontinua eziste”.

“Entaun, ha’u hein katak maske SAPNews la’os entidade ne’ebe ke atu buka lukru maibe hein katak SAPNews hatene halo estratejia oinsa bele garante sustentabilidade SAPNews nian hodi kontinua hala’o misaun no vizaun ne’ebe ke deside ona iha SAPNewsTL”. Nia hakotu

SAPNewsTL nu’udar meiu komunikasaun sosiál ida ne’ebe hari’i iha loron 26 Fulan Fevereiru Tinan 2022, hari’i no funda husi estudante Universitáriu sira, Formandu Jornalizmu Profisional sira no Estudante Sekundaria sira, iha ne’ebe hamriik  nu’udar média ho prinsipiu Informativu, Inspirativu, Konstrutivu, Produtivu, krítiku no Edukativu hodi hari’i Sosiedade Timor-Leste ida Justu, Prósperu, Solidáriu no Fraternu.

Nune’e, tinan ne’e SAP News halo ona tinan rua (2) hanesan orgaun komunikasaun sosial ne’ebe hala’o ninia atividade jornalistika iha sosiedade Timor Leste.

Jornalista : Luis Pailofo