Pe. Juvito : La Fasil Hetan Pe. Domingos, Amu Ne’ebe Nunka Kolen 

Imagem : Padre Celebrante Juvito do Rego iha Kapela HNGV, Díli, 16/05/2025

SAPNewsTL, Díli : Padre Domingos Maubere fila hikas ona ba Aman Maromak nia kadunan santu. Padre Juvito do Rego hateten lá fasil hetan padre ida no difisil liután wainhira lakon padre Domingos Maubere.

“Sai Padre ida la fasil, lakon Padre difisil liután, Amu Domingos Maubere ema ida fo an no dedikadu tebes ba Nai-Lulik, Amu ida nunka kolen hodi defende ema kiik no ema kiak sira, atu hetan fali Padre ida hanesan Nia manu nehan moris, ita agradese ba Padre Domingos Maubere”. Hateten Padre Juvito do Rego iha Kapela HNGV, Díli, 16/05/2025

Padre Juvito hatutan, “Amu, ami husu deskulpa no perdaun, karik durante ita moris hamutuk halo buat ruma lamonu ba amu nia laran, tinan 40 resin o la’o iha ema rihun ba rihun nia leet hodi fo an hodi servi sarani sira”.

“Ita fiar iha Maromak, ita fo obrigadu ba Maromak ne’ebe fo Padre Domingos da Silva Soares “Maubere” mai ita”. Sublinha Padre Juvito

Padre Domingos Maubere hakotu iis ohin dader, loron 16 fulan Maiu 2025, iha iha Intensive Care Unit, Hospital Nacional Guido Valadares (ICU-HNGV) tanba sofre infesaun pulmonar.

Imagem : Padre Domingos Maubere

Antes ne’e, Presidente Repúblika José Manuel Ramos Horta mós halo ona visita ba Domingos Maubere no rekunhese katak kondisaun saúde Padre Maubere perigosu.

“Ha’u visita ona dala barak, nia dala barak ba ona halo tratamentu iha rai-liur, mais finalmente doutor sira foti liman, agora iha HNGV, halo tratamentu para estabiliza, nia sei rona maibe la haree, triste los tanba Padre ne’e heroi duni, simples, sedu demais ke nia husik hela rai ne’e”. Hateten Presidente Repúblika José Ramos Horta iha Salaun Multiozu GMN Bebora, 10/05/2025

Xefe Estadu hatutan, “Ita haree doutor sira iha Hospital Guido Valadares sira tau matan didiak, iha médiku ne’ebe akonpaña 24 oras. Ohin sira chek nia fuan diak hela, iha pulmaun ne’e mak perigozu, iha medikamente ha’u hatene sei bele halo buat ruma, iha Malazia doutor sira hateten labele ona, so milagre ruma karik”. Ramos Horta informa

Ioron 11 fulan Maiu 2025, Primeiru Ministru Kay Rala Xanana Gusmão mós hala’o ona vizita ida ba Padre Domingos Maubere iha ICU-HNGV maibe kondisaun saúde krítiku.

Fo hanoin fali katak Padre Domingos Maubere hala’o ona tratamentu ba nia saúde dala barak iha rai liur maibe doutor sira foti liman no to’o agora seidauk rekupera.

Iha loron 13 fulan Maiu, foin lailais ne’e, hafoin fila hosi Vaticano, Kardinal Dom Virgílio do Carmo da Silva mós hala’o vizita no fo bensa ba Amu Domingos Maubere maibe infelizmente Maromak bolu ona nia hodi fila ba Aman Maromak nia poder santu iha lalehan leten aas liu.

Tuir planu, Mate-isin Saudozu Padre Domingos Maubere sei translada ba rai moris fatin, Postu Administrativu Letefoho Munisípiu Ermera, ohin tuku 11:00, kalan ida iha Letefoho, hafoin sei lori hikas mai Parokia Sagrado Coração de Jesus Beroka iha tuku 12:00, loron 17 MaiuMaiu.

Tuir mai sei halo misa fúnebre iha Igreja Sé Catedral, Villa Verde Díli, iha tuku 10:00, loron 19 Maiu 2025.

Jornalista : Marciana da Conceição