Pe. Marito Afirma Hakbesik Sarani Ermera, Hamutuk Deskobre Maromak Nia Grasa

Padre Vigáriu Parókia Saun José Atsabe Marito Mendonca de Araújo iha Atsabe.

SAPNewsTL, Ermera : Hafoin simu hosi sarani Parókia São José Atsabe Munisípiu Ermera, Padre Marito Mendonca de Araújo hateten, misaun nu’udar nai lulik marka iha istória vokasaun nian no misaun ida ne’e konvida sarani sira hodi deskobre Maromak ninia grasa liu husi asaun pastoral.

“Ita hamutuk deskobre tan Maromak ninia grasa liu husi ita nia asaun pastoral, ita la’o hamutuk hodi haksolok liután sarani Parókia Atsabe atu hamoris liután pastoral iha parókia São José Atsabe,” Dehan Padre Vigáriu Parókia Saun José Atsabe Marito Mendonca de Araújo ba SAPNews iha Atsabe.

Padre Marito subliña, nia parte sente kontente tebe-tebes tanba hala’o misaun saserdotal iha Parókia São José Atsabe hodi hatutan maromak nia futar liafuan ba sarani sira.

“Em prinsipiu, ha’u sente haksolok tanba ha’u nia vida hanesan amu lulik ne’e ha’u halo misaun iha Parókia São José Atsabe, agradese tebes ba sarani no Amu Pároku ne’ebé entusiasmu tebes hodi simu ha’u, atu hala’o kna’ar hanesan padre Vigáriu iha Parókia Saun José Atsabe,” Padre Marito hatutan.

Sarani Atsabe sira nia sasin fiar ne’e diak teb-tebes no sarani Atsabe hatudu duni sira nia fiar tanba ne’e ho Amu Vigariu nia prezensa sei fortifika liután fiar sarani nian bele buras iha kapela ne’ebe konsiste iha Parókia Saun José Atsabe

“Ha’u nia prezensa ne’e sei hakbesik an ba sarani sira atu aumenta tan fiar ne’ebé mak sira iha bele buras iha kapela hirak ne’ebé konsiste iha Parókia Atsabe, ita la’o hamutuk hodi deskobre Maromak nia hakarak ba ita ida-idak nia fiar”.

Padre Marito afirma sei lori Maromak ba sarani sira no hatudu realidade katak fiar uma kreda nian ne’e mak liu husi maromak nia doutrina no lei, nune’e sarani sira labele la’o dook husi Maromak no hela iha nakukun laran.

Jornalista : João Marito