Imajem : Primeiru Ministru Kayrala Xanana Gusmão iha Palasiu Prezidensial Nicolau Lobato, 05/09/2024
SAPNewsTL, Dili – Relasiona ho vizita Sua Santidade Papa Francisco iha loron 09-11 Fulan Setembru, Primeiru Ministru Kayrala Xanana Gusmão deklara Timor-Leste preparadu hodi simu Santu Padre iha segunda-feira semana oin
“Papa agora iha Jakarta, sei kontinua ba Papua Nova Guine, hafoin sei mai Timor-Leste, ne’e duni husu boot, ita hotu preparadu ba simu Papa Francisco”. Tenik Primeiru Ministru Kayrala Xanana Gusmão ba jornalista sira iha Palasiu Prezidensial Nicolau Lobato, 05/09/2024
Xefe Guvernu ne’e husu joventude sira hodi tur hakmatek hodi fo susesu vizita Papa Francisco no kontribui ba paz tanba hatudu tiha ona katak Timor-Leste rai ne’ebe demokrátiku no ezemplu ba mundu.
“Tanba ne’e dala ida tan apelu ba joven sira katak ita hatudu tiha ona ba mundu katak ita nu’udar rai ida ne’ebe laiha violénsia, hakarak paz no dezenvolvimentu, ne’ebe ita esforsu an atu dezenvolve povu nia moris, Papa Mai ita hotu tur hakmatek”. Tenik Primeiru Ministru Kayrala Xanana
Xefe Governu hatutan, nia parte haree ona fatin hirak ne’ebe peregrinu sira sei hela hodi prepara an no partisipa misa boot ne’ebe sei prezide husi Santu Padre Papa Francisco iha Tasi-Tolu.
Sekretaria Estadu Komunikasaun Sosial Espedito Dias Ximenes
Antes ne’e, Sekretaria Estadu Komunikasaun Sosial Espedito Dias Ximenes informa to’o ohin loron komisaun registu ona peregrinu hamutuk rihun atus ida neenulu resin-haat, atus hitu hitunulu resin-hitu (164.777) husi munisípiu sanulu resin-haat (14).
“Peregrinu ne’ebe registu ona hamutuk 164.777, kompostu hosi Munisípiu Lautém hamutuk 5.503, Baukau hamutuk 13.702, Viqueque hamutuk 6.530, Manufahi hamutuk 3.850, Aileu hamutuk 7.500, Bobonaru hamutuk 7.805, Ermera hamutuk 14.330, Manatutu hamutuk 7.841, Likisa hamutuk 12.400, Ainaru hamutuk 9.322, Covalima hamutuk 4.356, Dili hamutuk 67.994, Atauro hamutuk 1.300 no Rejiaun Administrativa Espesial Oe-Cusse Ambeno (RAEOA) hamutuk 2.344”. Tenik Sekretaria Estadu Komunikasaun Sosial Espedito Dias Ximenes ba Jornalista sira iha Nunsiatura Apostólika Motael Dili,03/09/2024
Sekretariu Estadu ne’e hatutan, total rejistradu misa Tasi-Tolu ne’e seidauk konta ho sira ne’ebe hahú rejistu iha loron 1-3 Fulan Setembru inklui peregrinu hirak ne’ebe mai hosi rai-liur.
Peregrinu husi parte leste sei halo akampamentu iha area Acanuno Hera, Husi Rai-Klaran sei destina iha area Kasnafar, no husi parte Oeste sei hela iha Area Tibar, fatin hirak ne’e preparadu ona ba peregrinu sira.
Ligadu ho sarani ne’ebe la halo registrasaun, Espedito Dias Ximenes deklara sarani ne’ebe la registu bele ba partisipa, importante la lori sasan kroat no kumpri regra ne’ebe iha.
“Sira ne’ebe la rejistu bele ba partisipa misa iha Tasi-Tolu, sira nia fatin prepara ketak, sira hamrik iha estrada sorin, besik tasi-ibun”. Nia dehan.
Fo hanoin fali katak fatin neen ne’ebe Sua Santidade Papa Francisco sei halo vizita maka hanesan Nunsiatura Motael, Palásiu Prezidensial Nicolau Lobato, Orfanatu Madre Alma Pantai-Kelapa, Igreza Catedral Metropolita de Dili, Tasi-Tolu, no Centro Concenções de Dili (CCD), hafoin sei kontinua nia vizita apostólika ba nasaun Singapura no fila fali ba Vatikanu.
Jornalista : Marciana da Conceição & Conzita Mota