PM Xanana : Favor, Estudante Lee Barak & Dosente Hakerek Livru
Imajem : Primeiru Ministru Kayrala Xanana Gusmão hala’o palestra iha Auditoriu FCS-UNTL, Dili,28/03/2025. Foto : Média GPM
SAPNews TL, Díli — Hafoin prense reflesaun kasionál kona-ba 50 anos Aniversáriu Proklamasaun Independénsia, Xefi Governu Kay Rala Xanana Gusmão bolu atensaun ba Universidade Nasionál Timor Lorosa’e (UNTL) hodi implementa regra rigorosu no regula estudante sira estuda barak no buka hatene kona-ba prosesu luta libertasaun nasionál.
Tuir Primeiru-Ministru (PM) Kay Rala Xanana hateten, estudante sira tenki hakbesik aan ba biblioteka ne’ebe estabelese iha universidade sira hodi halo leitura barak, aprende barak, halo diskusaun lorloron, buka informasaun atu hatene kona-ba prosesu luta libertasaun nasional no mos kona-ba prosesu dezenvolvimentu ne’ebe la’o iha Timor-Leste.
“UNTL favor-ida implementa regra ida kona-ba lee barak, estuda no estuda. Husu mós ba dosente sira atu hakerek livru, saida de’it mak hanoin kona-ba universidade rasik,” Dehan PM Kay Rala Xanana Gusmão bainhira sai orador prinsipal iha reflesaun ba komemorasaun aniversáriu Proklamasaun Independénsia Timor-Leste nian ba dala 50, ne’ebe organiza husi UNTL, iha Auditóriu Fakuldade Siénsia Sosiais, Kaikoli Sexta (28/03/2025)
Xefi Governu afirma, iha tempu rezistensia nia laran nia parte iha komitmentu rasik hodi halo leitura barak, buka hatene kona-ba estratejia politika ne’ebe bele konvense timoroan sira firme hodi luta ba libertasaun nasionál.
“Kona-ba prosesu iha funu laran bainhira ha’u lidera funu, sempre aprende no lee barak kona-ba estratejia, kompriende kona-ba prosesu luta pasadu nian, buka konese didi’ak terrenu, ikus mai buat hotu la’o di’ak”. nia dehan.
Iha fatin hanesan, Magnífiku Reitor UNTL João Soares Martins aprofunda, Universidade Nasionál Timor Lorosa’e inisiativa organiza atividade ne’e hodi relembra hikas tinan 50 Proklamasaun Independénsia ne’ebe kada tinan povu no estadu Timor-Leste (TL) komemora iha loron 28 fulan novembru.
“Tinan 2025 TL kompleta tinan 50 Proklamasaun Independénsia 28 Novembru tanba ne’e UNTL realiza atividade hirak ne’e hodi fó biban ba ami nia estudante sira atu ko’alia ho líder istóriku sira ne’ebé lidera funu dezde 1975 to’o agora atu ko’alia buat ruma bá estudante sira no bá públiku”.
Nia subliña, realizasaun atividade ne’e ho objetivu atu bele dokumenta estudante sira nia hanoin bá Timor-Leste liu-hosi sira-nia esperiénsia bele prodús livru, nune’e joven sira bele aprende kona-bá esperiénsia sira-ne’ebe funu nain sira hala’o iha tempu rezistensia nia laran.
“Ho konferénsia ne’e, estudante sira bele aprende diretamente ho Primeiru-Ministru tanba nia nu’udár líder ida ne’ebé iha esperiénsia lidera funu no iha esperansa bá futuru Timor nian,”
Reitor UNTL akresenta, UNTL sei organiza nafatin atividade reflesaun nasionál hodi konvida lider istóriku sira atu partila esperiénsia ba estudante universitáriu sira.
“Atividade hanesan ne’e ami sei hala’o mós ho líder sira seluk ne’ebé involve iha prossesu luta libertasaun dezde tinan 1975 hanesan atuál Prezidente Repúblika, José Ramos-Horta, Mari Alkatiri, Roque Rodrigues, Rogério Lobato, Taur Matan Ruak, Falur Rate Laek, Lere Anan Timur no sira seluk-tán,” nia hakotu.
Entretantu, iha serimónia reflesaun Nasionál Kona-ba 50 anos Aniversáriu Proklamasaun Independénsia partisipa husi Xefi Governu Kay Rala Xanana Gusmão, Reitór UNTL João Soares Martins, Estrutura Reitória no estudante ativu sira.
Jornalista : Marcela Mery da Costa
