PN Aprova OJE 2026 Ba MPRM $𝟏𝟐𝟖,𝟓𝟐𝟎,𝟖𝟗𝟑 Iha Faze Espesialidade

Imajem : Debate OJE 2026 Iha PN, 19/11/2025. Foto : Média GPM

SAPNewsTL, Dili : Parlamentu Nasionál (PN) aprova $128,520,893 hosi Orsamentu Jerál Estadu (OJE) tinan fiskál 2026 bá Ministériu Petróleu no Rekursus Minerais (MPRM) ho votus a favór 43, abstensaun 23 no kontra zero iha debate faze espesialidade.

Orsamentu ne’e fahe bá kategoria Saláriu no Vensimentu $3,276,944, Bens no Servisu Korrentes $74,368,949, ho Transferénsia Públikas $50,800,000 no Kapitál Dezenvolvimentu $75,000. MPRM iha programa lima, sub programa 13 no atividade hamutuk 39.

Programa sira ne’e mak hanesan:

Programa 510: Funsionamentu no Dezenvolvimentu Institusionál

Programa A13: Dezenvolvimentu Kampu Gás Greater Sunrise no Assegura Pipeline gás mai Timor Leste

Programa A17: Dezenvolve Polítika no Prátika Di’ak sira iha Indústria hodi Assegura partisipasaun másima Timoroan sira iha Atividade sira iha Seitór ida ne’e.

Programa A18: Implementasaun Projetu Tasi Mane iha Kosta Súl

Programa A19: Esplora, Investiga no Dezenvolve Rekursu sira Petrolíferu, Minerais no Jeolójikus iha Territóriu.

Debate espesialidade ne’e lidera hosi Prezidente Parlamentu Nasionál, Maria Fernanda Lay no partisipa hosi Primeiru-Ministru (PM), Kay Rala Xanana Gusmão, membru Governu sira inklui entidade relevante seluk.

Durante debate, Ministru Petróleu no Rekursus Minerais, Francisco da Costa Monteiro mak halo aprezentasaun no esplika detallada kona-bá alokasaun orsamentu bá programa sira ne’ebé Ministériu ne’e trasa ona bá tinan 2026.

Proposta Lei OJE 2026 Billiaun $2.214.689,195 ho kategoria Saláriu no Vensimentu $476.870.249, Bens no Servisu Korrente $447.904.446, Transferénsia Públika $820.710.160, Kapitál Menór $32.556.96 no Kapitál Dezenvolvimentu $436.647.379.