PNTL Detein VAC Ne’ebe Oho Miguel & Baku Agusta Resulta Bebe Mate Iha Kabun-Laran
Imajem : Agusta de Deus ne’ebe hetan baku hosi nia laen toba hela iha rai no inan feton ida mai haree ho laran-triste, Bazartete, Likisa, 29/11/2025. Foto : Média PNTL Likisa
SAPNewsTL, Likisa : Polísia Nasional Timor-Leste (PNTL) munisipiu Likisa, postu administrativu Bazartete detein ona autor VAC ne’ebe oho Xefe Aldeia Metir Miguel dos Santos (mate fatin) no agresaun fízika hasoru Agusta de Deus hodi resulta bebe mate iha kabun-laran.
Tuir publikasaun ne’ebe fo sai hosi ID Facebook ho naran Alves Luis informa katak suspeitu ne’ebe halakon Xefe Aldeia Metir, Miguel dos Santos nia vida parte PNTL buka tuir no hetan ona iha Suku Fahilebo, Bazartete, munisipiu Likisa
“Suspeitu ne’ebe baku mate maun Migi (Miguel dos Santos) kaer ona, parabéns ba PNTL”. Hakerek Alves Luis iha 30/11/2025.
Hafoin akontesimentu iha loron 29 fulan Novembru (madrugada tuku 16:30 htl), wainhira suspeitu baku mate nia iha nia toba fatin, parte segurança translada kedas mate-isin mai Díli no buka tuir autor.
Iha loron Sábadu, 29 Novembru 2025, por volta oras 06h30, akontese kazu Homicídio Agravado no Ofensas à Integridade Física Agravado iha área Dargeo, Aldeia Metir, Suku Fatumasi, Postu Bazartete, Munisípiu Likisá.
“Vítima atual Xefe Aldeia Metir, Miguel Correia dos Santos, tinan 50, mate fatin depois suspeitu inisial VAC baku ho besi kanu dala rua ba ulun, bainhira vítima toba dukur besik área adorasaun sagrada”. Sita média PNTL Likisa, 01/12/2025
“Antes oho Xefe Aldeia, suspeitu halo agresaun fízika hasoru uluk nia esposa, Agusta de Deus ho idade 28, ne’ebé iha kondisaun grávida. Vítima feto ne’e lori ba Hospital Nacional, agora iha ICU, ho informasaun médiku dehan katak bebe iha inan nia isin mate ona”. Sita média PNTL Likisa
Seksaun Investigasaun Kriminal (SIK) Munisípiu Likisá lori ona matebian Miguel Correia dos Santos ba mortuáriu atu halo prosesu autópsia. Suspeitu soe hela besi kanu ne’ebé uza hodi komete krime iha fatin akontesimentu no lori fali katana halai ba subar iha área Fahilebo.
Husi akontesimentu ne’e, Ekipa Konjunta PNTL Munisípiu Likisá no F-FDTL destakadu Likisá duni tuir suspeitu refere. Iha Domingu, tuku 13h30, ekipa lideradu husi Xefe Seksaun Rezerva Intervenção Rápida Inspektur Xefe Ernesto Maia no Xefe SIK Munisípiu Likisá, Inspektur Asistente Polícia Amarojo Joaquim dos Santos ho Ekipa hamutuk ho juventude husi suku Fahilebo no Fatumasi, konsege kaer suspeitu iha ailaran baliza Suku Fahilebo no Fatumasi.
Iha momentu ne’ebá, suspeitu sei uja katana no planu kontinua halo krime, maibé ekipa konsege neutraliza no detén ona. Agora suspeitu hela iha sela detensaun atu submete ba Primeiru Interrogatóriu tuir lei iha vigor.
Enkuantu, oras ne’e suspeitu ninia fen iha hela ospital no mate-isin Miguel dos Santos iha ona Mortuária Hospital Nasional Guido Valadares (HNGV) Bidau Díli hodi hein ba prosesu autópsia.