PNTL Kaptura Sidadaun Involve Grupu Jogu Online Ilegal ! Feto Ida Tanis “Ama, Ha’u Lakoi”

Imajem : Ekipa konjunta asegura sidadaun ne’ebe envolve iha grupu jogu online ilegal iha Zita Plaza & Kolmera, 10/10/2025. Foto : Média PNTL

SAP News TL, Dili : Polísia Nasional Timor-Leste (PNTL) liu husi ekipa operasaun konjunta halo intervensaun ba grupu jogu online Ilegál ne’ebe kontra lisensiamentu Governu hodi kontinua loke iha rezidensia Zita Plaza no Kolmera maiz ou menuz tuku 12:00 madrugada.

𝐃𝐚𝐧𝐢𝐞𝐥 𝐝𝐚 𝐒𝐢𝐥𝐯𝐚 – 𝐒𝐀𝐏 𝐍𝐞𝐰𝐬 𝐓𝐋

Durante identifikasaun no kapturasaun ba sidadaun hirak ne’ebé envolve iha jogu online ne’e, iha feto ida ne’ebé tanis hakilar hodi bolu “Amaaaa, ha’u lakoi ida, ha’u lakoi”. Tuir mai, wainhira feto ne’e kontinua tanis hakilar, iha ema ida ne’ebé dehan ba nia, “Ema barak ne’e, lalika tauk ida”.

Kapturasaun ne’e, ekipa konjunta halo iha Zita Plaza no mós iha Kolmera tanba autoridade seguransa deskonfia autor sira kontinua prátika jogu online iha fatin rua refere.

Hafoin halo kapturasaun, ekipa konjunta lori kedas sidadaun sira ba eskuadra, PNTL hodi asegura tuir lei no hein prosesu investigasaun ba sira iha loron aban, 10 Outubro 2025.

Autoridade Seguransa, Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK) halo operasaun sobu jogu Online iha area Fatuhada no Kolmera konsege detein sidadaun estranjeiru nain-10 iha sela polísia hodi submete ba prosesu investigasaun.

Durante operasaun PNTL-DSIK fahe ba ekipa rua iha loron (09/10) tuku 11:30 kalan konsege identifika hetan sidadaun estranjeiru hamutuk ho traballador Timoroan Feto no Mane lubuk ida hala’o hela aktividade jogu online iha area Fatuhada no Kolmera.

Aktividade jogu online ne’ebé sidadaun estranjeiru loke durante ne’e halo rekrutamentu ba sidadaun Timoroan Feto no Mane hodi halo servisu utiliza telemovel ho operador Sim Card rua hanesan Telemor ho Telkomcel, hafoin manda mesajem ho maneira oin-oin ba ema seluk bele fiar sira ikus mai haruka ema manda osan ba sira-nia konta bankaria hodi hetan benefisiu ba sira-nia aan.

Hafoin ekipa PNTL-DSIK identifika aktividade jogu online ne’e halo kedas atuasaun kaer ho liman konsege asegura detein kedas sidadaun estranjeiru nain-10 ho traballador Timoroan Feton no Mane kuaze nain 40 resin ho evidensia sira hodi transporta kedas ba edifisiu Diresaun Servisu Investigasaun Kriminál (DSIK) nia fatin iha kuartel Jerál PNTL Caicoli hodi submete ba prosesu indetifikasaun.

Iha Prosesu identifikasaun ne’e, Traballador Timoroan Feto no Mane sira ne’e rejista hotu naran liberta kedas sira haruka fila ba ida idak nia uma hodi hein prosesu investigasaun, maibe sidadaun Estrajeiru nain-10 inklui Feto ida kontinua ba detein iha sela polisia hodi submete ba prosesu investigasaun, durante oras 72 nia laran, hafoin aprezenta ba Ministeriu Publiku (MP) kontinua interrogatoriu dahuluk iha Tribunal atu foti desizaun tuir lei ne’ebé vigora iha Timor-Leste.

Sidadaun estrajeiru nain-10 ne’ebé kumpri hela sela detensaun, kompostu husi nain-6 hanesan resposavel masimu ba jogu Online iha area Fatuhada ho naran inisial BJT, AJ, JD, KK, JO no MR ne’e rejista ho Nuk. 0323/25.PNSIC no nain haat ne’ebé resposavel masimu ba jogu Online iha area Kolmea ho naran inisial PG, MIS,YA no YMK ida ne’e mos rejista ho Nuk. 0324/25.PNSIC.

Rekorda fali katak, Governu Timor-Leste aprova ona kanselamentu lisensa ne’ebé dala uluk fó ba empresa sira atu hala’o jogu online no servisu aposta digital iha rai laran, kanselamentu ne’e akontese hafoin sorumutu Konsellu Ministrus, Quarta-Feira iha Palasiu Governu, loron 30 fulan Setembru 2025.

Medida politika ida ne’e hanesan parte husi esforsu Governu atu prevene impaktu sosial negatívu husi jogu online, ne’ebé foin hetan aumentu partisipasaun povu, inklui labarik foun, liuhosi plataforma digital, Media nasional no lokál sira, inklui Jornal Nacional Diáriu no Agensia notisiosu Tatoli, foin publika notisia kona-ba kontroversia jogu online iha Timor-Leste.

Relatóriu sira ne’e fó hanoin katak jogu online aumenta risku dependénsia, perda finanseiru no bele afeta seguransa sosial.

Kanselamentu lisensa ne’e mós fó mensajen katak Governu sei reforsa regulamentu kona-ba atividade ekonómiku digital sira, atu garante proteksaun ba dadus, kontrolu fiskál, no seguransa komunidade.

Rekorda katak, aprovasaun projeitu rezolusaun Governu ne’e, aprezenta hosi Ministru Prezidénsia Konsellu Ministrus, Agio Pereira, ne’ebé determina kanselamentu lisensas ne’ebé fó ba operasaun jogus no apostas online.

Rezolusaun Governu ida-ne’e mós determina kanselamentu prosedimentu lisensiamentu sira ne’ebé la’o hela no bandu lisensa foun sira ba tipu atividade ida-ne’e, haree ba risku sira ne’ebé identifika ona ba nasaun nia seguransa, estabilidade sosiál, integridade ekonómika no reputasaun internasionál.

Ministériu tutela, hamutuk ho forsa seguransa sira sei tau matan ba implementasaun medida sira ne’ebé aprova ona hosi Rezolusaun Governu ida-ne’e.

Entretantu Diploma ne’e mós estabelese revizaun ba lejizlasaun aplikavel, liuliu Dekretu-Lei n. 6/2016, loron 20 fulan-abríl, ne’ebé regula setór ne’e.