Polémika Saúde ! PR Horta Husu Intelektual Sira Haree Didiak Razaun, Hafoin Krítika
Imajem : Prezidente Repúblika José Ramos Hosta iha Comoro, 11/03/2025. Foto : Média PR
SAPNewsTL, Dili : Relasiona ho pasiente ne’ebe moras iha Hospital Nasional Guido Valadares atu transfere ba nasaun vizinhu Nusa tenggara Timur (NTT) Atambua, Presidente Republika husu ba intelektual ka akadémiku sira krítika presiza hanoin no haree razaun.
Xefe Estadu Jose Ramos Horta fo sai lia hirak ne’e, hafoin partisipa iha semináriu nasional loron PNTL ba dala XXV iha Sentru Formasaun Comoro Dili, loron 11 fulan Marsu 2025.
“Ema sira be ko’alia ne’e dalaruma problema Timor ho ita nia intelektual no akadémiku balun seidauk haree didiak razaun saida mak ko’alia ba ida ne’e, Atambua besik, rabat los ho Maliana fronteira ne’e, familia iha sorin, balu timoroan barak iha Atambua ne’eba no sorin rua ne’e hotu no ladun gastu”. Hateten Horta ba Jornalista sira iha Centru formasaun Polisia (CFP) Comoro Dili,11/03/2025
Presidente Repúblika mós esplika oras ne’e governu mós esforsu hela oinsa halo tratamentu ba pasiente sira maibe fasilidade la sufisiente.
“Karik situasaun emergénsia, haruka ba Atambua tanba poblema liliu mak moras rins ne’e, dala ruma HNGV falta makina no la sufisiente ou avaria entaun haruka ba Atambua”. Nia informa
Iha sorin seluk, Sekretáriu Jeral Partidu FRETILIN, Marí Bin Amude Alkatiri sente moe, se polítika nasional mak lori pasiente ba Kapupaten Atambua, nia parte la konkorda ida ne’e tanba orgaun titular soberanu ida ba halo vizita hodi halo polítika.
“Se polítika nasionál saúde Timor-Leste nian mak ida ne’e, ha’u la konkorda, se pasiente hela iha Maliana ne’ebé besik tanba iha kondisoens hakarak ba diak, sai fali polítika tanba ita la konsege tau sasan atu ita nia sistema funsiona, ne’e halo ha’u moe, labele iha titular orgaun soberania ida ba hamutuk ho poupati ida ba vizita ospitál para apresenta dehan ne’e diak, titular orgaun soberania representa dignidade Timor nian”. Hatete Mari Alkariti iha Farol, 12/03/2025
Alkatiri konsidera Timor-Leste gasta ona osan hamutuk billiaun 23 USD maibe saúde no edukasaun kontinua la funsiona inklui laiha desenvolvimentu sustentavel.
“Ita gasta ona osan por volta de $ 23 Mil Milhões de dolares iha ita nia rain, saúde la funsiona, edukasaun la funsiona no desenvolvimentu sustentavel laiha, ita mak dehan Objetivu Dezenvolvimentu Sustentavel (ODS) maibe ita la hatene saida mak ita ko’alia, labele deklara fali funu kontra ema kiak”.
“Ha’u ne’e ko’alia tanba ha’u nia ulun ne’e moos, ha’u la tauk, ha’u hakarak kontribui para los ita hametin, buat ruma ke sala ita tenki hadia, la’os ha’u nia funsaun atu akuza no fo sala ema ida, ha’u nia konsiénsia moos”. Alkatiri deklara
Ligadu ho asuntu ne’e, Primeiru Ministru Kayrala Xanana Gusmão deklara “La’os katak atu haruka hotu ba Atambua, balu dehan haruka ba halo ita moe, tanba sa mak haruka fali ba Atambua, ha’u rekunhese, ha’u dehan tiha ona ba Presidente Repúblika”. Hatete Xanana iha Palasiu Presidensial Aitarak Laran,13/03/2025
Primeiru Ministru mós hatutan atu transfere pasiente ba Atambua, nia parte sei haree mós kondisaun no la’os haruka pasiente sira ba hodi taka tiha Hospital Nasional Guido Valadares ho sigla (HNGV).
“Atu ba haree kondisões iha ne’eba, karik iha moras ruma ne’ebé ita presiza, ita haruka ba la’os atu haruka hotu tiha para taka tiha Hospital Nasional Guido Valadares (HNGV)”. Nia deklara.
Jornalista : Vinsensius Saldanha Morais De Araujo
