Ponte Kasnafar Hanaran SekJer ONU Kofi Annan, Kompanha Seidauk Finaliza Estrada
Imajem : Ponte Secretário Geral Organizações das Nações Unidas (ONU) Kofi Atta Annan. Dili, 10/03/2025.
SAP News TL Díli : Tékniku hadia ona Ponte Kasnafar ne’ebé antes ne’e hakerek sala, ohin dader ekipa tékniku hadia ona ba Ponte Secretário Geral Organizações das Nações Unidas (ONU) Kofi Atta Annan.
Ponte Secretário Geral Organizações das Nações Unidas (ONU) Kofi Atta Annan hari’i iha tinan 2023 ho medida metru hitunulu (70 metros), ho montante orçamentu hamutuk $ 3.632.896,16 dolares americano. Projetu refere ho durasaun tempu hamutuk fulan sanulu resin-rua (12 Mezes).
Ponte ne’e konstroi hosi Companhia Carya Timor-Leste (CTL), to’o oras ne’e seidauk halo inaugurasaun tanba seidauk finaliza estrada diresaun Manleuana ba Kasnafar.
Imajem : Ponte Secretário Geral Organizações das Nações Unidas (ONU) Kofi Atta Annan
Tuir informasaun ne’ebe Mídia Sapnews asesu iha terrenu katak plaka Ponte Kasnafar ne’ebe monta iha loron Sábadu, 08 Marsu 2025 ne’e monta sala hosi ema indonésiu ida tanba nia parte la intende Secretário Geral UNO Kofi Atta Annan.
Nune’e, ohin dader parte tékniku sira hetan orientasaun no hadia ona plaka refere ho naran los Secretário Geral Organizações das Nações Unidas (ONU) Kofi Atta Annan. tuir mai ekipa tékniku taka ona plaka refere ho lona ba públiku.
Entretantu, estrada no moru protesaun hosi Manleuana ba Kasnafar iha parte balun seidauk finaliza no sedimentasaun barak mós monu taka estrada ne’ebe difikulta Kompanha hodi finaliza ho lais tuir tempu ne’ebé determinadu.
Moru protesaun ne’ebé atu asegura no protege estrada husi mota mós daudaun ne’e kompanha kontraktor kontinua konstroi hahú hosi Ponte Secretário Geral Organizações das Nações Unidas (ONU) Kofi Atta Annan Comoro to’o Secretário Geral Organizações das Nações Unidas (ONU) Kofi Atta Annan Kasnafar.
Fo hanoin fali katak Secretário Geral Organizações das Nações Unidas (ONU) Kofi Atta Annan maka asina akordu 5 Maio 1999 kona ba Referendum ba Timor-Leste hamutuk ho Ministério Negócio Estrangeiro Indonésia Ali Alatas no Ministério Negócio Estrangeiro Portugal Jaime Gama iha Nova Yorke.
Hafoin Timor-Leste realiza konsulta popular iha loron 30 Agustu 1999, Kofi Annan maka anunsia resultadu eleisaun maka hakarak ukun an hetan persentagem hamutuk 78% no pro integração hetan persentagem 21% iha loron 4 Setembro 1999.
Liu tiha tinan 2, Secretário Geral Organizações das Nações Unidas (ONU) Kofi Atta Annan to’o Timor-Leste hodi fo sasin no partisipa restauração da independência República Democrática de Timor-Leste iha Tasi-Tolu, 20 Maiu 2002.
Jornalista : Guilhermino Ramos da Cruz
