Pontífise Husu Sarani Atu “Deskobre An & Maromak Nia Verdade”.

Imajem : Papa Leão XIV. Foto : Vatican News

SAPNewsTL: Papa Leão XIV hateten Maromak la hatudu an husi hanoin abstratu, maibé husi “diálogu aliansa” ne’ebé verdadeiru tanba ne’e ema presiza atu deskobre an no hatene Maromak nia verdade.

Papa Leão sublinha “Maromak la hatudu an husi hanoin abstratu, maibé husi diálogu aliansa ne’ebé verdadeiru, ne’ebé nia koalia ba humanidade hanesan ba sira-nia belun.”

Nia esplika katak kunhesementu ida ne’e la to’o de’it iha komunikasaun kontéudu, maibé “kompartilha istória ida no bolu ita hotu ba komunhaun mutua.” Nia hatete ne’e iha Vatikan, 21/01/2026.

Tuir Leão XIV, plenitude husi Revelasaun mosu iha enkontru istóriku ne’ebé Maromak rasik fo hodi permite ema atu deskobre an no hatene Maromak nia verdade. “Esperiénsia ne’e hetan nia realizasaun kompletu iha Jesus Kristus”.

Papa haktuir katak Oan nudar Filhu hatudu Aman, hodi envolve ita hotu iha relasaun resiproku ho Nia.

“Ita to’o kunhesementu kompletu kona-ba Maromak bainhira ita tama iha relasaun Filhu ho Nia Aman, liuhusi asaun Espiritu.”

Pontífisi hatutan, iha Kristu, Maromak komunika no hatudu ba ema nia identidade verdadeiru. Bainhira ita deskobre katak Maromak hatene ita, ita mos hatene ita-nia vokasaun luan liu.

Leão XIV deklara salvasaun la mosu de’it liuhusi dalan intelektual. “Nia salva no bolu ita la’ós de’it tanba mate no Jesus nia resureisaun maibé tanba nia ema lolos” nia deklara.

Maromak moris na’in ne’ebé enkarna, moris, kura, hanorin, sofre, mate, resureisaun no hela hamutuk ho ita — mak haklaken verdade husi Maromak.

Papa akresenta, revelasaun liu husi nia isin real, husi nia maneira konkreta atu haree no moris iha realidade. “Kristu rasik bolu nia disiplu sira atu kompartilha konfiansa kona-ba mundu no kriasaun husi Aman Kriador.