PR Horta : “Tinan 50 Liuba, Ami Laiha Diploma & Esperiénsia Maibe Iha Koragem Katak Povu Iha Direitu”.

SAP NewsTL, Díli: Iha ambitu komemorasaun tinan 50 loron proklamasaun independênsia, Presidente Republika( PR), Jose Ramos Horta afirma tinan limanulu liuba laiha diploma no experiênsia estadu maibe iha koragem defende direitu ba ukun rasik an no liberdade.

Ohin ita selebra data ida ne’ebé sai iis loos ba ita-nia identidade nasionál: Aniversáriu ba dala-50 Proklamasaun Unilaterál Independénsia Repúblika Demokrátika Timor-Leste nian, La’ós de’it data ida iha kalendáriu; ida-ne’e maka eku moris hosi aten-barani, memória no espíritu ne’ebé labele nakfera hosi povu ida ne’ebé, maski iha oras ne’ebé nakukun liu, nunka lakon fiar no la husik esperansa mate.

Tinan lima nulu liubá, ha’u halo parte iha grupu ki’ik ida hosi joven mehi na’in sira, maioria lahó estudu universitáriu ne’ebé ramata ona, ami barak maka “dropouts”, maibé hotu-hotu dudu hosi buat ida ne’ebé boot liu duké koñesimentu akadémiku: konviksaun ne’ebé maka’as katak Timor-Leste merese atu sai livre.

Ami laiha diploma, maibé ami iha korajen atu imajina buat ne’ebé imposivel.Ami laiha esperiénsia Estadu nian, maibé ami iha serteza katak povu tomak iha direitu ba dignidade, ba autodeterminasaun no ba respeitu entre nasaun sira.

Loron ohin maka loron ida ba reflesaun no reverénsia.Loron ida atu ita hakruk ho respeitu ba Martir no Eroi sira Independénsia nian,

ba vítima inosente sira, ba sira ne’ebé, maski iha ita-nia leet, luta iha ita-nia fileira, hetan akuzasaun nu’udar “traidór”—sira ne’ebé liu tiha ona no sira ne’ebé la’o nafatin hamutuk ho ita.

Sira ne’ebé nia naran hakerek iha istória ka harii iha estátua sira iha nasaun tomak, no sira ne’ebé sei sai anónimu ba nafatin, subar iha livru nia ninin no iha memória nonook família ka komunidade sira-nian, maibé lahó sira ita-nia liberdade sei nunka sai posivel.

Sira maka, dala barak ho sakrifísiu sira-nia moris rasik, harii aliserse sira ne’ebé ita-nia liberdade, ita-nia direitu fundamentál no ita-nia Estadu Direitu Demokrátiku ohin loron hela.

Erói sira-ne’e barak maka prezente iha fotografia sira ne’ebé hatudu iha dalans ira sidade Díli nian no iha materiál ofisiál sira ne’ebé prepara hosi Komisaun Organizadora, ho lema: “Atu selebrasaun tinan 50, hosi pasadu nian, garante mai ita konfiansa iha prezente no esperansa ba futuru.”

Ita hanoin hikas, uluknanain, Membru sira Governu 1975 nian, ne’ebé tinan lima-nulu liubá partisipa iha leitura istórika proklamasaun ita-nia Independénsia nian. Ita mós hanoin, ho admirasaun kle’an, Eis-Kombatente FALINTIL sira ne’ebé, iha ai-laran no iha klandestina, lori todan ne’ebé toos liu hosi rezisténsia armada.

Ita hanoin hikas, ho onra boot, sira ne’ebé mate tiha ona, no ita kumprimenta ho gratidaun sira hotu ne’ebé la’o nafatin hamutuk ho ita, hodi kontinua serbí Nasaun ho aten-barani, dedikasaun no sentidu misaun nian ne’ebé nunka nakdoko.

Entre sira-ne’e, no barak seluk tan ne’ebé nia naran labele inklui iha lista ruma,

maka forsa loloos ita-nia Istória nian — forsa ida ne’ebé halo hosi silénsiu, sakrifísiu no domin ba nasaun.

Fotografia sira ne’ebé namkari iha sidade hanesan omenajen simbóliku ida, maibé nunka kompletu.Fotografia sira la kapta raan, kosar no matan-been hotu-hotu ne’ebé forma ita-nia Luta Libertasaun Nasionál.Ohin barak sei sai anónimu ba nafatin; lian barak lakon ona lahó rejistu; ain-hakat barak mak lakon iha foho no foho-leet sira rezisténsia nian.

Maibé hotu-hotu, maski sira ne’ebé la mosu iha mural sira ka la temi iha diskursu sira, moris nafatin iha ita-nia povu nia memória kle’an no iha aliserse invizível ita-nia liberdade nian. Tanba ne’e mak ohin ita evoka mós figura sivíl no relijioza boot sira ne’ebé, ho korajen morál no ho vizaun umanista, halakan tinan nakukun sira okupasaun nian.

Ita hanoin hikas Knaar Igreja Katólika nian, liuhusi Monseñor Dom Martinho da Costa Lopes ne’ebé labele haluha, Bispu Dom Filipe Ximenes Belo, no mós personalidade sira hanesan Fernando Lassama de Araújo, João Carrascalão no Mário Carrascalão, entre sira seluk — mane sira ho dalan oioin, maibé unidu hosi domin ida de’it ba país no determinasaun ida de’it hodi asegura liberdade no konstrusaun ba baze sira Estadu Timorense nian.

Ohin ita selebra prezente: Timor-Leste ida livre, soberanu no independente no orientadu hosi memória ita-nia eroi sira nian hanesan búsola, ita haree ba futuru ne’ebé ita hakarak no iha kapasidade tomak atu harii—futuru ida ho prosperidade hamutuk, dezenvolvimentu kontínuu no afirmasaun internasionál, ba Nasaun modernu ida, respeitadu no seguru iha nia fatin iha mundu, integradu tomak iha ASEAN no komunidade internacional sira-nian.

Timor-Leste ida ne’ebé la husik atu dadur ho korrente pasadu nian; ne’ebé hili, ho maturidade no grandeza, rekonsiliasaun jenuína ho ita-nia nasaun viziñu sira — Austrália no Indonézia — ho ita-nia parseiru dezenvolvimentu sira no ho nasaun belun sira ne’ebé ita iha namkari iha mundu tomak.

Timor-Leste ida ne’ebé la’o ba oin ho konfiansa, solidariedade no determinasaun, hodi konsolida pás, justisa no progresu ba timoroan tomak.Loron Restaurasaun Independénsia

Señora no Señór sira, Distintu Konvidadu sira,

Iha madrugada loron 20 fulan-maiu tinan 2002, bainhira Xanana Gusmão — estratega, líder no matadalan morál ita-nia Nasaun nian — prezide serimónia ne’ebé hatuun Bandeira Nasoins Unidas no hasa’e Bandeira Timor-Leste ho

orgullu iha Tasi-Tolu, ita moris momentu ida ne’ebé pertense tantu ba Istória no ba sagradu.

Ida-ne’e maka taka siklu ida ne’ebé todan no loke ba orizonte foun ida. Iha ne’ebá maka remata kalváriu ida durante tinan ruanulu-resin-haat; iha ne’ebá maka hahú redensaun povu ida ne’ebé nunka hakne’ak iha destinu nia oin.

Serimónia ne’e hetan mós prezensa hosi Prezidente Repúblika Indonézia, Megawati Sukarnoputri, iha jestu elevasaun polítika ne’ebé boot.Timor-Leste ho Indonézia la’o tuir dalan ne’ebé la hanesan, iha istória tomak,

maibé iha kalan ne’e ami hasoru malu iha pontu komún ida. Iha ne’ebá maka ami foti pasu dahuluk sira hodi kura memória sira ne’ebé difísil, rekonsilia fuan sira no hahú konstrusaun ezijente ba ita-nia demokrasia.

Ohin loron, ita-nia nasaun sira sai hanesan prova moris katak dame bele moris hikas mesmu depois-de-epizódiu sira violénsia no terus nian.Ita fahe fronteira rai no tasi nian — maibé, liu fali ida-ne’e, ita fahe lasu klean sira ne’ebé harii hosi fiar, komérsiu, edukasaun no valór sira konvivénsia no fraternidade nian.

Movimentu Reformasi iha Indonézia, ne’ebé dudu hosi foin-sa’e sira no demokrata sira ne’ebé aten-barani, hetan iha Prezidente B. J. Habibie estadista ida ne’ebé iha kapasidade atu rona, halo diálogu no atua. Nia mak, ho vizaun no korajen, loke dalan ba Konsulta Populár iha tinan 1999, ne’ebé organiza iha Nasoins Unidas nia okos.

Esperiénsia istória nian — tantu depois husi konflitu ida ka depois husi funu polítiku ida — hanorin ita katak vitória loloos nunka ezije umillasaun ba ema ne’ebé lakon. Líder matenek sira rejeita tentasaun vingansa no arrogánsia nian.Iha kontráriu, sira la’o hasoru malu, oferese liman rekonsiliasaun nian no

konvida ema hotu atu hamriik hodi harii, hamutuk, dame ida ne’ebé dura ho baze iha konfiansa, dignidade no respeitu ba malu.

Kanek sira, tantu isin nian no klamar nian, sai klean liután bainhira laran-moras maka haburas; maibé kanek sira-ne’e hahú kura bainhira líder sira ne’ebé laran-luak no inspiradór orienta sosiedade sira liuhosi terrenu difisil tranzisaun no memória nian.

Ita-nia relasaun ho Indonézia ultrapasa esfera polítika: ida-ne’e hetan apoiu hosi patrimóniu kulturál, linguístiku no familiár sira ne’ebé reforsa ita-nia integrasaun tomak iha ASEAN nia laran.

Ita maka nasaun maun-alin sira, ne’ebé unidu husi pasadu, husi jeografia no husi aspirasaun sira ba futuru — parseiru sira iha dezenvolvimentu no komprometidu atu harii rejiaun ida ne’ebé pasífiku, prósperu no solidáriu.Iha momentu sira ne’ebé buat hotu parese lakon. Lideransa hetan kanek, no

tinan sira funu no hamlaha nian — entre 1975 no 1981 — halo ita-nia povu sai kole no ita-nia komandante sira kuaze mate hotu. Maibé, maski iha kalan nakukun liu iha ita-nia Klamar, esperansa kontinua baku, ho ulun-toos, iha Timoroan sira-nia fuan.

Kay Rala Xanana Gusmão, sobrevivente Matebian no serku boot sira, kole maibé metin hanesan fatuk ne’ebé tahan laloran, rona nia Povu nia murmurasaun.Nia rona hakilar nonook hosi nasaun ida ne’ebé nakonu ho raan no, ho ida-ne’e, hasai liafuan sira ne’ebé sei muda Istória nia lala’ok: “Ita la’o nafatin ba oin.”

Ho korajen no klareza, nia reorganiza FRETILIN, hadame movimentu ho ita-nia kultura bei-ala sira-nian no ho fiar katólika ne’ebé nunka abandona ita, hodi fó fali ba povu hakuak espirituál Igreja nian.

Nia despartidariza FALINTIL, hasa’e sira husi liman militár ba klamar nasionál, transforma sira ba forsa ida ba ema hotu no husi ema hotu. No nia orienta luta rezisténsia nian—silénsiu, persistente, invensível—iha foho sira, iha sidade sira ne’ebé okupadu, iha aldeia sira ne’ebé dook no to’o iha metrópole boot Indonézia nian no internasionál sira-nia fuan. Nia maka estratega iha frente oioin, iha epopeia ida ne’ebé lori ita hosi derrota sira ne’ebé besik hamosu buat aat iha 1977-1981 to’o kalan gloriozu iha loron 20 fulan-maiu tinan 2002.

Xanana no Timor-Leste hanesan Fénix ne’ebé, husi ahu-ruin suar destruisaun nian, moris fali ho liras ne’ebé luan liu no klamar ne’ebé moos liu.Husi katástrofe sira serku no anikilamentu sira nian, hosi lakon sira ne’ebé labele hadi’a no konflitu internu sira, nia salva ita-nia povu nia fuan nia tukun, no hamoris fali ahi-lakan ne’ebé halo nabilan ita-nia destinu ohin loron.

Ninia vizaun, korajen no matenek fó forsa ba rekonsiliasaun nasionál no loke dalan ba normalizasaun relasaun sira ho Indonézia foun—pasu esensiál ida ba pás duradoura no estabilidade ne’ebé sustenta ita ohin loron.

Espera katak memória kona-ba hahalok sira-ne’e fó hanoin mai ita, ba nafatin, katak fiar no esperansa nunka mate no espera katak, maski kalan pares e laiha rohan.

Timor-Leste komemorasaun proklamasaun Independênsia unilateralmente ba dala 50 (28/11/1975-28/11/2025). Timoroan hotu ho orgullu fo onra no glória ba herói funu na’in sira.

Komemorasaun Loron Proklamasaun Unilaterál Independénsia RDTL bá dala-50 (28 Novembru 1975 – 28 Novembru 2025) ho tema “𝐂𝐞𝐥𝐞𝐛𝐫𝐚𝐫 𝐚 𝐇𝐢𝐬𝐭𝐨𝐫𝐢𝐚 𝐞 𝐂𝐨𝐧𝐬𝐭𝐫𝐮𝐢𝐫 𝐨 𝐅𝐮𝐭𝐮𝐫𝐨”.

Komemorasaun iha tinan ne’e, Governu afirma Lema ba Loron nasionál ne’e mak, “𝐐𝐮𝐞 𝐚 𝐜𝐞𝐥𝐞𝐛𝐫𝐚𝐜ã𝐨 𝐝𝐞𝐬𝐭𝐞𝐬 𝟓𝟎 𝐚𝐧𝐨𝐬, 𝐝𝐨 𝐩𝐚𝐬𝐬𝐚𝐝𝐨, 𝐧𝐨𝐬 𝐚𝐬𝐬𝐞𝐠𝐮𝐫𝐞 𝐜𝐨𝐧𝐟𝐢𝐚𝐧ç𝐚 𝐧𝐨 𝐩𝐫𝐞𝐬𝐞𝐧𝐭𝐞 𝐞 𝐞𝐬𝐩𝐞𝐫𝐚𝐧ç𝐚 𝐧𝐨 𝐟𝐮𝐭𝐮𝐫𝐨!”.

Komemorasaun ida ne’e hodi fó onra ba nasaun nia luta naruk ba liberdade no independénsia, rekoñese povu Timor nia kontribuisaun sira iha istória tomak, no reafirma nasaun nia kompromisu atu harii futuru ida ne’ebé demokrátiku no prósperu Paz no Estabilidade.

Parabéns no Parabéns Ba Povu Timor-Leste