Prepara Adezaun TL Ba ASEAN, Funsionáriu PR Atende Formasaun Servisu Protokolu
Imagem Funsionariu Prezidensia da Republika iha Palasiu Nobre Lahane Dili, 30/09/2022
SAPNewsTL (Dili) : Funsionáriu Prezidénsia Repúblika na’in-26 partisipa formasaun bázika bá protokolu durante loron lima, husi loron 26 to’o 30 fulan Setembru tinan ida-ne’e, iha Palásiu Nobre Lahane, objetivu husi Formasaun ne’e hodi dezenvolve instituisaun ne’e, tuir kultura no étika servisu professional tuir prosedimentu protokolu ida iha padraun no adekuadu.
Tuir Xefe Kaza Sivil Prezidénsia Repúblika, Bendito dos Freitas konsidera, formasaun ne’e importante tebes, koinsidénsia mós ho esforsu Timor-Leste atu adere ba ASEAN.
“Ita tama ASEAN servisu protokolu ne’e makas liu, tanba ne’e mak MNEK hamutuk ho ita sei iha formasaun tan servisu makas, tanba delegasoens, komferénsias ne’ebé presiza atendimentu protokolár ne’ebé sufistikadu oituan, integradu,” tenik Xefe Kaza Sivil iha Palasiu Nobre Lahane, 30/09/2022.
Entretantu, Bendito Freitas sente haksolok tebes, tanba foin tama Palásiu PR, hahú ho pasu dahuluk liu husi formasaun bázika bá funsionáriu sira hodi eleva liután kuiñesimentu funsionáriu protokolu sira nian.
Iha sikun seluk, Reprezentante Formandus, José Violante da Silva Reis, lori formandus 26 nia naran agradese bá Xefe Kaza Sivil nomos formadora sira husi MNEK ne’ebé fasilita formasaun protokolár nian bá sira durante loron lima
“Ami-nia objetivu mai iha ne’e atu upgrade ami-nia knowledge, ami-nia skills ho ami-nia atitude kona-ba servisu protokolu nian,” dehan José Violante.
Entretantu, matéria espesífiku ne’ebé formadora sira oferese ba formandus sira mak hanesan, jestaun dokumentu no arkivu, maneira atendimentu no guia bainaka VVIP no VIP sira iha serimónia ofisiál ruma.
Formadora bá formasaun ne’e mai husi Ministériu Negósiu Estranjeiru no Kooperasaun (MNEK), na’in-rua mak hanesan, Eis Diretora bá Assuntu protokolár MNEK no atuál Diretora bá Assuntu ASEAN Elisa da Silva
Formasaun refere taka ho prátika simulasaun kona-ba servisu protokolár nian iha serimónia jantar estadu nian ne’ebé hala’o iha Palásiu Nobre Lahane, Dili.
Jornalista : Vinsensius Saldanha
Editor : Luis Pailofo