Presidente AJTL Husu Makaer Ukun Respeitu Servisu Jornalístiku
Imajem : Presidente AJTL Zevonia Vieira iha Largo Lecidere, 03/05/2025
SAPNews TL, Díli : Ligadu ho ranking-index liberdade imprensa Timor-Leste nian tun husi top 20 ba 39 iha tinan ne’e, Presidente Asosiasaun Jornalista Timor Lorosa‘e (AJTL) Zevonia Viera, husu ba politika nain sira atu respeita jornalista sira, bainhira hala’o misaun jornalismu iha terenu.
Presidente AJTL Zevonia Viera hateten, Liberdade Imprensa ne’e hanesan parte fundamental direitu humanu ne’ebe sai hanesan xave ba identidade Jornalista iha mundu.
“Ukun nain sira presija komprende katak iha konstituisaun RDTL artigu 40° no 41° iha ne’eba garante ona katak ita iha liberdade imprensa no mós iha asesu informasaun, ita husu ba governu, instituisaun publiku sira oinsa atu respeita jornalista nia servisu.” Dehan Presidente AJTL Zevonia Viera ba SAPNews iha Jardin Largo Lecidere, Sabadu (03/05/2025)
Lider masimu AJTL ne’e fundamenta, média hanesan pilar importante ba nasaun demokratiku, nune’e politika nain sira labele kontinua impede ka iha tentativa atu influensia politika sala redasaun, Tenik nia.
“Tendênsia Politika maka’as signifika ita hamate demokrasia iha Timor-Leste, wainhira demokrasia mate, signifika liberdade imprensa mós mout no lia los mós laiha, tanba aparelu estadu nian halo intervensaun ba atividade ne’ebe jornalista sira hala’o,” Nia Subliña.
Tuir nia, governu presija tane aas misaun jornalista nian, tanba média hanesan pilar importante iha nasaun demokratiku, hodi koalia lia los, tuir publiku nia hakarak, no promove demokrasia Timor-Leste nian.
“Ohin loron, ita selebra loron mundial liberdade Imprensa ho tema ne’ebe mak iha mundu foun ho brani haree kona-ba futuru, ida ne’e hatudu katak oinsa ema hotu iha era digital, bele respeita jornalista sira, tanba papel media esensiál tebe-tebes iha nasaun ida ne’e”.
Presidente AJTL mós husu ba jornalista sira atu luta iha plataforma digital hodi kontinua halo servisu ne’ebe diak, kritika no mós promove asuntu ne’ebe mak konaba direitu humanu.
“Liberdade Imprensa sai baze fundamental ida atu haburas no promove demokrasia, bainhira liberdade Imprensa ne’e diak signifika públiku iha espasu ne’ebe mak diak atu espresa preokupasaun interese públiku nian, tanba ne’e ba media no jornalista sira atu kontinua promove asuntu direitu ema nian iha Timor-Leste”. Nia hakotu.
Enkuantu, tuir relatóriu NGO internasionál Reportagem Sein Fronteiras (RSF) hatudu katak ranking liberdade imprensa Timor-Leste nian tinan ne’e tun husi 20 ba 39 tanba kauza hosi intervensaun governante, influênsia poder judisial, problema sosial no ekonomia média nian.
Reportajen : Ekipa Kobertura