Presidente KJ-IPB Afirma Eleva Kualidade & Integra Graduadu Ba Grande Projetu Sira

Imajem : Presidente Konsellu Jeral IPB Brígida Antonio Correria iha Manufahi, 25/04/2025

SAPNewsTL, Manufahi : Hafoin Institutu Politekniku Betano (sigla postugés, IPB) realiza eleisaun ba prezidente foun periodu 2025-2029, Prezidente Konsellu Jeral IPB deklara uluk loke IPB laos atu ba hetan S1 ka S2 maibe atu integra ba kampu de traballu hanesan projetu Kosta Sul inklui refinaria.

Hari’i IPB para bainhira sira remata sira nia eskola iha D2 ka D3 sira tenke ba servisu kedas iha fatin sira hanesan Refinaria no Supplay Base, nune’e bele absorve sira nia matenek ka skill. Tan ne’e estudante sira labele pessimista tanba estrutura foun sei halo esforsu hodi dezenvolve IPB ba futuru.

“Ba estudante sira, labele pesimista ami hanesan Prezidente Konsellu Jeral ho membru sira, ami tenta nafatin eleva sira nia kualidade no oinsa buka dalan ba sira para sira bele iha kontinua estudu, buka fatin ba sira oinsa bele integra iha projetu boboot ne’ebe maka governu halo hela iha Costa Sul”.Dehan Prezidente Konsellu Jeral IPB Brigida Antonia Correia liu hosi nia diskursu iha salaun IPB Manufahi, (25/04/2025).

Brigida Antonia Correia hateten, kandidatu nain hitu halo kampanha hodi hato’o sira idak-idak nia programa no planu, saida maka sira bele halo durante mandatu tinan haat nia laran.

“Kampanha ne’ebe maka ohin loron ami tau ba ajenda iha loron 25 ne’ebe aprova ona hosi Konsellu Jeral, ohin loron kandidatu nain hitu hahu hosi dader sira komesa halo kanpanha hodi hato’o sira nia programa ba públiku no partisipante sira iha ne’e atu haree saida maka sira hanoin atu bele hala’o iha programa no planu asaun durante sira nia mandatu iha tinan haat nia laran”. Dehan Prezidente Konsellu Jeral IPB

Prezidente Konsellu Jeral akresenta “Membru Konsellu Jeral ami hamutuk sanulu resin tolu, membru ida eskluidu tanba nia mos kandidatu aan ba Prezidente entaun ami hamutuk sanulu resin rua”.

Nia esklarese, votasaun faze dahuluk kandidatu nain tolu maka hetan votus maibe tuir estatutu wainhira kandidatu ne’ebe hetan votus maioria sei kompete ba faze daruak nian.

“Kandidatu ba Prezidente iha primeira ronde nain tolu maka hetan votus maibe tuir estatutu katak wainhira iha votus la maioria sei kontinua ba segunda ronde, iha segunda ronde ita hetan kandidatu nain rua mak hetan votus, ida hetan 7 votus ho 58,33% no ida fali hetan votus 5 ho 41,67%”.

“Tanba ne’e liu hosi votus membru konsellu Jeral hili Dr. Alcino sai hanesan Prezidente eleitu ba tinan haat nia laran no ida seluk ami tenke esklui maibe ami propoen oinsa maka kandidatu ne’ebe mai maske la hetan votus maibe sira tenke kontribui nafatin”.

Prezidente Konsellu Jeral informa, kandidatura Alcino da Costa I. A Fernandes maka sai prezidente eleitu, tan ne’e Prezidente eleitu presiza akomoda ema hotu nia hanoin inklui Ministru Ensinu Superior Siensia no Kultura nian oinsa bele dezenvolve IPB ho diak nu’udar timoroan.

“Kandidatu Alcino da Costa nu’udar Presidente eleitu, nia sei konsidera hotu-hotu nia hanoin inklui Ministru nia hanoin tanba nia sei junior oinsa maka bele akomoda senior sira nia hanoin hodi akumula hamutuk bele dezenvolve IPB”.

Brigida Antonia espera Prezidente eleitu nafatin iha nosaun ida hodi servisu hamutuk ho Konsellu Jeral sira tanba programa hotu sei aprova liu hosi sira hafoin implementa.

“Ami espera katak Prezidente ne’ebe maka eleitu ona tenke nafatin iha nosaun ida hodi servisu hamutuk ho ami, tanba sira nia programa no orsamentu durante iha atividade ami mak sei aprova hafoin sira hala’o, nune’e tenke iha liña komunikasaun hamutuk atu hala’o servisu ne’ebe diak hodi dezenvolve IPB”.

“Labele iha kontradisaun ba malu karik iha hanoin ne’ebe lahanesan buka oinsa atu armoniza hanoin sira ne’e, atu bele lori IPB ba futuru no lori ita nia estudante ba dalan ne’ebe nabilan”. Nia hatutan.

Presidente IPB Eleitu Alcino da Costa I. A Fernandes

Prezidente Eleitu IPB Alcino da Costa I. A Fernandes konsidera hamrik hodi kandidatu la’os tanba oportunidade maibe tanba hakarak asume responsabilidade

“Ha’u mai hamrik la’os tanba ha’u mak diak liu no laos mós ha’u mak hatene liu, laos tanba oportunidade maibe tanba responsabilidade hanesan Manufahi oan ne’ebe ho laran no lolo liman hakarak tulun IPB”.

“Agradese rohan laek ba fiar tomak ne’ebe maka estrutura Konsellu Jeral IPB fó ba ha’u, hosi ita boot sira nia votus no ha’u nia konsiente katak votus hirak ne’e importante hodi kontribui ba melloramentu dezenvolvimentu IPB ho kualidade”.

Alcino afirma katak nia parte sei loke an hodi rona hanoin krítiku no konstrutivu ho ekipa ida sai espíritu ida deit.

“Ha’u sei nakloke aan hodi simu ideia konstrutivu no kritiku hotu hodi hadia diak liu IPB hodi sai Instituisasun ida ne’ebe diak no kualidade. Mai ita kaer metin liafuan save ida katak one team one spirit, ne’e katak IPB atu sai diak liu tan presiza ita hamutuk sai ekipa ida deit no tenke iha espiritu ida deit”.

Votasaun iha ronda dahuluk kandidatu Julião Pereira hetan votu 4 ekivale 33,33%, Alcino da Costa I. A Fernandes hetan votu 5 ekivale 41,67%, Pedro de Deus hetan votu 3 ekivale 25,00%, kandidatu na’in haat seluk laiha votus. Enkuantu resultadu ne’e hatudu laiha kandidatu ne’ebe manan maioria.

Nune’e, tuir estatutu Konsellu Jeral deside tama ba ronda daruak, nune’e resultadu hatudu Julião Pereira hetan derrota ho 5 votus 41,67%
no Alcino da Costa I. A Fernandes =
hetan 7 votus 58,33%.

Jornalista : Conzita Mota & Marciana Da Conceição