Presidente Repúblika To’o Singapura, PR Horta Sei Partisipa Forum Emprezariál

SAPNewsTL, Singapura : Prezidente Repúblika, José Ramos-Horta ho delegasaun to’o iha Aeroportu Internasionál Changi Singapura ho aviaun Singapore Airlines no simu diretamente husi Adjuntu Ministru Negósiu Estranjeiru Singapura, Mohd Osman no Embaixadora Timor-Leste iha Singapura, Maria Viegas Carrascalão.

Delegasaun Xefe Estadu kompostu  husi membru parlamentu na’in lima no Ministru Koordenadór Assuntu Ekonómiku, Joaquim Amarál.

Xefe Estadu hahu viajen iha loron 6 fulan Dezembru ho aviaun komersiál Air Asia no tranzita Bali (Indonézia), hafoin kontinua viajen no to’o iha Singapura iha tuku 22:00 orseik (Oras Singapura) no kontinua ba otél ne’ebé prepara ona.

Ajenda vizita Prezidente Repúblika hahú ho vizita bá Embaixada Timor-Leste iha Singapura.

Programa ofisiál Estadu nian markadu iha loron 8 fulan Dezembru ho enkontru entre Prezidente Repúblika José Ramos-Horta ho nia homólogu husi Singapura Halimh Yacob no Primeiru Ministru, Lee Hsein Loong.

Xefe Estadu mós sei partisipa iha forum emprezariál ne’ebé organiza husi Governu Timor-Leste ho apoiu husi setór Privadu rai rua, halo mos palestra iha institutu Yusof Ishak no sei partisipa mós iha entrevista ho media balun.

 Timor-Leste no Singapura estabele relasaun diplomátiku hahú kedas iha Maiu tinan 2002, hafoin Timor-Leste restaura nia independénsia.

Entertanto:Prezidente Repúblika ho delegasaun sei to’o hikas iha Timor-Leste iha loron 11 Dezembru 2022 ho voo diretu husi Singapura mai Timor-Leste.

Jornalista : Vinsensius Morais De Araujo