SEJD & SEA RADO  Realiza Seminariu  Anti Dopazen Ba Federasaun Desportiva Sira

SAP News TL, DILI : Sekretariu Estadu Juventude Desportu (SEJD) ho Shoutheast Asia Regional Anti Doping Organization (SEA RADO)  realiza seminariu anti dopazen  ba federasaun desportivu iha Timor-Leste hamutuk 11, nune’e atleta sira bele prepara an diak antes partisipa kompetisaun internasional ha futuru.

“Seminariu ne’e ko’alia anti dopazen ohin loron  ne’e importante tebes ba ita nia federasaun desportivu no atleta sira iha ita nia rai ne’ebe prepara ba jogu sudeste aziatiku iha tinan oin ne’ebe important ba atleta sira hahan ne’ebe presiza konsumsu no labele han tan ne’e halo seminariu ida ne’e para ita nia atleta no treinador sira partisipa atu nu’une bele hatene saida mak anti dopazen ne’e”, dehan diretora alta kompetisaun SEJD Maria L. Monteiro ba jornalista sira iha edifisiu SEJD Lecidere, Dili kuarta (7/12).

Diretora ne’e akresenta, seminariu hanesan sira sei kontinua hala’o nafatin tanba durante tinan rua iha situasaun covid-19 la iha atividade fahe informasaun anti dopazen ba atleta sira maski Timor-Leste sai ona membru SEA RADO ne’ebe parte governu sei servisu hamutuk ho konfederasaun para identifika atleta sira  ne’ebe seidauk tuir formasaun para atleta sira iha kunesimentu ba anti dopazen nian.

Iha fatin hanesan Diretor Jeral SEA RADO Gobinhatan Nair hatete, Timor-Leste asina ona konvesaun no kodigu anti dopazen international nian ne’ebe nasaun hotu-hotu iha idak-idak nia regulamentu rasik ba anti dopazen nian ne’ebe atleta sira ne’ebe atu kompetisaun internasional tenki tuir  regulamentu anti dopazen nian

“Timor-Leste asina ona konvesaun anti dopazen  no kodigu internasional anti dopazen nian ne’ebe  nasaun idak-idak iha regulamentu anti dopazen nian ne’ebe nasaun sira tenki tuir regulamentu ne’e no atleta sira ne’ebe atu partisipa kompetisaun ne’e sira hola parte iha federasaun ne’ebe sira hotu tenki halo tuir regulamentu anti dopazen nian selae hetan sansaun ne’ebe atleta sira tenki iha edukasaun kona ba saida mak anti dopazen no oinsa halo prevensaun”, tenik diretor jeneral SEA RADO

Gobinhatan hatutan, Timor-Leste mos agora iha tiha ona Doping Control Officer (DCO) ne’ebe sei halo tested dopazen ba atleta sira karik presiza ne’ebe sample mi atleta sira ne’ebe DCO Timor-Leste foti sei ba tested iha Laboratorium Qatar tanba fatin ne’e hetan akreditasaun iha mundu nian no SEA RADO ne’e hola parte iha World Anti Doping Association (WADA) ne’ebe toma konta anti dopazen ba nasaun 11 ne’ebe iha sudeste aziatiku.

Iha sorin seluk treinador Federasaun Basketebol Nasional Timor-Leste (FNBTL) Jose Julio konsidera seminariu ne’e importante tebes ba federasaun desportivu iha Timor-Leste atu nune’e bele hatene fahe informasaun ba atleta, klube no asosisaun atu nune’e hatene antes atleta tuir kompetisaun

“Seminariu ne’e importante tebes ba ita nia federasaun desportivu sira iha Timor-Leste. ita bele hetan informasaun ba anti dopazen nian atu nune’e bele fahe ba ita nia klube,  asosiasaun no atleta sira para hotu-hotu iha kunesimentu antes ba partisipa kompetisaun iha rai laran no rai liur , selae implika ba ita nia atleta sira iha eventu internasional sira no  dopazen ne’e ita nia atleta sira bele hetan husi hahan no herbal ho suplemen sira ne’e” tenik Julio

Entretantu atleta no treinador federasaun desportivu iha Timor-Leste ne’ebe partisipa iha seminariu ne’e mak federasaun taekwondo, sepaktakrau, natasaun, atletizmu, aikido, karate, voleibol, tiru, halterofilizmu, andebol no siklismu

Reportajen: Augusto dos Santos