Problema Iha Festa & Sona Damazo Ne’ebe Laiha Relasaun, Autor Kazu Ponte Habibie Kapturadu

SAPNewsTL, Dili : Iha loron tersa feira orseik, Servisu Investigasaun Kriminal Nasional (SIKN), hamutuk ho Servisu Sekreta forsa rua ne’ebe envolve Servisu Informasaun Polisia Nasional (SIPN-PNTL), Aranha, Makikit, Servisu Informasaun Militar (SIM-F-FDTL), Unidade Falintil, J2 junta ho Servisu Nasional Intelijensia (SNI) ba foti ona suspeitu mane nain-1 envolve iha kazu tentativa omesidiu ne’ebe akontese iha area Bidau besik Ponte BJ Habibie.

Tuir Informasaun ne’ebe SAP News Timor Leste asesu liu husi pajina facebook Servisu Relasaun Publikas haktuir, akontesimentu ida ne’e, Komandu Jeral PNTL hola medida polisiál liu hosi servisu sekreta lansa vizilansia iha teritoriu nasional hodi buka tuir suspeitu ne’ebé mak sai autór prinsipál bá kazu asaltu no tentativa omisídiu ida ne’e no Komandu PNTL Munisipiu Manufahi halo kapturasaun ba suspeitu joven mane ida ho naran inisial OdcX, tinan 21, hosi Fatuberliu, Munisipiu Manufahi no hela iha Bidau Masaur.

Entretantu, Iha prosesu identifikasaun, suspeitu deklara kronolojia katak nia ba festa iha paradise Areia Branca-Cristo Rei, ho kondisaun lanu dansa isin kona malu mak suspeitu OdxX ho ema atu baku malu, (laos legadu ne’ebe nia sona), nune’e mosu dezentendimentu fíziku no suspeitu la satisfás fila ho motor marka Honda Scopy kor mean metan, Xapa matrikula P. 6232, mai foti kroat (tudik) iha uma Bidau Masaur Raihun no lori fila-fali ba iha festa maibe suspeitu la konsege hetan nune’e suspeitu sona fali ema seluk ho naran Damazo Correia Guterres (DCG) iha parte kotuk laran ho tudik iha área Bidau Lecidere, besik ponte BJ Habibie ne’ebe laiha ligasaun ho dezentendementu iha festa refere. Hafoin sona tiha vitima iha Ponte BJ Habibie, kalan ne’e kedas suspeitu ho motor halai ba subar iha Fatuberliu-Manufahi.

Enkuantu, vitima ho naran kompletu Damazo Correia Guterres, tinan 30, hosi Basarawai, Haeconi, Postu-Administrativu Baguia, Munisipiu Baucau, hela iha Aldeia Bekusi Sentru, Suku Becora, Postu-Administrativu Cristu-Rei, Munisipiu Díli, hetan asaltu no tentativa omisídiu agravadu iha loron 07 janeiru 2023, iha tuku 21:45 Otl

Nune’e, Hafoin hetan sona iha parte kotuk laran no tudik belit hela iha nia kotuk laran, vítima Damazo Correia Guterres, sa’e rasik ninia motór konsege ba to’o iha Ospitál Nasionál Guido Valadares (HNGV), Bidau, Dili, atu hetan tratamentu saúde, portantu agora daudaun vitima baixa hela iha hospital

Portantu, autor deskonfia sona Damazo Correia Guterres transporta hosi Komandu PNTL Munisipiu Manufahi mai Quartel Jeral Caicoli Dili, ekipa SIKN oras ne’e daudaun aselera ninia prosesu tuir prosedimentu krime ne’ebé mak iha hodi submete bá prosesu investigasaun durante oras 72 nia laran, wainhira konklui sei aprezenta ba Tribunal Distrital Dili hodi submete ba iha Primeiru Interogatoriu.

Jornalista : Marcela mery da Costa