Promove Damen ! KI & HWPL Fasilita Formasaun Jornalismu Ba Paz

Imajem : Entrevista Presidente Konsellu Imprensa Otelio Ote iha Knaar Fatin Kintal Boot, 21/06/2024

SAPNewsTL, Díli – Konsellu Imprensa de Timor-Leste (CI sigla Portugués) servisu hamutuk ho Organizasaun Kultura Selestial Dame Restaurasaun da Luz, sei promove paz iha Timor-Leste liu husi formasaun edukasaun paz ba Jornalista Timor oan sira.

Prezidente Konsellu Imprensa Otelio Ote hateten, formasaun jornalismu ba paz ne’e realiza tanba KI servisu hamutuk ho Organizasaun Dame Internasionál Heavenly Culture World Peace Restoration off Linght (HWPL sigla Inglês).

“Formasaun jornalismu ba paz ida ne’e Konselho Impresa mak husu tulun husi Organizasaun Dame Internasionál Heavenly Culture Word Peace Restoration off Linght. tamba ita hatene katak Timor-leste moris iha rekonsiliasaun ba paz, entaun jornalista sira presiza entende kona ba asuntu edukasaun paz, bainhira hala’o kobertura iha terenu”.Dehan Prezidenti KI Otelio Ote ba Jornalista sira iha salaun KI Kintal Bo’ot, Sexta (21/06/2024)

Nia hatutan, liu husi formasaun ida ne’e jornalista sira iha konesimentu kona ba jornalismu ba paz no mos muda karakter husi média sira, oinsa kobertura materia paz, no oinsa halo publikasaun notisia iha média ne’ebe iha valor paz hodi enkoraja sosiedade moris iha dame nia laran.

“Iha ita nia rai presiza tebes-tebes, jornalista sira preiza halo kobertura kona ba asuntu paz, ita agradese ba HWPL ne’ebe bele responde ona ita nia pedidu hodi bele realiza formasaun ohin nian”.

Formasaun ida ne’e fasilitador sira apresenta materia jeral relasiona ba asuntu tékniku jornalista kona ba paz nian, jornalista sira ne’ebe partisipa bele intende konhese ona saida mak fundu jornalismu paz, iha tempu tuir mai ho nivel ne’ebe fundu téknika produtu sustentavel.

Enkuantu, Prezidente orgaun reguladora média nasionál ne’e hao’o mensajen ba Jornalista no nain ba média nasionál sira atu bele entende asuntu edukasaun ba paz hodi hasa’e jornalista sira nia koiñesementu no abilidade bainhira hala’o kobertura no publikasaun notisia.

“Formasaun hanesan ne’e tenke partisipa, média sira iha sensibilidade atu partisipa iha formasaun maka sei atinji ho kualidade diak, ita nia rekursu humanu kadi bebeik, tanba ita nia konesimentu importante tebes atu nunne’e hadomi ita nia profisaun iha tempu naruk”. Otelio Ote hateten

Entretantu, antes ne’e iha tinan 2023 Konsellu Imprensa Timor-Leste asina ona memorandu off Undartanding entre KI ho Organizasaun Dame Internasionál Heavenly Culture World Peace Restoration off Linght kona ba asuntu edukasaun paz.

Jornalista : Dircia Baptista Belo