Promove Paz ! Mídia LABEH, RCC, RL, Hatutan & SAPNewsTL Selebra Akordu Ho HWPL
![](https://sapnewstl.com/wp-content/uploads/2024/07/IMG-20240714-WA00112.jpg)
Imajem : Delegasaun HWPL Husi Corea Sul hamutuk SEKOMS Espedito Dias Ximenes, Presidente KI Otelio Ote no Lideransa Mídia Lima Iha Salaun KI Kintal-Boot Dili, 13/07/2024. Foto : Dircia Baptista Belo
SAPNnews TL, Dìli – Organizasaun Internasional Heavenly Culture, World Peace And Restoration of Light (HWPL) servisu hamutuk ho Konsellu Imprensa hili Midia Nasional lima hanesan Hatutan, Radiu Liberdade, Radiu Comunidade Comoro, LABEH no SAPNewsTL asina nota entenimentu hodi haklaken damen liu husi kobertura orgaun komunikasaun iha Timor-Leste.
HWPL maka organizasaun naun-governamentál ida ne’ebé rejistadu iha Governu Metropolitanu Seul Repúblika Koreia nian. Nia asosiadu ho Departamentu ONU nian ba Komunikasaun Globál (DGC) no iha Estatutu Konsultivu Espesiál ho Konsellu Ekonómiku no Sosiál ONU nian (ECOSOC). iha ne’ebe tuir espíritu Deklarasaun Dame Mundiál nian, katak HWPL hakarak atu hetan dame mundiál liuhosi kultura lalehan nian no restaura komunidade globál ho naroman, liu hosi hala’o atividade dame nian iha mundu tomak.
Kultura Lalehan, Dame Mundiál, Restaurasaun Naroman (HWPL) maka ONG internasionál ida ba dame ne’ebé atu hari’i damen globál no hapara funu iha mundu liu husi servisu hamutuk ho nia grupu parseiru, Grupu Dame Feto Internasionál (IWPG), no grupu afiliadu, Grupu Juventude Dame Internasionál (IPYG).
HWPL lidera hela movimentu dame internasionál ida ho líder sira iha área hotu-hotu laiha limitasaun hosi nasionál, kulturál, ka baliza ideolójika sira. Aleinde ne’e, HWPL buka atu kontribui ba Objetivu Dezenvolvimentu Sustentável (ODS) ONU nian liuhosi habelar kultura dame nian no meius oioin hanesan fórum, edukasaun, serbisu voluntáriu, no kampaña sira.
![](https://sapnewstl.com/wp-content/uploads/2024/07/IMG-20240714-WA0016.jpg)
Presidente Konsellu Imprensa (KI) Otelio Ote
Hafoin HWPL hamutuk ho Konsellu Imprensa Timor-Leste asina Memoradum of Understanding (MoU) iha salaun Konsellu Imprensa Kintal-Boot Dili, Presidente Konsellu Imprensa Otelio Ote haktuir HWPL halo komunikasaun ho Midia barak maibe Midia lima mak konsege komunika hodi konkorda no asina MoU, ne’e hanesan sorte ida, tan ne’e husu ba jornalista sira atu kumpri kode etika jornalizmu no asegura kualidade jornalizmu iha Timor-Leste.
“Deklara ba midia sira liu-liu media lima (5) ne’ebé konkorda asina ona memorandu understanding ida ne’e katak sira hetan sorte diak, HWPL komunika ho media barak nafatin kontaktu sira, ita iha Media lima (5) deit mak konsege komunika no susesu, ohin loron ita realiza asinatura entre midia sira ho HWPL”. Tenik Presidente Konsellu Imprensa Otelio Ote liu husi nia diskursu iha Salaun KI Kintal-Boot, 12/07/2024
Lideransa Orgaun Regulador Komunikasaun Sosial ne’e hatutan, jornalista presiza respeita kodigu konduta jornalismu, asegura kualidade jornalista, no eleva kapasidade intelektual, nune’e bele kontribui pozitivamente ba dezenvolvimentu nasaun nian ho susesu.
“Jornalista sira tenke kumpri etiku kodigu jornalista, asegura kualidade jornalismu no eleva kapasidade profisional no intelektual, ita boot sira tenki hatene book an lalais, ita tenke partisipa hodi tulun ita boot sira nia media, tan tinan ne’e formasaun barak ne’ebe ita koopera ona.”nia informa
Iha fatin hanesan, Sekretaria Estadu Komunikasaun Sosial (SEKOMS), Espedito Dias Ximenes fo apresiasaun ba konsellu imprensa tanba bele servisu hamutuk ho HWPL, nune’e midia lima bele asina akordu ida, akordu ne’ebe orienta midia sira hodi haklaken kona ba paz, tanba laiha paz, laiha dezenvolvimentu, laiha dezenvolvimentu maka laiha paz, nune’e hein katak midia sira bele fo atensaun ba paz iha rai-laran tantu iha rai-liur.
“Ha’u hakarak agradese ba Presidente Konselho Imprnsa (KI) ho nia konseleru sira tanba bele esforsu ho HWPL ne’ebe bele halo servisu hamutuk ida ne’e importante tebes. Ohin Midia lima (5) asina ne’e ho HWPL, ita hotu hein katak ho akordu ida ne’e media sira sei tau atensaun liu ba paz, tan laiha paz, laiha desenvolvimentu, tanba ne’e mak paz no desenvolvimentu ne’e tenke la’o hamutuk”. SEKOMS Espedito Dias Ximens hateten
![](https://sapnewstl.com/wp-content/uploads/2024/07/IMG-20240714-WA0025.jpg)
SEKOMS Espedito Dias Ximenes
Governante ne’e akresenta, jornalista sira asume papel importante hodi haklaken paz no estabilidade, tan ne’e nonu governu hakarak agradese ba HWPL ne’ebe apoia tebes midia durante ne’e, nune’e husu atu kontinua ba oin hodi komunika mos ho midia sira ne’ebe seidauk asina akordu, nune’e iha futuru mai sira bele asina hanesan agora.
“Jornalista iha ninia papel ne’ebe importante tebes tanba ita iha nasaun pos-konflitu, nasaun foun ita presiza kria paz, estabilidade no desenvolvimentu, tanba ne’e lori Nunu Governu nia naran hakarak agradese ba HWPL tanba durante ne’e nia apoiu tebes midia, pedidu tinan oin iha karik, kolega sira bele resposta ba nune’e ita bele asina akordu ne’e hanesan agora”. Espedito Husu
Espedito Dias husu ba Midia nasional lima hanesan Hatutan.com, Radiu Liberdade, Radiu Comunidade Comoro, LABEH no SAPNewsTL au bele hakerek artigu barak ne’ebe orienta ba paz, nune’e bele transforma hahalok, atetude no hanoin sosiedade nian hodi garante dezenvolvimentu ne’ebe inkluzivu no sustentavel ba sidadaun hotu ho igual.
“Midia lima (5) ne’ebe asina ona akordu, sira nia servisu boot tebe-tebes, hakerek artigu barak ne’ebe ita boot sira halo ne’e orienta ba paz, tanba ne’e jornalista sira tenke buka meius hodi kria paz, ne’e mak bele muda ka transforma hahalok, atetude no hanoin saida mak ita halo hodi garante paz no desenvolvimentu nasional”.
Espedito Dias husu
Presidente Midia SAPNews Timor-Leste, Clementino Branganca Machado afirma, SAPNews sente gratidaun tanba bele asina MoU ho HWPL hamutuk ho Hatutan.com, Radiu Liberdade, Radiu Comunidade Comoro, LABEH, nia parte kompremetidu hodi kontinua halo kobertura ne’ebe orienta ba damen, hakmatek no unidade iha rai-laran.
“SAPNews sente gratidaun no orgullozu tanba bele selebra akordu ho organisazaun internasional Heavenly Culture, World Peace And Restotarion of Light hodi halo kobertura ne’ebe foka ba paz, halo sidade Dili sai sidade ne’ebe seguru, hakmatek no damen, ne’e ami kompremetidu hodi halo, maibe ne’e responsablidade ema hotu nian, sidadaun ida-idak nian no midia nasional hot-hotu nian, oinsa halo nasaun sai nasaun ne’ebe modernizadu, sivilizadu, dezenvolvidu no prosperu”. Clementino afirma
![](https://sapnewstl.com/wp-content/uploads/2024/07/FB_IMG_1720774361472.jpg)
Imajem : Asina Nota Entendimentu Entre HWPL Ho Midia SAPNewsTL, Hatutan, LABEH, Radio Comunidade Comoro no Radio Liberdade.
Lider Midia Juvenil SAPNews ne’e dehan, SAPNews nia kobertura durante ne’e mos foka ba paz iha sosiedade liliu kona ba edukasaun sivika, promove damen no hatutan povu nian lian, tanba ne’e SAPNews sei kontinua ninia kobertura ne’ebe liga paz nian liu husi implementa mos akordu ne’ebe ohin asina ho organizasaun internasional HWPL.
“Kobertura SAPNews durante ne’e mos orienta ba paz no estabilidade, ita nia nasaun Timor-Leste iha prosesu peace building no state building, luta ba konstrusaun damen no konstrusaun estadu de direitu demokratiku, dala barak enfrenta dejafiu oioin, maibe Midia kontinua hakat hodi konsolidade komunidade no promove paz, edukasaun sivika, hatutan povu nia lian, haklaken ukun nain sira nia lian, konkrolu sosial, promove boa governasaun no haklaken lialos ba ema hotu, ida ne’e duni mak SAPNews hamrik hakarak aprende, servi no kontribui ba nia rai doben Timor-Leste”. Presidente SAPNewsTL deklara
Enkuantu, Midia Nasional lima ne’ebe asina akordu ho organisazaun internasional Heavenly Culture, World Peace And Restotarion of Light (HWPL) maka hanesan midia online Hatutan.com no SAPNewsTL, Radiu 2 maka Radiu Liberdade (RL), Radiu Comunidade Comoro (RCC), no Media LABEH (Lalenok Ba Ema Hotu).
Jornalista : Dircia Baptista Belo & Ermelinda Soares