Promove Timor Ba Mundu ! SECOMS & Institutu Tony Blair Diskute Politika Promosaun Turismu

Imajem : Sekretáriu Estadu Komunikasaun Sosiál, Expeditu Loro Dias, iha Sala reuniaun DNPNM – SECOMS (06/03/2025)

SAPNews TL, Díli — Sekretáriu Estadu Komunikasaun Sosiál (SECOMS sigla Portugués), hala’o enkontru ho Xefi Casa Civíl Palasiu Presidensial no Institutu Tony Blair For Global Change, hodi avalia kona-ba politika no Programa Promosaun Turizmu Timor-Leste (PPTTL) 2024 ne’ebe foku ba eventu organizadu sira husi Palasiu Presidensial.

SECOMS, Expeditu Loro Dias Ximenes hateten, ekipa husi Palasiu Presidensial ne’ebe lidera husi Xefi Casa Civíl no institutu Toni Blair mai halo avaliasaun kona-ba atividade sira ne’ebe durante ne’e Prezidenti Republika halo hanesan eventu sira iha rabilau no seluk tan.

“Ita nia Prezidente Republika hakarak hatene oinsa ho prestasaun media publiku nian bainhira media divulga informasaun kona-ba eventu sira ne’ebe organiza husi Palasiu Presidensial.” Dehan, Sekretáriu Estadu Komunikasaun Sosiál, Expeditu Loro Dias, ba Jornalista sira, hafoin remata enkontru ho Grupu Tony Blair, iha Sala reuniaun DNPNM – SECOMS (06/03/2025)

Sekretariu Estadu ne’e afirma, ema hotu-hotu ne’ebe hola parte iha Palasiu Presidensial nian, atu liu husi sorumutu ida ne’e ekipa Xefi Casa Civil bele informa ba Prezidente Republika hodi avalia, nune’e bele hanoin atu reforsa atividade sira ne’ebe antes ne’e realiza ona, entaun objetivu ida ohin ekipa husi Palasiu Presidensial, mai rona husi SECOMS.

“Tanba hanesan ita hotu hatene katak Midia ne’e importante, sai pilar demokrasia, pilar ba unidade nasional no mos pilar promosaun Timor-Leste ba mundu, no mundu sei konhese Timor-Leste husi uluk to’o agora tanba papel midia nian, importante tebes hodi divulga informasaun ba públiku”.

Nia hatutan, “Midia nu‘udar meiu atu halo promosaun ba setor oioin no dezenvolvimentu Timor-Leste liuhusi divulgasaun informasaun ba públiku, Tanba ne’e liuhusi atividade ohin nian atu haree mos kona-ba resepsaun midia nian liuliu promosaun area turizmu, kultura, desportu, edukasaun, tantu midia rasik ba iha mundu” Dehan Expeditu.

Iha fatin hanesan, Adjunta Chefe Casa Civil Henriqueta Maria da Silva, aprofunda sorumutu ho SECOMS hodi ko’alia kona-ba Planu no Programa Promosaun Turizmu Timor-Leste 2024, nune’e bele iha avalisaun hodi promove Timor-Leste ba mundu no haburas kriatividade Timoroan nian iha rai laran.

“Nune’e ema husi rai laran no liur bele mai konhese ita nia kultura sira, dominiu koiñsementu teknolojia no haburas Timor ba mundu, maibé diak liu tan mak ita haburas kriatividade Timoroan nian iha rai laran hodi oferese ba merkadu ASEAN no merkadu mundial sira seluk”.Nia hakotu.

Jornalista: Guilhermino Ramos