Raí Nakdoko Iha Myanmar & Tailândia ! Ema Na’in 99 Lakon & 3 Lakon Vida
Imajem : Rai nakdoko rezulta infra-estruturas barak hetan estragus iha Myanmar no Tailândia, 28/03/2025. Foto : Social Media Internacional
SAP News TL : Rai nakdoko ho magnitude 7.7 iha Myanmar rezulta ema rihun ida resin sai vítima no iha Tailândia ema na’in 99 lakon, na’in hitu hetan kanek no na’in tolu lakon vida.
Tuir informasaun ne’ebe SAPNews asesu liu hosi Vatican News haktuir katak Papa Francisco “laran-taridu tebes” ho lakon vida umanu no “devastasaun jeneralizada” ne’ebé kauza hosi rai-nakdoko iha Sudeste Aziátiku, ne’ebé kona Myanmar no Tailándia.
Iha telegrama ida ne’ebé asina hosi Kardeál Sekretáriu Estadu Pietro Parolin no diriji ba autoridade ekleziástiku no sivíl birmanés no tailandés sira, Pontífise “oferese orasaun sinseru sira ba matebian sira nia klamar no garantia hosi nia besik espirituál ba sira hotu ne’ebé afetadu hosi trajédia ida-ne’e.”
Imagem : Papa Francisco iha ospitál Gemelli-Roma, 23/03/2025. Foto : Vatican News
Amu-Papa “reza mós atu traballadór sira salvamentu nian sei hetan sustentasaun iha sira nia kuidadu ba ema kanek no uma-laek sira hosi don divinu sira forsa no perseveransa nian.”Vaticano, 28/03/2025. Sita Vatican News
Rai-nakdoko ida ho magnitude 7,7 – tuir fali ho réplika ida ho magnitude 6,4. Informasaun ne’ebe rejista ona iha loron-sesta dadeer, 28/03/2025. Episentru ne’e lokaliza iha kilómetru 16 ba noroeste Sagaing nian iha sentru Myanmar nian. Iha vítima rihun resin, barak liu iha área Mandalay.
Junta militár ne’ebé maka iha poder dezde golpe Estadu ida iha tinan 2021 iha nasaun ida ne’ebé maka estraga ona hosi funu sivil deklara ona estadu emerjénsia iha rejiaun neen no lansa ona apelu ida ba komunidade internasionál ba ajuda umanitáriu urjente.
Entretantu, iha Tailándia, Primeiru-Ministru Tailándia Paetongtarn Shinawatra deklara estadu emerjénsia iha Bangkok, dook liu kilómetru rihun ida hosi episentru iha Myanmar.
Imajen kona-ba edifísiu ida ho andár 30 ne’ebé sei iha hela konstrusaun monu maka xokante, hodi hamosu pelumenus ema na’in tolu mate, na’in hitu kanek no ema na’in sia-nulu resin lakon.
Enkuantu, Falla Sagaing hanesan falla sízmika boot ida iha Myanmar, ne’ebé halai hosi sentru ba norte nasaun nian, ne’ebé kauza hosi movimentu hosi plaka indianu no euraziátiku sira.
Lembra fali katak, Rai-nakdoko sira relativamente akontese ona iha fulan-Novembru 2012, nakdoko ho magnitude 6.8 kauza ema na’in 26 mate, no iha 2016 rai-nakdoko hanesan kauza tan ema na’in tolu mate.
Jornalista : Marciana da Conceição
